يحيى الرخاوى طبيب نفسى
اليوم السابع
الجمعة 27-9-2013
زى ما ربى خلقْها، مش ألاعيب أمريكانى
من أغانى قديمة كتبتُها للأطفال داخلنا وخارجنا: منذ حوالى عشر سنوات.
-1-
جيت أشوفها فى الكبار قمت اترعبتْ
الحكاية بايظة خالص، … قَومْ سِكـِتّ
كل حاجه غامضَةْ داخله فْ بعضها
واللى ماسك دفة المركب باينّـه
فى العسل نايم ولاهوش قدّها
يعنى نيأس؟!!
قلت لأه، مهما حاولوا يخرّبوها
يبقى نلجأ للى بكره حايعملوها :
شفتها فيهم بسيطهْ:
يعنى واضحة، بايْنَهّ واصْله لْوَحدَهَا
أعمل ايهْ؟
قلت أقولْها للعيالْ وعلى الله تنفعْ
للكبير برضُه ما هى يِمْكِن تِسمَّعْ:
-2-
نِفْسى أبقى بسيطْ وأوْضحْ
نِفْسى إن الكلمهْ تنجحْ
نفسى احافظ عالأملْ
والكلام الحلو يبقى حلو، لمّا يتعَمَلْ
هيَّا ورطةْ للكبير زى الصغيَّرْ
ياللا يا ابنى قبل ما بَـلْوِتْنا تكبْر
(* ماهى كْبرتْ واللى كان دا بايِنّه كانْ!)
=لأَّهْ، داحنا قدّها، وانتمْ كمانْ.
……
= العيال واخدينها جَـدّ
ماباينْشِى الحارهْ سدّ
إحَنا ليه بِنْسدّها بَدْرى عليهُمْ؟!
– أصلنا خايفين نشوفها بى عِينيهمْ
قومْ نراجعْ نفسنا !
(= لأْ ياعمْ، راجع انتَا بالنيابةْ عننَّا)
(انا مش نأوى أخطىِّ مِنْ هنا)
– طب نِسيبْهُمْ هُمَّا يمكن يعملوها
(= لأَّه برضه، هيّا سايبه؟!
ما احنا عارفين اللّى فيها.)
-3-
– همّا يعنى لسه راحْ يستَنّوا إذْنَكْ
همّا طايحين بالسلامه غصب عنىّ، آه، وعنّكْ.
العيال لازم يـِعـَـدُّوا
كل واحد على قدّو
كلهّ بِيْحُطّ اللى عندُه
البُنَا يطلع لوحْدُه
طوبهْ منّك، طوبه منِّى،
نبنى إللى مستحيل حد يـِهـِدّه
بابه مفتوح لهْ تعالـَى، طب ومين يقدر يسدُّه؟!!
العيال راح يعملوها واللى خـَلـَقـَكْ
العيال جـُـوَّانا برضَك،
زىْ عندى زى عندك
يعملوا بكره وبعده
مِالنَّهارده الحلو برضه
لو نحطـّـُـهْ عَالَى بعضه
(* يعنى قصدك: يعنى إيه؟
كل ده بِتْرصُّه ليه؟)
– قصدى يعنى إنه حتى لو الكبير قفـِّـّلْ وطنّشْ
العيال راح يعملوها،
(* …….. لأ ما اظُنـِّشْ.)
– لأ تُظُن ونُصْ،
بسّ حِسّ وبُصْ
-4-
راح تشوفها شكل تانى
زى ما ربى خلقها مش ألاعيب أمريكانى
(*هيّا إيه؟)
– الحياة
(*يعنى إيه؟)
الحياة هيّا الحياة
أغلى حاجه فيها هيّا: إنى عايش، وِسْط ناسْنا الطيبين،
حتى ناسْـنا النُصْ نُصْ، همّا برضهْ، أحلى ناسْ: طيبين
ما انا منهمْ، يبقى لازم زيُّـهمْ، حلو خالصْ،
بس انا برضه بَلاقينِى ساعات كدا نُصْ نُـصْ،
قلت أتعلـِّم ، وابُصْ:
-5-
الحياة الحلوة :حلوةْ،
حتى لو مُرّة وتْتأَمِّل شويه، راح تشوف مرارتها حلوةْ
الحياة مش هيصهْ سايبه منعكشهْ،
الحياة حركة جميلةْ مُدهـِشـَه،
بس بتخوّف ساعاتْ
لمّا بنعرِّى الحاجاتْ.
-6-
باترعب من خطوتى الجايّة ، ولكنْ،
باترعب أكتر لو انّى فضلت سـاكنْ.
كل ما بالْقانِى ماشى: ما بَـنَاتـْـكُمْ،أنبِسطْ.
إيدى ماسكه فى إيديُكمْ،
بابقى خايف إن واحد ينفرطْ
-7-
يا حلاوا لو تكون الدنيا ديَّهْ،
زى ما ربى خَلَقْناَ: هِيـَّـا هيهْ،
تيجى رايح نحوها، تلقاها جايَّه
-8-
الحياة الحلوة تِحلى بْكُلّنا، إنتَ وانَا،
كل واحدْ فينا هوّا بعضنا،
بس مش داخلين فى بعض وهربانين،
زى كتلةْ قَشّ ضايعةْ فْ بحر طينْ.
كل واحد هوّا نفسُه،
بس نفسُهْ : هِـيّا برضه كلنا،
مالى وعيه بربّنا