يحيى الرخاوى طبيب نفسى
نشرة “الإنسان والتطور”
الثلاثاء: 4-12-2012
السنة السادسة
العدد: 1922
الثلاثاء الحرّ:
.. ما هو كله تسالى يا نور العين
نقدم اليوم تحديث محدود، لعله يواكب أحداث اليوم، خاصة فى نهاية الأرجوزة التى سبق نشر أغلبها فى تعتعة الدستور، بتاريخ: 22 مايو 2012 .
…..
كل واحد يركب المحمل يصرّح
إن بكره الكل راح يشبع ويفرح
وان أصل المسئولية
هيه تأكيل الرعية
إما بالدّعم اللى هوَه،
أو بتزويد الماهية
بس يعنى الدعم حَانشيلْ حَبه مِنُّهْ
ما هو شرط البنك: إِذْ لابد عنّه
……
رجعوا قالوا بس يعنى خلى بالك:
سيبها لينا، إنت مالكْ.
– أنا مالى؟!! أنا مالى؟!! أنا فاضْ بِى ماللى جارى
قالـّى إسمع وانتبه لى، آنا حاشرح لك قرارى:
مبدأنا الأول يا ضنايا
إنك ما تاخدشى اللى معايا
وانْ جالك وَشّ الحريّة
تبقى الحدوتة ما هيش هيّه
وكفاية عليك رصّ الحكايات
والتوك الشو والتصريحات
والفيديو كليبْ، والنايل سات
عايز تنهب؟
تسكتْ : تكسبْ
وأكيد تشبعْ، رغْىْ وشعارات،
ووعود، وعهود، وخطب وحاجات،
ترمى الزَّهْـرَايهْ: تتمايلْ
لو حتى ورقك مش هايلْ
تربط بطنك بحزام السر
تتكرع ريحة الفكر الحر
= كده تـُمُوتِيكِى ؟ طب قولّى ازاى؟
– فوّل تنْـكِ الجوع عـــالآخر
تيجى تقطم لقمهْ: .. تتاخِرْ
تِـعـْـتِـل زى حمار فى المطلع
توصل، يعنى يا دوُبك ترجَعْ
تستلم الرخصة وتبرطع
تلقى الرخصة مكتوب فيها :
“إن جنابك كده: “إنسانْ حُرْ”
وسياسة السوق: خليها تمر
= بأمارة إيه ؟
– إنك تقدر تعلن رأيك
= يعنى اعمل إيه؟
– قول ما بدالك
= طب دانا عايز….
– عايز تانى ؟!!
ما كافاكشى كلامنا الإنسانى!!؟
طب عايز إيه ؟
= عايزابقى: “بشراً محترماً”
– ليه يابْنى كده؟ إنت اتجننت؟
= طب أمشى لقدّام كام “قدّماً”
– برضو اتجننت.
= طب حبة حُـب فوق البيعة
– مش لمّا تشترى من أصلهْ
= هوا بيتباع ؟
– مش عارْفَـهْ ؟
= وانا حادفع كامْ ولمين، طب فين ؟
– تدفع روحك هنا بالتقسيط ،
“خمسهْ فْ ستة”.
= وامّا مايبقاش فاضل فيّا، أيها حاجةْ، أناأعمل إيه ؟
– جمعيهْ !!
= واقبض إمتى ؟
– الساعه ستَّه.
= حايكون يوم إيه ؟
– مش شغلك.
…….
وألاقى حالى باستنّى
وأسلى نفسى واتمنّى:
نِفـْسى مْنِ وْلاد الجنـّيهْ
الصفوهْ، الشُّـعرا، الآلاتية
يعملوا نظرية انما هيهْ
ويسمّوها، وسرها باتع:
“تنوير الفكر المش نافع”،
تأليف سى أوباما وكلينتونْ
ترجمة الواد “عارفينو إنتمْ
نظرية تْعوْلـِـمْ طاقة الكون
وجميعْ أيُّهاَ حركهْ وسكونْ
فيها مبادْرات ميّا الميه
وكلام مملوء بالعاطفية
وحقوق إنسان خواجاتية
بيعيدو توزيعها بْأريحية
فى كياس ملفوفة بحنية
فيها منقوع المِلاغية
وحكاوى البِنج التاريخية
وربيع عربى، وحمامْ غِيّهْ
وخطط تانية مستـنـّية …!!
ورئيسنا تمام ميّا المِيّهْ
“ممنوع اللمس انت وهيَّهْ”
وكلام بقى يعنى كدا ف سرّك
إسلامنا فيه حاجة تْسُرَّك
دَستور يا سيادى اسم الله عليه
بـِاسْمِالّله ياصاحبى دا شغل إيديه
“تبقى انت كده عْرفت المرسومْ
وعليكْ: “أن ترضى بالمقسومْ”
وانا حاسمحلك بمظاهْريتين
ما هو كله تسالى يا نور العين