يحيى الرخاوى طبيب نفسى
اليوم السابع
الثلاثاء : 3-9-2013
الأولاد: كل واحد يحرّر نفسه!
(قالت الأم للأب:)
الأم: الأولاد؟
الأب: ما لهم؟
الأم: مش هنا خالص
الأب: مش هنا فين؟ ما هم قدّأمك أهم
الأم: قدامى فين؟ إنتّ اللى فين؟
الأب: آه والله، دانا ما عنتش عارف مين فى سنة كام.
الأم: يعنى لما تعرف حا تعمل إيه؟
الأب: أعمل إيه! أعمل زى الناس ما بيعملوا
الأم: وهمّا الناس بيعملوا إيه؟
الأب: بيعملوا اللى بيعملوه
الأم: إللى هوّه إيه؟
الأب: وبعدين بقى؟!!!!
الأم: وبعيدين بقى إيه؟ هوّا انت مش طايق كلامى ليه؟
الأب: بصراحة أنا مش طايق نفسى
الأم: إنتَ حر فى نفسك، إنما أنا؟
الأب: إنتى مالك؟ فيه إيه؟
الأم: كنت باكلمك عن الأولاد
الأب: مالهم؟
الأم: كنت باقول لك إنهم مش “هنا” خالص
الأب: مش هنا فين؟
الأم: مش معانا يعنى
الأب: إمال مع مين؟
الأم: إيش عرّفنى
الأب: طيب وعايزة منى إيه؟
الأم: عايزة اعرف
الأب: تعرفى إيه؟
الأم: ولا حاجة
(انتهى الحوار الوالدى)
(قال الولد لأخته)
الأخ: همّا خلاص حرروا فلسطين؟
الأخت: بتسألنى بأمارة إيه، هوّا انا حزب الله
الأخ: إمال همّا محموقين قوى عشان يحررونا ليه
الأخت: ما هى مصر أم الدنيا، لما تتحرر كله حايتحرر
الأخ: هى مش متحررة؟؟
الأخت: إيش عرفنى
الأخ: مش الدستور بيقول مصر بلد حرة مستقلة
الأخت: هو لما الدستور يقول يبقى خلاص اتحررنا
الأخ: إمال عايزة نسجل إننا بلد حرة فى الشهر العقارى؟
الأخت: لأه، إسمح لى أنا ما فيـّاش خلق للتريقة، إعمل معروف
الأخ: طيب نجيب ورقة من الأمم المتحدة إن مصر حرة
الأخت: نعمل بيها إيه
الأخ: نقدمها للجماعة بتوع سينا دول إن احنا استغنينا عن خدماتهم
الأخت: قصدك الجهاديين ولا القاعدة؟
الأخ: هوه فيه فرق؟
الأخت: إنما دول بيقولوا إنهم بيحرروا الإسلام مش بيحرروا مصر
الأخ: هو الإسلام مش حر
الأخت: إنت حاتلبخ؟ الإسلام ده هوا أصل الحرية
الأخ: إمال بيحرروه من إيه
الأخت: بيحرروه من الإخوان
الأخ: من الإخوان؟؟!!! دول هما هما الإخوان
الأخت: إيش عرّفك؟!! لو كده: يبقى بيحرروه من بعضهم
الأخ: وبعدين بقى؟!!
الأخت: المهم، كل واحد يحرر نفسه
الأخ: على وزن: كل واحد يدلّع نفسه.
الأخت: بايخة
الأخ: زيّك