الحرية : أرجوزة الأطفال للكبار

أخبار الأدب

نشرت بتاريخ: 19 مايو 2013

 نبض الناس

 الحرية : أرجوزة الأطفال للكبار

كتبت هذه الأراجيز للأطفال، وحين أعدت قراءاتها مؤخرا وسط هذه الشعارات الزائطة فى أسواق ومزادات الحرية، وهم يصدرونها إلينا سابقة التجهيز، ويعايرون كل من “لا يسمع الكلام” بأنه “قليل الحرية” (وقليل الأدب بالمرة) أقول حين رحت أتأمل “حرية” أغلب من يبيع لنا الحرية أو حتى ينادى بها عندنا، أو يزعم وجودها، تساءلت هل هؤلاء جميعاً يعرفون الحرية كما قدمتها للأطفال، وإذا بى أكتشف أننى تقمصت الأطفال بدلا من أن أرشدهم وأشرح لهم، وإذا بالأطفال يكشفوننا نحن الكبار، كل ما أرجوه من السادة الكبار أن يطلقوا سراح أطفالهم بداخلهم إن لم يكونوا قد نفذوا فيهم حكم الإعدام بعد، ويغنوا هذه الأرجوزة لا يقرأونها فقط.

-1-

بيقولوا  كلام مالهوش لازمة

باين أهالينا ما هيش  فاهمة

قال “حرية” !؟…. أُسـْـكُت لاغْلط.

بتهرّج   واللا بتِسْتَعْبَطْ !

هوا انت يا عمّنا أصلاً حرّ

دى الحنفيّة عمّالة بتـخُـرْ

أفكار جاهزة، فتوى وأحكام، 

واللى ينهّــق ركّبْ له لْـجام !!!

-2-

“تتحرك جوّه اللى قلناه وانْ كان عاجبكْ، !!

  وساعتها تبقى حر تمام،  كدا على قدّك”!!!

دى حكاية وباين مش نافعة

دانا زى باخطـِّى فْ نار والعة

-3-

الحرية ما تجيش أبدا كـِدَا مالآخرْ،

ولا كلّ ما اقرّب تـتَّاخرْ

بصراحة أنا خايف أبقى حر.

أصل انا ما اعْرَفشى “أسيبها تمُرّ”

حا تمرِّى ازاى وتروحـِى على فين،… وانا مش دارى

أصل انا باستعبطـْ، وبَدَارِى

  مش عايزْ أكتفى بشعارها

ولا عُدت ارتوى من أشعارها

مش أحسن نعرف  “نعمل إيه”

راح تستغرب ما اللى عملته وقدرت عليه!!

-4-

الحرية هى “الحركة” جوّاكْ برّاكْ،

            هى إنك تقدر تتغيرْ من “هنا” “لهناك”،

و”هناك” مفتوح وبيتفجـَّـرْ

 كل ما توصلـّه يتغيَّرْ

إوعى تصدقهم: تستـنـَّى “لحد ما تكبر”

دا انت تراجع أوِّل باوِّل: كلّ كلامهمْ

راح تلقى حاجات مش على بالهم، غصبنْ عنهم

وتفكر “بالعقل” وبرضه بحاجات “هيّه”،

ما انت عارفها، مش مستنى منى وصية

-5-

الحرية انك تتحرك وتـْراجعْ

“إنك تحترم اللى وصلـّك!”، دا مافيش مانعْ

…. بس يا خويا يبقى بدايهْ،  بسْ مش اكترْ

وتغامر تحمِلْهَا أمانة، مش تتمنظرْ

-6-

الحريهْ: انك تقدر ترمى طوبـِتهّا

لو مش قادر، تدفع “حالا”:  حقّ قيمتها

لو مش قادر انك تحمل إلا خيبتها

بس تاخدْ بالك، مش يمكن:  تستحلاها؟

مهما كات غاليه،  إوعى تقول “ياللاّ…، بـَلاهَا”!

-7-

الحرية عمرها ما تكون وانت لوحدك

الحر صحيح لازم يبقى كده وسط الناس

مش يقعد يلعب مع نفسه من غير إحساس

تبدا بنفسك واللى حواليك يعملوا زيك

لو حر لوحدك مش نافعة وحياة والدك

-8-

الحر عليه  يسأل تفسه: حر مع مين؟ حر على مين؟

                        حُرّ؟! سارقها ورايح على فين؟

ما انا برضه حر:  بقينا اتنين !!!!

لو حر صحيح؟ بقى تستحمل حواليك أحرار

يعنى يختاروا ما دام إنت برضه بتختار

الحر الحر يلاقى دايما أحرار حواليه

ماذا وإلا:

يبقى فْ زنزانة الحرية  وْمقفولة عليه