يحيى الرخاوى طبيب نفسى
اليوم السابع
الثلاثاء : 19-11-2013
الحد الأقصى
قالت البنت لأخيها: والله العظيم مانى فاهمه
قال أخوها: عادى
قالت: والله ما عدت أقولك حاجة، هوّ ايه اللى عادى
قال: إنك مش فاهمة، يعنى هوّا انا اللى فاهم!
قالت: طب نعمل إيه
قال: نسأل أهلنا
قالت: إعمل معروف، سيبهم فى حالهم، همّا ناقصين فهم
قال: بتقولى ناقصين “فهم” ولا ناقصين “همّ”
قالت: انت حاتستعبط ؟ ما هو الفهم بيجيب الهم
قال: طيب طيب
قالت: طيب إيه؟ هوّا انا لسه قلت حاجة؟
قال: قولى يا اختى هوّا الكلام بفلوس
قالت: أيوه، أديك فهمت أنا عايزه اتكلم فى إيه، فى حكاية الفلوس
قال: احنا مالنا ومال الفلوس، خلى المواضيع الصعبة دى لأصحابها
قالت: ما هو اللى أنا مش فاهماه همّا “أصحابها” دول مين
قال: طيب ودى عايزه فهم، أصحاب الفلوس هما اللى عندهم فلوس، إحنا مالنا
قالت: عارفه عارفه، بس مستغربة
قال: ما انتى على طول مستغربة
قالت: همّا بيعملوا بالفلوس دى كلها إيه؟
قال: بيعملوا بيها فلوس
قالت: أنا باتكلم جد، هى الفلوس بتعمل فلوس؟؟
قال: الله يخيبك، إمال بتعمل إيه؟
قالت: إيش عرفنى، ما هو عشان كده مش فاهمه
قال: استنى لما يبقى معاكى فلوس وانت تفهمى
قالت: بعد عمر طويل
قال: تصورى مرة سبت نفسى أسأل زيك كده، راح سؤال ناطط فى مخى، سؤال..، استغفر الله، استغفر الله العظيم
قالت: سؤال إيه ؟
قال: أهو سؤال زى أسئلتك البايخة دى
قالت: سؤال إيه؟ ما تقول يمكن أجاوبك
قال: مش انتى بتقولى انك مابتفهميش، استغفر الله العظيم ، أقول لك بتاع إيه؟
قالت: انت بتعلـّقنى، ما كنت تسكت ما دام كلام “حرام” كده
قال: لأه هو مش حرام يعنى حرام، هوّه يمكن غلط
قالت: طب بس قول ما تخلنيش أفكر فى حاجات ألعن
قال: امرى لله، السؤال يا ستى السؤال يا ستى يعنى، السؤال: سألت نفسى يا ترى هيّا الجنة فيها فلوس
قالت: آه والله !!!، هوّا صحيح حايبقى فيها فلوس
قال: أنا اللى باسأل، اللـه!!!
قالت: فلوس نعمل بيها إيه؟ ما كل الحاجات هناك موجوده فى الجنة نعمة من الله، حانعمل بالفلوس إيه؟
قال: انت بتتكلمى زى ما تكونى من أهل الجنة، اسم الله عليكى وعلى حواليكى
قالت: ربنا كريم، إنت مالك انت!
قال: والناس اللى انتى بتتكلمى عليهم دول، اللى فلوسهم عماله تعمل فلوس، حايعملوا بفلوسهم إيه فى الجنة
قالت: وهمّ حايروحوا الجنة من أصله ؟
قال: استغفر الله العظيم
قالت: مش قصدى يعنى مش قصدى، ربنا هو اللى حيدخلنا أو يدخلهم برحمته
قال: طب وإذا رحمهم ربنا ودخلهم الجنة حياخدوا فلوسهم معاهم يا ترى؟
قالت: إيش عرفنى
قال: استغفر الله العظيم، كفاية بقى ربنا يخليكى، إحنا غوّطنا زيادة، أنا خفت، إيه اللى جاب السيرة دى؟ الله يخرب عقلك
قالت: بصراحة أصل أنا لما قريت حكاية الحد الأقصى دى ، استغربت ومافهمتش، دى حتى مش فلوسهم
قال: إمال فلوس مين؟
قالت: فلوس الحكومة
قال: ما هم همّا الحكومة
قالت : لأ بقى،.. دى فلوسنا احنا
قال: دا بيتيهيأ لك
قالت: لأ دى فلوسنا ونص
قال: بأمارة إيه؟
قالت بأمارة!! بأمارة؟ بأمارة إن احنا الشعب
قال: وهوّ الشعب له فلوس؟
قالت: آه.. صحيح!! نسيت.