يحيى الرخاوى طبيب نفسى
نشرة “الإنسان والتطور”
الأحد: 14-4-2024
السنة السابعة عشر
العدد: 6070
أغانى مصرية: عن الفطرة البشرية
للأطفال ⇔ الكبار وبالعكس [1]
2- الحياة
-1-
الحياه هىّ الحياهْ،
أغلى حاجه فيها هيّا: إنى عايش،
وِسْط ناسْنا الطيبين،
حتى ناسْـنا النُصْ نُصْ،
همّا برضهْ، أحلى ناسْ: طيبين
بس انا برضه بَلاقينِى ساعات كدا نُصْ نُـصْ،
قلت أتعلم ، وابُصْ:
-2-
الحياة الحلوة حلوةْ،
حتى لو مُرّة وتْتأَمِّل شويه،
راح تشوف مرارتها حلوةْ
الحياة مش هيصهْ سايبه منعكشهْ،
الحياة حركة جميلةْ مُدهـِشـَه،
بس بتخوّف ساعاتْ
لمّا بنعرِّى الحاجاتْ.
-3-
باترعب من خطوتى الجايّة ، ولكنْ،
باترعب أكتر لو انّى فضلت سـاكنْ.
كل ما بالْقانِى ماشى: ما بَـنَاتـْـكُمْ،بانبِسطْ.
إيدى ماسكه فى إيديُكمْ،
بابقى خايف إن واحد ينفرطْ
-4-
يا حلاوا لو تكون الدنيا ديَّهْ،
زى ما ربى خَلَقْناَ: هِيـَّـا هيهْ،
تيجى رايح نحوها، تلقاها جايَّه
-5-
الحياة الحلوة تِحلى بْكُلّنا، إنتَ وانَا،
كل واحدْ فينا هوّا بعضنا،
بس مش داخلين فى بعض وهربانين،
زى كتلةْ قَشّ ضايعةْ فْ بحر طينْ.
كل واحد هوّا نفسُه
بس نفسُه هِـيّا برضهْ كُـلِّنا،
مالى وعيهْ بربّنا
ــــــــــــــــــــــــــــــــــ
[1] – يحيى الرخاوى، (2017) “أغانى مصرية: عن الفطرة البشرية للأطفال والكبار (وبالعكس)”، منشورات جمعية الطب النفسى التطورى، والكتاب متاح فى مكتبة الأنجلو المصرية وفى منفذ مستشفى دار المقطم للصحة النفسية شارع 10، وفى مؤسسة الرخاوى: 24 شارع 18 من شارع 9 مدينة المقطم، كما يوجد أيضا بموقع المؤلف، وهذا هو الرابط www.rakhawy.net.
جميلة قوي من الشغل الجميل بتاع الدكتور…كل جزء فيها لوحده يعلم كتيير بس علي بعضها..نموذجية مثالية صعبة…ربنا يخليه
كل سنة وانت هنا يا مولانا :
المقتطف : يا حلاوا لو تكون الدنيا ديَّهْ،
زى ما ربى خَلَقْناَ: هِيـَّـا هيهْ،
تيجى رايح نحوها، تلقاها جايَّه
التعليق : الحركة فى الكلمات بترقص برشاقة وحيوية ،خصوصا فى قولك ” تيجى رايح نحوها تلاقيها جاية ” حركة تمنح القارىء فرصة لرؤية الصورة ،رؤية بسيطة ،واضحة ،مبهجة ،مسئولة ،متسائلة تساؤلك الطيب دائما : إذن ماذا ؟!تطلع إجابتك الحلوة من وسط الكلام : زى ما ربى خلقنا ..طب واحنا عملنا ايه ف خلقة ربنا ؟! اه هنا يبدأ النكد ،والنكد مخبى وراه ألم ،خلينا نتذوق حلاوة الرؤية ،مؤقتا .