استبار نفسى “تحت الإعداد” : ليس لزاما أن تقرأه مرة واحدة، ولكن قل لى رأيك؟!!!!! كيف؟؟

“نشرة” الإنسان والتطور

28-1-2009

السنة الثانية

العدد: 516

استبار نفسى “تحت الإعداد”

ليس لزاما أن تقرأه مرة واحدة،

ولكن قل لى رأيك؟ !!!!! كيف؟؟

أحب أن ألعب وأنا أفكر، وأن أتحدى وأنا أتلقى، وأن أغيّر وأنا أكتب.

فى نشرة أمس حكيت حكاية هذا المشروع، ووعدت أن أنشر الاختبار كاملا اليوم، ثم ترددت لخوفى من أن أرهق أصدقاء الموقع بهذا الكم الهائل من التقليب (التعتعة) مرة واحدة، لكننى عدت وغامرت وقلت أوفى بوعدى خشية التأجيل تلو التأجيل، وأنا ما صدقت أن الاختبار خرج من مخازن حاسوبى “الماكنتوش” إلى شمس الموقع، هنا، معكم.

وفى انتظار اقتراحاتكم كيف نواصل،

أرجوا أن تقبلوا اعتذارى

****

مشروع استبار قصر العينى– المقطم – مونتريه

الاسم الجديد المقترح:

“استبيان الشخصية فى الثقافة العربية”

بالعامية المصرية

أولا: بالعامية المصرية: (نشرة اليوم)

ثانيا: بالفصحى: (نشرات لاحقة)

أقوم حاليا بترجمة الخمسمائة عبارة إلى الفصحى ربما يشاركنا فى الرأى الأصدقاء والصديقات العرب من غير المصريين (بناء عن توصيات وتجربة الصديق أ.د. جمال التركى فى الألعاب النفسية)

وقد قمت بترجمة أول عشرة عبارات، كعينة، إلى الفصحى وسوف أواصل ذلك حالا.

كما أننى أفكر أن أطلب لاحقا من أى ممن يتطوع من الزملاء من الأقطار الشقيقة أن يعيد الترجمة من الفصحى إلى اللهجة العامية الخاصة بالقطر الذى ينتمى إليه (أيضا مثلما فعل أ.د. جمال التركى فى الألعاب التى نشرت هنا فى هذه النشرة طوال العام الماضى)

وآمل أن تتداول كل نسخة بالفصحى والعامية المحلية معا، إن جاز لنا أن نتواصل أكثر.

****

النسخة العامية (مع عشر عبارات بالفصحى)

بيانات المشترك

الاسم: (الحقيقى أو كما تشاء) السن: ( ) النوع: (ذكر – أنثى) الحالة المدنية: (متزوج – أعزب أرمل – يعول) الحالة الاقتصادية: مستكفى: ( ) مديون: ( ) مستريح: ( ) مدخر: ( ) أكثر مما تحتاج: ( )

المؤهل الدراسى: دراسات عليا: ( ) مؤهل عالى: ( ) ثانوى: ( ) فنى متوسط: ( ) إعدادى: ( ) أقل: ( )

العمل (المهنة): له علاقة بالعلوم النفسية: ( ) ليس له علاقة بالعلوم النفسية: ( )

طريقة الاستجابة:

فعـلا

مش قوى كده

لأ طبعا

نعم

ليس تماما

طبعا لأ

“استبيان الشخصية فى الثقافة العربية”

بالعامية المصرية

أحسن‏ ‏حاجة‏ ‏إن‏ ‏الواحد‏ ‏ما‏ ‏يقولشى رأيه فى التانيين عشان ما حدش يزعل منه.

(بالفصحى): من الأفضل جدا ألا تعلن رأيك فى الآخرين، حتى لا يضيق بك أحد

أحب‏ ‏ أشوف ‏فى ‏التليفزيون‏ ‏برامج‏ ‏المصارعة‏ ‏الحرة‏ ‏.

(بالفصحى): أحب أن أشاهد برامج المصارعة فى التلفازْ.

‏ الجدة‏ ‏أحنّ‏ ‏من‏ ‏الأم‏ ‏دايما‏.‏

(بالفصحى): الجدة أحنّ من الأم دائماً

أعتقد‏ ‏أن‏ ‏القراءة‏ ‏فى ‏غير‏ ‏التخصص‏ ‏مضيعة‏ ‏للوقت.

(بالفصحى): أعتقد‏ ‏أن‏ ‏القراءة‏ ‏فى ‏غير‏ ‏التخصص‏ ‏مضيعة‏ ‏للوقت.

الدنيا دى دُنية الشطار وبس ‏.

(بالفصحى): هذه الدنيا هى للشطّار فحسب.

اللى يقدر ‏يضحك‏ ‏على ‏المغفلين، ‏ ‏له فضل عليهم ‏‏عشان‏ ‏بيعلمهم‏ ‏الحياة‏ .‏

(بالفصحى): من يستطيع أن يخدع المغفلين، له عليهم فضل أنه يعلمهم دروسا فى الحياة.

لما باشوف ‏حادثة‏ ‏تحطيم‏ ‏سيارة‏ ‏على ‏الطريق‏ ‏أحمد‏ ‏ربنا إنى ما كنتش فيها ‏أكثر‏ ‏ما بافكر فى اللى جَـرى لركابها.

(بالفصحى): حين أشاهد حادثة تتحطم فيه سيارة على الطريق، احمد الله أننى لم أكن

أحد ركابها أكثر مما أفكر فيما جرى فعلاً لركابها

نص‏ ‏الشطارة‏ ‏فى ‏التجارة‏، ‏ونص‏ ‏التجارة‏ ‏فى ‏تحسين‏ ‏العرض‏، مش ضرورى تحسين‏ ‏البضاعة .

(بالفصحى): نصف الشطارة فى التجارة، ونصف التجارة فى تحسين العرض، وليس فى تحسين البضاعة.

يستحسن‏ ‏أن‏ ‏يتزوج‏ ‏كل‏ ‏واحد‏، ‏أو‏ ‏واحدة‏ ‏حد‏ ‏يشبهه‏ ‏عشان‏ ‏ما‏ ‏يختلفوش‏.

(بالفصحى): يستحسن أن يتزوج كل واحد، أو واحدة من يشبهه، حتى لا يختلفان.

أنا ما باتناقشى مع ‏ ‏أولادى (‏أو‏ زوجتى- أو ‏إخوتي‏- ‏أو‏ ‏أصدقائي‏) ‏فى ‏الأفلام‏ ‏التى ‏بنشوفها‏ ‏مع بعض.

(بالفصحى): لا أتناقش مع أولادى (أو زوجتى- أو إخوتى – أو أصدقائى) فى الأفلام التى نشاهدها مع بعض.

لو حد حاول يضحك عليك، وانت استعبطت وسبته وخليته يصدق إنه ضحك عليك، يبقى انت اللى ضحكت عليه.
أنا أحب‏ ‏أشتشغل بياع ‏‏فى ‏محل‏ ‏زهور .
البنى آدم مسئول عن اللى بيجرا له مهما كانت ظروفه.
نفسى مفتوحة للأكل فعلا ‏.
البيوت‏ ‏الجديدة‏ ‏إللى ‏أود‏ ‏النوم‏ ‏فيها‏ ‏بعيدة‏ ‏ومنفصلة‏ ‏أحسن‏ ‏من‏ ‏البيوت‏ ‏القديمة‏ ‏إللى ‏كلها‏ ‏بتفتح‏ ‏على ‏الصالة‏.
ربنا‏ ‏غفور‏ ‏رحيم‏ ‏مهما‏ ‏الواحد‏ ‏عمل‏.
مش‏ ‏عيب‏ ‏إن‏ ‏الواحد‏ ‏يتفرج‏ ‏على ‏أفلام‏ ‏جنسية.
أخاف‏ ‏أبص‏ ‏من‏ ‏فوق‏ ‏أى ‏سطح‏ ‏أو‏ ‏مكان‏ ‏عالى ‏أحسن‏ ‏أوقع‏ ‏نفسي‏.‏
أعتقد‏ ‏إن‏ ‏العادة‏ ‏السرية‏ ‏بتسبب‏ ‏السل‏ ‏والسرطان‏ ‏وضعف‏ ‏البصر‏ ‏.
الرجل‏ ‏اللى هوا راجل، هو اللى مايهتمش برأى الناس فيه، أو فى الل بيعمله.
أحب‏ ‏الفلوس‏ ‏حتى ‏لو‏ ‏مش‏ ‏عارف‏ ‏حاعمل‏ ‏بيها‏ ‏إيه‏.‏
‏ ‏ما‏ ‏فيش‏ ‏حاجة‏ ‏إسمها‏ ‏ديمقراطية‏ بحق وحقيق، كله نصب فى نصب .‏
‏ ‏ياريتنى ‏أرجع‏ ‏عيل‏ ‏تاني‏.‏
أفلام‏ ‏الجنس‏ ‏دى ‏ممكن تعتبر ‏ ‏جريمة‏ ‏فعلا، لكن ساعات بتثقف‏.‏
أحب‏ ‏أعيش‏ ‏مهما‏ ‏كانت‏ ‏الظروف‏.‏
ما‏ ‏يصحش‏ ‏نقول‏ ‏للصغيرين‏ ‏إن‏ ‏ربنا‏ ‏غفور‏ ‏رحيم‏ ‏قوى ‏كده‏ ‏أحسن‏ ‏يستسهلوا‏ ‏الغلط‏.‏
اللى ‏مش‏ ‏على ‏دينى ‏حايروح‏ ‏النار‏ مافيش كلام .
لولا‏ ‏الصحافة‏ ‏ما‏ ‏كانش‏ ‏حد‏ ‏عرف‏ ‏الحقيقة‏ ‏أبدا.
أحب أتمشـَّـى لوحدى فى أى حتة فاضية.
كتير‏ ‏يجينى ‏صداع‏ ‏من‏ ‏غير‏ ‏سبب.
الواحد‏ ‏بصراحة‏ ‏قرف قوى ‏ ‏من‏ ‏الدنيا دى.
اللى ‏تخاف‏ ‏منه‏ ‏ما‏ ‏يجيش‏ ‏أحسن‏ ‏منه‏.‏
الحرامى ‏الشاطر‏ ‏يستاهل‏ ‏الإعجاب عشان مهارته.
ما‏ ‏فيش‏ ‏فايدة‏ ‏فى ‏أى ‏حاجة.
أحب‏ ‏الست‏ ‏السمرا‏ ‏الحمشة‏ ‏إللى ‏تشخط‏ ‏وتنطر.
قولة‏ ‏ماليش دعوة ‏أحسن‏ ‏رد‏ ‏فى ‏كل‏ ‏الأوقات.
ما‏ ‏يصحش‏ ‏تقول‏ ‏أى ‏حاجة‏، ‏حتى ‏إسمك‏، ‏إلا‏ ‏لما‏ ‏تقول‏ ‏قبلها‏ أو بعدها ‏إن‏ ‏شاء‏ ‏الله‏.‏
من‏ ‏حق‏ ‏الأب‏ ‏يضرب‏ ‏إبنه عشان‏ يأدبه ‏من‏ ‏غير‏ ‏ما‏ ‏يقول له هوا بيضربه ليه .
بطنى ‏بتوجعنى ‏عالعمال‏ ‏عالبطال.
مش‏ ‏عارف‏ ‏مالى كده .
كتير‏ ‏أحس‏ ‏إنى ‏أنا‏ ‏مش‏ ‏أنا.
باشوف‏ ‏الحاجة‏ ‏اتنين‏ ‏وتلاتة‏ ‏واربعة‏ ‏حسب‏ ‏التساهيل‏.‏
إيه‏ ‏يعنى ‏لما‏ ‏اتأخرعن‏ ‏ميعادى ‏نص‏ ‏ساعة‏ ‏ولا‏ ‏ساعة‏، ‏هيه‏ ‏الدنيا‏ ‏طارت؟!.
ساعات‏ ‏آكل‏ ‏كتير‏ ‏لحد‏ ‏ما‏ ‏بطنى ‏توجعني‏، ‏وساعات‏ ‏ما‏ ‏بْقاش‏ ‏عايز‏ ‏أشوف‏ ‏الأكل.
الربيع‏ ‏أحسن‏ ‏فصول‏ ‏السنة.
عندى ‏حساسية‏ ‏لحاجات‏ ‏كتير‏ ‏قوي.
أما‏ ‏أدخل‏ ‏على ‏اتنين‏ ‏بيتكلموا‏ ‏ويسكتوا‏ ‏أفتكر ‏ ‏إنهم‏ ‏كانو‏ ‏بيتكلموا‏ ‏علىّ ‏فى ‏الغالب.
باسمع‏ ‏أصوات‏ ‏ماعرفشى ‏مصدرها‏ ‏وانا‏ ‏قاعد‏ ‏وحدي.
مش‏ ‏عارف‏ ‏الواحد‏ ‏عايش‏ ‏ليه.
أحب‏ ‏أسمع‏ ‏صوت‏ ‏العصافير‏ ‏الصبح.
نفسى ‏أنام‏ ‏ما‏ ‏قومشي.
طبعا‏ ‏الدنيا‏ ‏تستاهل‏ ونص ‏إن احنا ‏ ‏نعيشها .
الناس‏ ‏اللى ‏دايما‏ ‏بتشتكى ‏عندها‏ ‏حق.
ما‏ ‏قدرشى ‏أستنى ‏أى ‏مـُـدّة، الانتظار بيجننى.
خايف‏ ‏كده‏ ‏على ‏طول‏ ‏مش‏ ‏عارف‏ ‏ليه.
لما‏ ‏كنت‏ ‏صغير‏ ‏كنت‏ ‏أتصور‏ ‏إن‏ ‏أبويا‏ ‏ده‏ ‏أحسن‏ ‏واحد‏ ‏فى ‏العالم‏.‏
مهما‏ ‏ضاقت‏ ‏حاتُفرج‏، ‏ماعرفشى ‏إزاى.
أول‏ ‏حاجة‏ ‏أقراها‏ ‏فى ‏الجرنان‏ ‏هى ‏أخبار‏ ‏الرياضة.
الشتا‏ ‏أحسن‏ ‏من‏ ‏الصيف.
أقدر‏ ‏أتعلم‏ ‏حاجة‏ ‏جديدة‏ ( ‏زى ‏العوم‏ ‏أو‏ ‏الآلة‏ ‏الكاتبة أو الكمبيوتر) ‏مهما‏ ‏كبرت‏ ‏فى ‏السن‏.‏
اللى ‏يتكسف‏ ‏يطالب بحقه، ‏ ‏مش‏ ‏من‏ ‏حقه‏ ‏يشتكى ‏إن‏ ‏حد‏ ‏كل عليه ‏ ‏حقه.
الحكومة‏ ‏هى ‏المسئولة‏ ‏عن‏ ‏كل‏ ‏حاجة.
عندى ‏حاجات‏ ‏كتير‏ ‏ماقولشى ‏لمخلوق‏ ‏عليها.
الجنة‏ ‏من‏ ‏غير‏ ‏ناس‏ ‏مالهاش‏ ‏لازمة.
ساعات‏ ‏أفكر‏ ‏إنى ‏أقدر‏ ‏أغير‏ ‏نظام‏ ‏العالم.
جسمى ‏مكسر‏ ‏على ‏طول.
باخاف‏ ‏من‏ ‏الأماكن‏ ‏الضيقة.
لازم‏ ‏الواحد‏ ‏يشك‏ ‏فى ‏كل‏ ‏حاجة‏ ‏عشان‏ ‏ما‏ ‏حدش‏ ‏يضحك‏ ‏عليه.
أناعندى ‏رسالة‏ ‏لو‏ ‏قدرت أوصلها لأصحابها ‏ ‏حاتغير‏ ‏وجه‏ ‏التاريخ.
أقدر‏ ‏أعرف‏ ‏إللى ‏فى ‏مخ‏ ‏اللى ‏قصادى ‏من‏ ‏غير‏ ‏ما‏ ‏يتكلم.
كل‏ ‏الناس‏ ‏إللى ‏بتشتغل‏ ‏فى ‏السياسة‏ ‏بتضيع‏ ‏وقتها.
ساعات‏ ‏أحس‏ ‏إنى ‏عايز‏ ‏أصرخ‏ ‏من‏ ‏غير‏ ‏سبب.
ساعات‏ ‏يتهيأ‏ ‏لى ‏إنى ‏أقدر‏ ‏أوقف‏ ‏عربية‏ ‏ماشية‏ ‏بسرعة‏ ‏لو‏ ‏مسكتها‏ ‏من‏ ‏الإكصدام‏ ‏الوراني.
كل‏ ‏الذمم‏ ‏لها‏ ‏تمن‏، ‏والشريف‏ ‏هو‏ ‏اللى ‏لسه‏ ‏ماحدش‏ ‏عرض‏ ‏عليه‏ ‏التمن‏ ‏المناسب‏.‏
كل‏ ‏حاجة‏ ‏زى ‏بعضها.
الناس‏ ‏اللى ‏بتقفل‏ ‏على ‏نفسها وتنسحب‏ ‏عندها‏ ‏حق‏ ‏عشان‏ ‏تتجنب‏ ‏شر‏ ‏التانيين.
الناس‏ ‏بتحسدنى، ‏مش‏ ‏عارف‏ ‏على ‏إيه.
باترعب‏ ‏لما‏ ‏حد‏ ‏يطلب‏ ‏منى ‏أتكلم‏ ‏فى ‏اجتماع‏ ‏عام.
أفضل‏ ‏أتفرج‏ ‏على ‏الأفلام‏ ‏فى ‏التليفزيون،‏ ‏مش‏ ‏فى ‏السينما‏، ‏حتى ‏لو‏ ‏معايا‏ ‏فلوس.
من‏ ‏حق‏ ‏ممثل‏ ‏المسرح‏ ‏إنه‏ ‏يخرج‏ ‏عن‏ ‏النص‏ ‏حتى ‏لو‏ ‏كان‏ ‏بذئ‏ ‏وجارح‏ ‏مادام‏ ‏بيضحك.
إمتى ‏الواحد‏ ‏يخلص‏ ‏من الحياة دى بقي.
باغسل‏ ‏إيدىّ ‏كتير‏ ‏جدا‏، ‏وما‏ ‏اعرفشى ‏إن‏ ‏كانت‏ ‏نضفت‏ ‏ولا‏ ‏لأه.
عندى ‏ضعف‏ ‏تركيز‏ ‏فى ‏كل‏ ‏حاجة.
مشغول‏ ‏مشغول‏ ‏مشغول،‏ ‏مش‏ ‏عارف‏ ‏فى ‏إيه.
أكيد‏ ‏العالم‏ ‏ده‏ ‏نهايته‏ ‏سودة.
لو‏ ‏عايز‏ ‏الناس‏ ‏تحبك‏ ‏ماتزعـّـلش‏ ‏حد‏ ‏خالص.
كل‏ ‏التعابين‏ ‏سامة‏ من غير استثناء.
لو‏ ‏عينونى ‏ ‏رئيس‏ ‏وزراء‏ ‏كنت أحل ‏ ‏كل‏ ‏المشاكل‏ ‏فى ‏تلات شهور.
أحب‏ ‏أسرح‏ ‏وأحقق‏ ‏كل‏ ‏اللى ‏انا‏ ‏عايزه‏، ‏ونفسى ‏فيه‏ ‏وانا‏ ‏قاعد.
ممكن‏ ‏نحقق‏ ‏العدل فعلا ‏ ‏لو‏ ‏إن‏ ‏الناس‏ ‏تحب‏ ‏بعضها.
الحب‏ ‏ده‏ ‏كلام‏ ‏فارغ، ‏ ‏الناس‏ ‏بتضحك‏ ‏بيه‏ ‏على ‏بعضها.
أهم‏ ‏حاجة‏ ‏فى ‏الدنيا‏ ‏إنك‏ ‏تمشّى ‏حالك.
إوعى ‏تفكر‏ ‏إن‏ ‏حد‏ ‏بيساعد‏ ‏حد‏ ‏لله‏ ‏فى ‏لله.
أنا‏ ‏رأيى ‏إن‏ ‏اللى ممشى الدنيا دى ‏”سر”، لا حد عارفه، ولا باين حد حا يعرفه.
إللى ‏بيصدق ‏ ‏أخبار‏ ‏الإذاعات الأجنبية عن أخبار إذاعات بلده ‏ ‏يبقى ‏مش وطنى.
قرايةالجرايد‏ ‏مالهاش‏ ‏لازمة‏ ‏من‏ ‏أصله.
با حس إن جسمى ‏مكسر‏ ‏على ‏طول‏ ‏حتى ‏وانا‏ ‏قايم‏ ‏من‏ ‏النوم.
بعد ‏الأجازة‏ ‏الاعتيادية، حتى يوم الجمعة، أرجع الشغل ‏زى ‏ما‏ ‏اكون ما خدتش أجازة.
ما‏ ‏احبش‏ ‏السفر‏ ‏خالص.
أحب‏ ‏أتفرج‏ ‏على ‏شفايف‏ ‏الناس‏ ‏وهيه‏ ‏بتتحرك‏ ‏أثناء‏ ‏ما‏ ‏يكونوا‏ ‏بيتكلموا‏ ‏جد.
أحب‏ ‏أبص‏ ‏من‏ ‏خرم‏ ‏الباب.
لما‏ ‏تحصل‏ ‏مصيبة‏ ‏أبقى ‏عايزألطم‏ ‏على ‏خدى ‏على ‏شرط‏ ‏ما‏ ‏حدش‏ ‏يشوفني.
بصراحة‏: ‏أى ‏حاجة‏ ‏زى ‏أى ‏حاجة.
ياريتنى ‏ماتولدت‏ ‏من‏ ‏أصله.
كل‏ ‏ما‏ ‏شوف‏ ‏واحد‏ ‏راجل‏ ‏عجوز‏ ‏أقول‏ ‏إنه‏ ‏غبى ‏إنه‏ ‏عاش‏ ‏لحد‏ ‏السن‏ ‏دي‏.‏
أحب‏ ‏الناس‏ ‏واكره‏ ‏طبعهم.
ما احبش‏ ‏حد‏ ‏يبص لى ‏وانا‏ ‏مش‏ ‏واخد‏ ‏بالي.
أحب‏ ‏أبص‏ ‏لكعب‏ ‏أى ‏واحدة‏ ‏ست‏ ‏أشوفها، أو يا ريت سمانة رجلها.
أتصور‏ ‏ساعات‏ ‏حاجات‏ ‏مااقدرشى ‏أحكيها‏ ‏لحد.
ساعات‏ ‏أحس‏ ‏إنى ‏حاتبعزق كل حتة فى ناحية.
بتقابلنى ‏ ‏حاجات ‏ ‏مالهاش‏ ‏معني‏، ‏ومع‏ ‏ذلك‏ ‏أبقى ‏فرحان‏ ‏بيها.
لو‏ ‏كل‏ ‏اللى ‏فى ‏مخى ‏اتحقق‏ ‏يبقى ‏أحسن‏ ‏أموت.
أنا‏ ‏نفسى ‏أشوف‏ ‏غابات‏ ‏أفريقيا.
باكره‏ ‏القطط.
ساعة‏ لما‏ ا‏قوم‏ ‏من‏ ‏النوم‏ ‏أبقى ‏مش‏ ‏طايق‏ ‏نفسي‏، ‏حتى ‏لو‏ ‏نايم‏ ‏مبسوط.
ساعات‏ ‏أحب‏ ‏أصرخ‏ ‏على ‏شرط‏ ‏ما‏ ‏حدش‏ ‏يسمعني.
ساعات‏ ‏أحس‏ ‏إن‏ ‏عايز‏ ‏أعيط‏ ‏على ‏صدر‏ ‏حد‏، ‏كبير‏ ‏بس‏ ‏ما‏ ‏يقولشى لحد.‏
كتير أحس‏ ‏جوايا‏ ‏بنهنهة‏ ‏مكتومة.
ساعات‏ ‏أحس‏ ‏إن‏ ‏حد‏ ‏يقدر‏ ‏يقرا‏ ‏أفكاري.
أنا ‏متأكد‏ ‏إن‏ ‏فيه‏ ‏قوة‏ ‏خفية‏ – ‏غير‏ ‏ربنا‏- ‏بتحركني.
أحسن‏ ‏حاجة‏ ‏الواحد‏ ‏مايبصش‏ ‏للى ‏فى ‏إيد‏ ‏غيره.
نفسى ‏أسافر‏ ‏بعيد‏ ‏بعيد‏ ‏على ‏شرط‏ ‏ما‏ ‏اعرفشى ‏أنا‏ ‏رايح‏ ‏فين.
باخاف‏ ‏حد‏ ‏يعرف‏ ‏إللى ‏جوايا.
الناس‏ ‏مالهاش‏ ‏شغلة‏ ‏غير‏ ‏إنها‏ ‏تهرى فروة ‏بعضيها.
كتير‏ ‏أشم‏ ‏ريحة‏ ‏مش‏ ‏كويسة‏ ‏والناس‏ ‏اللى ‏حوالى ‏ما‏ ‏يبشموهاش.
طبعا‏ ‏المهدى ‏المنتظر‏ ‏لازم‏ ‏حايظهر.
ما‏ ‏عنديش‏ ‏مانع‏ ‏أطلع‏ ‏رحلة‏ ‏مش‏ ‏عارف‏ ‏تفاصيل‏ ‏عنها‏، ‏لا‏ ‏فين‏ ‏ولا‏ ‏مع‏ ‏مين‏.‏
كتير‏ ‏أحس‏ ‏بتنميل‏ ‏فى ‏إيدىّ ‏أو‏ ‏رجلىّ ‏من‏ ‏غير‏ ‏سبب‏، ‏أو‏ ‏لما‏ ‏أكون‏ ‏متضايق.
نفسى ‏قبل‏ ‏ما‏ ‏اموت‏ ‏أعرف‏ ‏إيه‏ ‏الحكاية.
ساعات‏ ‏أسمع‏ ‏الكلام‏ ‏وابقى ‏عارف‏ ‏إيه‏ ‏هوه‏، ‏بس‏ ‏باكون‏ ‏مش‏ ‏فاهمه‏، ‏مع‏ ‏إنه‏ ‏واضح.
كتير‏ ‏أفكر‏ ‏فى ‏عذاب‏ ‏القبر‏، ‏وأقول‏ ‏جهنم‏ ‏أرحم.
ساعات‏ ‏يجيلى ‏صوت‏ ‏وانا‏ ‏باصلى، ‏أو‏ ‏وانا‏ ‏قاعد‏ ‏كده‏ ‏كويس‏، ‏يقوللى ‏إشتم‏ ‏ربنا.
كتير‏ ‏أشك‏ ‏فى ‏حاجات‏ ‏ما‏ ‏يصحش‏ ‏حد‏ ‏يشك‏ ‏فيها.
ساعات‏ ‏يتهيأ‏ ‏لى ‏إن‏ ‏حد‏ ‏بينده‏ ‏علىّ بإسمى، ‏أبص‏ ‏مالقاش‏ ‏حد‏.‏
ما‏ ‏فيش‏ ‏حد‏ ‏أحسن‏ ‏من حد، على شرط ياخدوا نفس الفرصة.
أحب‏ ‏اصاحب‏ ‏إللى ‏أصغر‏ ‏منى ‏فى ‏السن‏ ‏بكتير.
أظن‏ ‏إن‏ ‏معظم‏ ‏الناس‏ ‏عايشة‏ ‏كده‏ ‏والسلام.
أنا‏ ‏نفسى ‏كنت‏ ‏اتولد‏ ‏فى ‏بلد ‏ ‏تانية.
ياريت‏ ‏تكون فكرة ‏ ‏تناسخ‏ ‏الأرواح‏ ‏فكرة‏ ‏صح.
باقول‏ ‏لنفسى ‏كتير‏: ‏أنا‏ ‏عايش‏ ‏ليه.
باخاف‏ ‏أفكرفى ‏اللى ‏باعمله‏ ‏لاحسن‏ ‏أبطل‏ ‏خالص.
باخاف‏ ‏من‏ ‏إنى ‏أمشى ‏لوحدى.
لما‏ ‏أنام‏ ‏أبقى ‏مش‏ ‏عايز‏ ‏أصحى، ‏ولما‏ ‏أصحى ‏أبقى ‏خايف‏ ‏من‏ ‏النوم.
أنا‏ ‏باقول‏ ‏إن‏ ‏مافيش‏ ‏حقيقة‏ ‏فى ‏الدنيا‏ ‏دى ‏خالص.
بيجينى ‏وَشّ‏ ‏فى‏ ‏ودانى ‏كتير.
حاسس‏ ‏إنى ‏قلقان‏ ‏كده‏ ‏على ‏طول ومش على بعضى.
ما‏ ‏أظنش‏ ‏إن‏ ‏حد‏ ‏يقدر يشوفنى ‏زى ‏ماانا‏ ‏عايز.
نفسى ‏الناس‏ ‏تعرف‏ ‏الحقيقة‏، ‏تقوم‏ ‏تستريح.
باخاف‏ ‏من‏ ‏الموت.
ساعات‏ ‏تجينى ‏فكرة‏ ‏خايبة‏ ‏مالهاش‏ ‏لازمة‏ ‏ما‏ ‏قدرشى ‏أتخلص‏ ‏منها.
ساعات‏ ‏كتير‏ ‏أحس‏ ‏إن‏ ‏حد‏ ‏واقف‏ ‏ورايا.
أشك‏ ‏أحيانا‏ ‏إن‏ ‏أبويا‏ ‏مش‏ ‏أبويا‏ ‏مع‏ ‏إنى ‏متأكد‏ ‏إنى ‏غلطان.
باقوم‏ ‏من‏ ‏النوم‏ ‏أبقى ‏عايز‏ ‏أنام‏ ‏تاني.
كل‏ ‏ماافرح‏ ‏أوقف‏ ‏نفسى، ‏وقلبى ‏يتقبض‏ ‏واقول‏ ‏اللهم‏ ‏اجعله‏ ‏خير.
نفسى ‏ولو‏ ‏مرة‏ ‏واحدة‏ ‏أبقى ‏محور “القعدة”‏ ‏كلها.
أحس‏ ‏ساعات‏ ‏إنى ‏أقدر‏ ‏أقرا‏ ‏أفكار‏ ‏غيرى.
فيه‏ ‏جواى ‏أفكار‏ ‏زحمة‏ ‏كتير‏ ‏ما‏ ‏اعرفشى ‏إيه‏ ‏هىّ ‏بالظبط.
مرات‏ ‏أبقى ‏عايز‏ ‏أستخبى ‏فى ‏حتة‏ ‏ظلمة‏ ودفا.
كتير‏ ‏أسأل‏ ‏نفسي‏: ‏طب‏ ‏وانا‏ ‏ذنبى ‏إيه‏ ‏فى ‏دا‏ ‏كله.
الدنيا‏ ‏بحالها‏ ‏كده كلها على بعضها: ما‏ ‏تستاهلشى.
مال‏ ‏الكُنَزِى ‏للنزهي‏، ‏يعنى ‏اللى ‏يحوش‏ ‏حايسيب‏ ‏فلوسه‏ ‏للى ‏ينزه‏ ‏نفسه‏ ‏بيها‏ ‏وهوه‏ ‏حايموت‏ ‏محروم.
أنا‏ ‏ماليش‏ ‏دعوة باللى جارى،!! …. هو انا اللى اتسببت فيه ؟.
بافكر‏ ‏كتير‏ ‏من‏ ‏غير‏ ‏ما‏ ‏اوصل‏ ‏لأى ‏حاجة.
باخاف‏ ‏أقفل‏ ‏دورةالمية‏ ‏عليه‏ ‏بالمفتاح‏ ‏لما‏ ‏تكون‏ ‏الدنيا‏ ‏ضلمة‏ ( ‏وحتى ‏لما‏ ‏ما‏ ‏تكونشى ‏ضلمة‏)‏.
أنا‏ ‏مش‏ ‏عارف‏ ‏مالى.
باقول‏ ‏لنفسى ‏ساعات‏ ‏كتير‏: ‏”وده‏ ‏كان‏ ‏ليه‏؟” ‏”وده‏ ‏كان‏ ‏ليه؟”.
ساعات‏ ‏أضبط‏ ‏نفسى ‏وانا‏ ‏شمتان‏ ‏وفرحان‏ ‏فى ‏واحد‏ ‏ضعيف‏ ‏اتكسرت نفسه، ‏أو‏ ‏خابْ‏ ‏قوى.
يصعب‏ ‏علىّ ‏الناس، ‏ ‏بس‏ ‏ما‏ ‏اقدرشى ‏أساعدهم المساعدة اللى هىّ.
كتير‏ ‏أقول‏ ‏يارب‏ ‏إنت‏ ‏حر، لك فى ذلك حِكَمْ،‏ ‏بس‏ ‏يعنى ‏المظاليم‏ ‏كتير! .
كتير‏ ‏أحس‏ ‏بإيدى ‏بتتحرك‏ ‏لوحدها‏ ‏من‏ ‏غير‏ ‏ما انا‏ ‏اللى ‏أكون‏ ‏باحركها.
باقول‏ ‏فى ‏نفسى ‏: يعنى ‏يجرى ‏إيه‏ ‏لو‏ ‏كان‏ ‏الناس‏ ‏كلهم ‏كويسين‏.‏
أنا‏ ‏رأيى ‏إن‏ ‏اللى ‏يغلط‏ ‏لازم‏ ‏ياخد‏ ‏فوق‏ ‏دماغه.
ساعات‏ ‏أحس‏ ‏إن‏ ‏الكلام‏ ‏داخل‏ ‏فى ‏مخى ‏بالعافية.
ما‏ ‏عنتش‏ ‏باقدر‏ ‏أفرح، ‏ ‏ولا‏ ‏حتى ‏أزعل‏ ‏زى ‏زمان.
باكره‏ ‏كل‏ ‏حاجة‏ ‏حتى ‏نفسي.
أنا‏ ‏مش‏ ‏غلطان‏ ‏هم‏ ‏اللى ‏دايما‏ ‏بيجيبو الغلط علىّ. ‏
أنا‏ ‏اقدر أصلّح الكون لو ادونى كل الإمكانيات اللى انا عايزها.
كل‏ ‏ما‏ ‏تجينى ‏فكرة‏ جديدة ‏ألاقى ‏حد‏ ‏سبقنى ‏وكتبها،‏ ‏أو‏ ‏عملها‏ ‏رواية‏ ‏أو‏ ‏اختراع.
أحب‏ ‏أنام‏ ‏فى ‏نفس‏ ‏المكان‏ ‏إللى ‏اتعودت‏ ‏أنام‏ ‏فيه.
لما‏ ‏اسافر‏: ‏يجينى ‏إمساك‏ ‏لمدة‏ ‏يومين‏ ‏تلاتة.
باخاف‏ ‏على ‏صحتى ‏قوى.
باروح‏ ‏للدكاترة‏ ‏كتير‏، ‏مع‏ ‏إنى ‏ما‏ ‏باثقشى ‏فى ‏كلامهم‏ ‏قوي.
حاسس‏ ‏إنى ‏حاموت‏ ‏بالسرطان.
ما‏ ‏يطلع‏ ‏الطبع‏ ‏إلا‏ ‏إذا‏ ‏طلعت‏ ‏الروح.
وانا‏ ‏باتكلم‏ ‏أحس‏ ‏إن‏ ‏الكلام‏ ‏اتقطع‏ ‏أو‏ ‏هرب‏ ‏منى ‏ما‏ ‏اعرفشى ‏أكمل‏ ‏الجملة.
إيدى ‏بتقف‏ ‏أثناء‏ ‏الحركة‏ ‏من‏ ‏غير‏ ‏ما‏ ‏اقصد.
أقرر‏ ‏حاجات‏ ‏كتير‏ ‏وما‏ ‏اعملش‏ ‏منها‏ ‏أى ‏حاجة.
أحلامى ‏مزعجة‏ ‏لكن‏ ‏أحسن‏ ‏من‏ ‏مافيش.
ساعات‏ ‏كتير‏ أحلم ‏نفس‏ ‏الحلم‏، يقعد‏ ‏يتكرر‏ ‏هوه‏ ‏هوه‏ ‏بنفس‏ ‏المشاعر.
بصراحة‏ ‏كفاية‏ ‏كده، أنا خلاص زهقت …
كنت‏ ‏وانا‏ ‏صغير‏ ‏أسرق‏ ‏حاجات‏ ‏صغيرة‏ ‏وماقولشى ‏لحد.
أنا‏ ‏محروم‏ ‏من‏ ‏حاجات‏ ‏كتير.
حظى ‏أحسن‏ ‏من‏ ‏غيرى ‏ألف‏ ‏مرة.
بافكر‏ ‏فى ‏الجنس‏ ‏بشكل‏ ‏ماقدرشى ‏أقول‏ ‏لحد‏ ‏عليه.
ربنا‏ ‏خلق‏ ‏الناس‏ ‏مش‏ ‏زى ‏بعضها‏ ‏عشان‏ ‏تاخد‏ ‏وتدى ‏مع‏ ‏بعض.
الواحد‏ ‏نفسه‏ ‏يهجّ من هنا، يروح فى أى حتة تانية.
باقول‏ ‏لنفسى ‏كتير‏: ‏طب‏ ‏وبعدين؟! طب وآخرتها؟!.
باسمع‏ ‏أصوات‏ ‏بتوشوشنى ‏.
إللى ‏ما‏ ‏لوش ‏فى ‏السياسة‏ ‏يبقى ‏يستاهل اللى بتعمله فيه السياسة.
باعرف‏ ‏حاجات‏ ‏كتير‏ ‏من‏ ‏اللى ‏مكتوبة‏ ‏فى ‏الكتب‏ ‏من‏ ‏غير‏ ‏ما‏ ‏قراها.
كل‏ ‏ما‏ ‏اخلص‏ ‏حاجة‏ ‏واقول‏ ‏دى ‏آخر‏ ‏حاجة‏ ‏ألاقى ‏نفسى ‏بابتدى ‏من‏ ‏جديد.
كتير‏ ‏أقول‏ ‏لنفسى هوا امتى حا بطل بقى .
الواحد‏ ‏نفسه‏ ‏يبتدى ‏من‏ ‏جديد‏ ‏باسم‏ ‏تانى ‏وأب‏ ‏تانى ‏وناس‏ ‏تانية‏ ‏وحتى ‏دين‏ ‏تانى ‏أستغفر‏ ‏الله‏ ‏العظيم‏.‏
أنا‏ ‏أقدر‏ ‏أعرف‏ ‏فى ‏كل‏ ‏حاجة‏ ‏أكتر‏ ‏من‏ ‏المختص‏ ‏فيها‏.‏
مستعد‏ ‏أروح‏ ‏آخر‏ ‏الدنيا‏ ‏عشان‏ ‏أشوف‏ ‏إيه‏ ‏الحكاية‏ ‏واستريح.
لما‏ ‏الواحد‏ (‏إللى ‏هوه‏ ‏انا‏) ‏يكون‏ ‏لوحده‏ ‏يبقى ‏عايز‏ ‏الناس‏، ‏ولما‏ ‏يكون‏ ‏مع‏ ‏الناس‏ ‏يبقى ‏نفسه‏ ‏يكون‏ ‏لوحده‏.‏
نفسى ‏أعرف‏ ‏إيه‏ ‏الحكاية بالظبط.
ساعات‏ ‏الشيطان‏ ‏بيضحك‏ ‏علىّ ‏واقول‏ ‏هوه‏ ‏ربنا‏ ‏قاعد‏ ‏يتفرج‏ ‏علينا‏ ‏كده‏ ‏ليه؟‏ ‏.
أحسن‏ ‏حاجة‏ ‏فى ‏الدنيا‏ ‏دى إن‏ ‏الواحد‏ ‏ما‏ ‏يعرفشى ‏حاجة.
كل‏ ‏السياسيين‏ ‏نصابين.
كل‏ ‏الناس‏، آه كل الناس، ‏ ‏عايشة‏ ‏كده‏ ‏والسلام.
لو‏ ‏خدت فرصتى بحق وحقيق فى أى شغـلانة، ‏ ‏حاعملها ‏ ‏أحسن‏ ‏من‏ ‏أى ‏واحد‏ ‏بيشتغلها.
الوقت‏ ‏بيمر‏ ‏ببطء‏ ‏بشكل‏ !!!!‏
أنا‏ ‏رأيى ‏إن‏ ‏الناس‏ ‏مش‏ ‏زى ‏ما‏ ‏هما ‏ ‏فاكرين‏ ‏خالص‏.‏
كل‏ ‏واحد‏ ‏ما‏ ‏يرضيهوش‏ ‏إلا‏ ‏إللى ‏فى ‏مخه‏، ‏وانا‏ ‏أولهم.
أحب‏ ‏الدكاترة‏ ‏يطمنونى ‏كتير‏ على صحتى، ‏ولو‏ ‏إنى ‏ما‏ ‏باصدقهمش‏ ‏قوى.
ياريت‏ ‏الناس‏ ‏تحب‏ ‏بعضها‏ ‏زى ‏انا‏ ‏ما‏ ‏باحبهم.
أصعب‏ ‏حاجة‏ ‏عليّا ‏إنى ‏أعمل‏ ‏نفسى ‏فاهم، ‏ ‏وانا‏ ‏مش‏ ‏فاهم.
باتكسف‏ ‏من‏ ‏حاجات‏ ‏أنا‏ ‏ما‏ ‏عملتهاش.
أحس‏ ‏دايما‏ ‏إنى ‏مسئول‏ ‏عالعمال‏ ‏عالبطال.
ما هو أنا لوحدى مش حا غيّر حاجة، يبقى أحسن حاجة، ما اعملشى أى حاجة.
باتغاظ جدا لما حد أصغر منى، يعمل حاجة أحسن منى.
على ‏لسانى ‏دايما‏ ‏حكاية‏ ‏وإيه‏ ‏يعنى ‏، وإيه يعنى، مع إنى مش دايما باقصدها‏.‏
باحس‏ ‏كتير‏ ‏إنى ‏حافقد‏ ‏السيطرة‏ ‏على ‏نفسي.
باحس‏ ‏إن‏ ‏مش‏ ‏حاقدر‏ ‏أكمل‏ ‏كده.
ساعات‏ ‏أتلفت‏ ‏حوالى ‏من‏ ‏غير‏ ‏داعي‏.‏
باحس‏ ‏إن‏ ‏ذنوبى ‏لا‏ ‏يمكن‏ ‏ ‏تغتفر.
لو‏ ‏الحكاية‏ ‏بإيدى ‏ما‏ ‏خليش‏ ‏حد‏ ‏عايز‏ ‏حاجة.
كل‏ ‏ما‏ ‏احصُل‏ ‏على ‏حاجة‏ ‏، ألاقينى ما كنتش عايزها قوى.
كل‏ ‏ما‏ ‏ربنا‏ ‏يدينى، ‏أقول‏ “‏وإيه‏ ‏يعني”.
أكيد‏ ‏التلوث‏ ‏ده‏ ‏حايجيب‏ ‏داغ‏ ‏العالم‏ ‏قوام‏ ‏قوام.
ما‏ ‏فيش‏ ‏حل‏ ‏للمجاعة‏ ‏اللى ‏بتهدد‏ ‏العالم‏ ‏إلا‏ ‏إن‏ ‏الناس‏ ‏يقل عددهم عن كده، ‏ولو ‏بحرب‏ ‏ذرية.
ما‏ ‏أظنش‏ ‏فيه‏ ‏حد‏ ‏فاهم‏ ‏حد،‏ ‏واهو‏ ‏كله‏ ‏بيضحك‏ ‏على ‏كله.
بادعى ‏ربنا‏ ‏ليل‏ ‏نهار‏ ‏يقرّب‏ ‏البعيد.
كل‏ ‏ماقول‏ ‏خلاص‏ ‏قرّبت‏ ‏أهه‏، ‏ألاقى ‏نفسى ‏بعيد‏ ‏خالص‏ ‏.
باخاف‏ ‏لحسن‏ ‏الحكاية‏ ‏تطلع‏ ‏جد‏ ‏فى ‏الآخر، واروح فى ستين داهية.
أحب‏ ‏أشوف‏ ‏الوردة‏ ‏على ‏شجرتها‏ ‏مش‏ ‏مقطوعة‏ ‏ومحطوطة‏ ‏فى ‏زهرية.
بعض‏ ‏الكلاب‏ ‏مخلصين أكتر ‏ ‏من‏ ‏كتير من‏ ‏البنى ‏آدمين.
كل‏ ‏واحد‏ ‏مسئول‏ ‏عن‏ ‏اللى ‏هوه‏ ‏فيه‏، ‏حتى ‏لو‏ ‏إيه‏ ‏؟
الغش‏ ‏اليومين‏ ‏دول‏ ‏حلال‏.‏
أنا‏ ‏رأيى ‏إن‏ ‏الناس‏ ‏مالهاش‏ ‏ذنب فى اللى جارى.
لما‏ ‏المسائل‏ ‏تتلخبط‏ ‏خالص‏ ‏يبقى ‏حلها‏ ‏قريب.
مافيش‏ ‏حد‏ ‏مسئول‏ ‏عن‏ ‏اللى ‏هوه‏ ‏فيه‏، ‏الظروف‏ ‏هيه‏ ‏إللى ‏خلته‏ ‏كده.
اللى ‏بيغش‏ ‏بيغش‏ ‏نفسه .
الناس‏ ‏ما بيسيبوش حد ف حاله.
أنا‏ ‏حاسس‏ ‏إنى ‏حاعمل اللى فى مخى، ‏حتى ‏لو‏ ‏الناس‏ ‏كلها‏ ‏ضدي.
بتجينى ‏أدوار‏ ‏برد‏ ‏ورا‏ ‏بعض‏ ‏طول‏ ‏الشتا‏، ‏وحتى ‏فى ‏الصيف.
أفضل‏ ‏آخد‏ ‏العلاج‏- ‏أى ‏علاج‏- ‏على ‏شكل‏ ‏حقن‏ ‏مش‏ ‏أقراص‏ .‏
يتهيألى ‏ ‏كفاية‏ ‏كدا، أنا ما عنتش قادر.
باقول‏ ‏لنفسى ‏كتير‏ ‏يا‏ ‏ترى ‏الناس‏ ‏كده‏ ‏زيى ‏ولا‏ ‏انا‏ ‏بس‏ ‏اللى ‏كده‏.‏
أنا‏ ‏علاقتى ‏بربنا‏ ‏علاقة‏ ‏خاصة‏ ‏ما‏ ‏حدش‏ ‏يعرفها‏ ‏إلا‏ ‏هوه‏ ‏.
أنا‏ ‏حاسس‏ ‏إن‏ ‏ربنا‏ ‏حايغفرلى ‏مهما‏ ‏كانت‏ ‏ذنوبي.
عينىّ ‏بتزغـلل كتير قوى.
أحب‏ ‏أشوف‏ ‏الشمس‏ ‏وهىّ‏ ‏بتغرب.
الناس‏ ‏ما‏ ‏بتسيبش‏ ‏حد‏ ‏فى ‏حاله.
ماحدش‏ ‏قانع‏ ‏برزقه، ‏ ‏حتى ‏لو‏ ‏كان‏ ‏مليونير.
إللى ‏يعرض‏ ‏نفسه‏ ‏للإهانة‏ ‏ما‏ ‏يزعلشى ‏لما‏ ‏ياخدوه‏ ‏على ‏قفاه.
أى ‏واحد‏ ‏لو‏ ‏قدر‏ ‏يفترى، حا يفترى .‏
باحلم‏ ‏كتير‏ ‏إنى ‏باطير‏ ‏وانا‏ ‏نايم.
ساعات‏ ‏يجينى ‏أوقات‏ ‏ما‏ ‏اقدرشى ‏أحرك‏ ‏جسمى ‏رغم‏ ‏إنى‏ ‏أكون‏ ‏صاحى ‏ ‏وفايق‏ ‏خالص.
حصل‏ ‏مرات‏ ‏إنى ‏لاقيتنى ‏فى ‏حتت‏ ‏ما‏ ‏كنتش‏ ‏أقصد‏ ‏أروحها.
أحس‏ ‏كتير‏ ‏إنى ‏أبقى ‏عايز‏ ‏أروح‏ ‏حتة‏، ‏وأول‏ ‏ما‏ ‏أوصل‏ ‏لها‏ ‏أحس‏ ‏إنى ‏عايز‏ ‏أسيبها‏.
عشان‏ ‏أعرف‏ ‏أركز‏ ‏لازم‏ ‏أنسى ‏أنا‏ ‏باعمل‏ ‏إيه.
كل‏ ‏ما‏ ‏تجينى ‏فكرة‏ ‏كويسة‏ ‏فى ‏مخى ‏أقول‏ ‏بكره، ‏بكره‏، ‏مش‏ ‏عارف‏ ‏بكرة ‏دا‏ ‏حاييجى ‏إمتي.
ساعات‏ ‏أحس‏ ‏إنى ‏خايف‏ ‏خوف‏ ‏شديد‏ ‏وقلبى ‏حايقف‏ ‏من‏ ‏غير‏ ‏أى ‏سبب.
ما‏ ‏احبش‏ ‏الزحمة‏ ‏خالص.
لولا‏ ‏الملامة‏ ‏الناس‏ ‏كانت‏ ‏تمشى ‏ملط‏ ‏فى ‏الشارع .
الود‏ ‏ودى ‏أبتدى ‏من‏ ‏أول‏ ‏وجديد خالص.
ما‏ ‏عنديش‏ ‏مانع‏ ‏ألف‏ ‏العالم‏ ‏على ‏موتوسيكل‏ ‏حتى ‏لوما‏ ‏باعرفشى ‏أسوقه‏.
أحب‏ ‏أعرف‏ ‏عدد‏ ‏السلالم‏ ‏بتاع‏ ‏أى ‏مكان‏ ‏أطلعه‏ ‏أكتر‏ ‏من‏ ‏خمس‏ ‏ست‏ ‏مرات تقريبا.
أنا‏ ‏مش‏ ‏فاهم‏ ‏إللى ‏بيجمع‏ ‏طوابع‏ ‏البريد‏ ‏ده‏، ‏وما‏ ‏بيتاجرشى ‏فيها‏، ‏حا‏ ‏يعمل‏ ‏بيها‏ ‏إيه.
باكره‏ ‏أقف‏ ‏أستنى ‏دورى ‏فى ‏أى ‏طابور.
باحس‏ ‏إنى ‏باتلخبط‏ ‏قوى ‏لو‏ ‏حد‏ ‏طلب‏ ‏منى ‏حاجتين‏ ‏فى ‏نفس‏ ‏الوقت‏.‏
كتير‏ ‏أحلم‏ ‏إنى ‏راكب‏ ‏بساط‏ ‏الريح‏ ‏ومعايا‏ ‏ناس‏ ‏حلوة‏ ‏ومزيكة‏ ‏وممكن‏ ‏أى ‏حاجة‏ ‏تبسط‏ ‏تحصل‏.‏
الناس‏ ‏ما‏ ‏عندهاش‏ ‏جديد‏، ‏إللى ‏بتقوله‏ ‏بتعيده‏، ‏واللى ‏بتعيده‏ ‏بتزيده.
زمان جدا‏ ‏كان‏ ‏أحسن‏ ‏من‏ ‏دلوقتى جدا.
بصراحة أى ‏حد‏ ‏يمس‏ ‏كرامتى ‏أنا‏ ‏مستعد‏ ‏أقتله‏، بس يا ريت اقدر ‏.
ما‏ ‏فيش‏ ‏حد‏ ‏يسامح‏ ‏وهوه‏ ‏مظلوم ومش قادر يرد الظلم ‏ ‏إلا‏ ‏لو‏ ‏كان‏ ‏ضعيف‏ ‏وعاجز.
أنا‏ ‏ما‏ ‏قدرشى ‏آخد‏ ‏الرأى ‏النهائى ‏فى ‏أى ‏حاجة.
مش‏ ‏فاكر‏ ‏آخر‏ ‏مرة‏ ‏ضحكت‏ ‏من‏ ‏قلبى ‏إمتى.
أنا‏ ‏عمرى ‏ما‏ ‏أذيت‏ ‏حد.
ماتأثرشى ‏لما‏ ‏أشوف‏ ‏عيال‏ ‏بيعذبوا‏ ‏قطة‏ ‏صغيرة‏. ‏خليهم‏ ‏يلعبوا.
أحب‏ ‏أشتغل‏ ‏فلاح‏ ‏بس‏ ‏أفلـّـح‏ ‏بإيدي.
لو‏ ‏عندى ‏فلوس‏ ‏ممكن‏ ‏أحجز‏ ‏حتة‏ ‏أرض‏ ‏فى ‏كوكب‏ ‏المريخ‏ ‏.
يجينى ‏ساعات‏ ‏أحس‏ ‏إن‏ ‏قلبى ‏حايقف‏ ‏وإنى ‏حاموت‏ ‏حالا‏ ‏أهه‏، ‏وابقى ‏حتى ‏مش‏ ‏قادر‏ ‏أصرخ‏ ‏أقول‏ ‏إلحقوني.
ساعات‏ ‏أحس‏ ‏إنى ‏غايب‏ ‏عن‏ ‏وعيى ‏بدرجة‏ ‏ولو‏ ‏بسيطة‏، ‏ومدة‏ ‏ولو‏ ‏قصيرة.
أنا‏ ‏عمرى ‏ما‏ ‏فشلت‏ ‏إلا‏ ‏لأسباب‏ ‏غصبن‏ ‏عني.
ساعات‏ ‏أشعر‏ ‏إنى ‏أحسن‏ ‏واحد‏ ‏فى ‏الدنيا‏ ‏من غير سبب.
بتجيلى ‏خيالات‏ ‏جنسية‏ ‏باحبها‏، ‏بس‏ ‏باتكسف‏ ‏منها.
كل‏ ‏ما‏ ‏أنوى ‏أستغفر‏ ‏واتوب‏، ‏ألاقى ‏نفسى ‏مش‏ ‏جدع.
نفسى ‏أعرف‏ ‏إيه‏ ‏إللى ‏بيطمن‏ ‏الناس‏ ‏الرايقة‏ دول، ‏والدنيا‏ ‏عمالة‏ ‏تضرب‏ ‏تقلب.
أنا‏ ‏مش‏ ‏فاهم‏ ‏أى ‏حاجة.
أنا‏ ‏شاعر‏ ‏إنى ‏عندى ‏تخلف‏ ‏عقلي.
ساعات‏ ‏يتهيأ‏ ‏لى ‏إنى ‏باسمع‏ ‏عيل‏ ‏بينهنه‏ ‏جواي.
‏ ‏كتير‏ ‏فى ‏المواقف‏ ‏الحرجة‏ ‏أحس‏ ‏جوايا ‏إنى ‏مش هاممنى، ‏ ‏أو‏ ‏عايز‏ ‏اعمل‏ ‏عكس‏ ‏المطلوب.
كل‏ ‏ما‏ ‏أفكر‏ ‏فى ‏أى ‏حاجة‏ ‏ما‏ ‏لاقيش‏ ‏حل‏ ‏بصراحة.
أحسن‏ ‏حاجة‏ ‏الواحد‏ ‏يعيش‏ ‏يتفرج‏ ‏على ‏طول.
الدنيا‏ ‏مالهاش‏ ‏طعم.
كتير‏ ‏أحس‏ ‏إن‏ ‏الناس‏ ‏بتجرى ‏ورا‏ ‏بعضها‏ ‏وخلاص.
السعادة‏ ‏إنك‏ ‏تيأس‏ ‏من‏ ‏الحصول‏ ‏عليها.
بابقى ‏ساعات‏ ‏كتير‏ ‏فرحان‏ ‏وزى ‏ما‏ ‏اكون‏ ‏حاطير‏ ‏حتى ‏لو‏ ‏الدنيا‏ ‏منيلة‏ ‏بستين‏ ‏نيلة.
أنا‏ ‏من‏ ‏رأيى ‏إن‏ ‏الأحلام‏ ‏لا‏زم‏ ‏تتفسر‏ ‏وتتفهم‏ ‏ونعمل‏ ‏حسابها‏ ‏تمام التمام.
كل‏ ‏ما‏ ‏اصاحب‏ ‏واحد‏ ‏ألاقيه‏ ‏سابنى ‏وعرف‏ ‏غيري.
كتير‏ ‏أحس‏ ‏إن‏ ‏الأكل‏ ‏طعمه‏ ‏متغير‏ ‏بشكل‏ ‏مزعج.
باشك‏ ‏إن‏ ‏فيه‏ ‏مخابرات‏ ‏بتتبعنى ‏أنا‏ ‏بالذات.
أى ‏واحد‏ ‏ممكن‏ ‏يسمم‏ ‏أى ‏واحد‏ ‏من‏ ‏غير‏ ‏ما‏ ‏يعرف.
الناس‏ ‏الكويسة‏ ‏همّا ‏ناس‏ ‏زمان‏ ‏وبس.
الدنيا‏ ‏مليانة‏ ‏خير‏، ‏بس‏ ‏اللى ‏يبص‏ ‏ويرضي.
الدنيا‏ ‏عايزة‏ ‏المصحْصحْ.
أنا‏ ‏باغير‏ ‏من‏ ‏خيالي.
عايزأبقى ‏أحسن‏ ‏واحد‏ ‏فى ‏كل‏ ‏حاجة.
لو‏ ‏بختى ‏كان‏ ‏زى ‏بخت‏ ‏الناس‏ ‏الأىْ ‏كلام‏، ‏كان‏ ‏زمانى ملـِـك‏.‏
أنا‏ ‏رأيى ‏إن‏ ‏الواحد‏ ‏يخاف‏ ‏من أى حد عشان يسلمْ من المقالب.
أنا‏ ‏واثق‏ ‏إنى ‏فى ‏النهاية‏ ‏حاكـْسب.
كتير‏ ‏أحس‏ ‏إن ‏كل‏ ‏حتة‏ منى ‏فى ‏ناحية.
أنا‏ ‏ماعرفشى ‏أنا‏ ‏باقول‏ ‏إيه لما اغضب أو حد يتحدانى.
أنا‏ ‏واثق‏ ‏من‏ ‏نفسى ‏مية‏ فى ‏المية‏ ‏طول‏ ‏الوقت.
مش‏ ‏عارف‏ ‏الناس‏ ‏إللى ‏حوالىّ ‏كانت‏ ‏حاتعمل‏ ‏إيه‏ ‏من‏ ‏غيري.
باخاف‏ ‏من‏ ‏أى ‏واحد‏ ‏لا‏ ‏بس‏ ‏رسمى (‏لابس‏ ‏شرطة‏ ‏مثلا‏)‏.
باخاف‏ ‏أمشى ‏لوحدي.
بادخل‏ ‏فى ‏النوم‏ ‏بالعافية.
أحب‏ ‏أغنى ‏وانا‏ ‏فى ‏الحمام.
لازم‏ ‏أتأكد‏ ‏من‏ ‏قفل‏ ‏الأبواب‏ ‏والشبابيك‏ ‏قبل‏ ‏ماانام.
كل‏ ‏شيء‏ ‏ممكن يبقى مية مية لو الناس بتقول الصدق وتحب بعضها كفاية.
أنا‏ ‏ماليش‏ ‏ذنب‏ ‏فى ‏أى ‏حاجة.
كل‏ ‏ما‏ ‏احصل‏ ‏على ‏حاجة‏ ‏فاكر إنها‏ ‏حاتسعدنى ‏ألاقينى ‏مش‏ ‏سعيد‏ ‏ولا‏ ‏حاجة‏.‏
باحس‏ ‏بسعادة‏ ‏من‏ ‏أى ‏حاجة‏ ‏لو‏ ‏أتأمل‏ ‏فيها‏ ‏شوية.
كتير‏ ‏ألاقى ‏نفسى ‏وانا‏ ‏باعمل‏ ‏حاجة‏ ‏باحبها‏ ‏باقول‏: طيب ‏لما تخلص دى انا حاعمل إيه بعدها؟ .
حاسس‏ ‏إنى ‏باشغـِـل‏ ‏نفسى ‏فى ‏أى ‏حاجة‏ ‏عشان‏ ‏مافوقشى ‏لنفسي.
أنا‏ ‏عارف‏ ‏أنا‏ ‏بافكر فى ‏إيه‏ ‏بس‏ ‏آجى ‏أحكى ‏إللى ‏عندى ‏ماعرفشي.
أنا‏ ‏حاسس‏ ‏إنه‏ و‏لا‏ واحد ‏ ‏يقدر‏ ‏يحس‏ ‏باللى ‏انا‏ ‏فيه‏ ‏بصحيح.
الدنيا‏ ‏على ‏دى ‏ودي.
ساعة‏ ‏الحظ‏ ‏ما‏ ‏تتعوضشي، بس هىّ فين.
كل‏ ‏ماآجى ‏أفرح‏ ‏أقول‏ ‏اللهم‏ ‏اجعله‏ ‏خير، ‏ ‏واتغم قبل ما اسيب نفسى.
أنا‏ ‏فاهم‏ ‏كل‏ ‏حاجة‏.، بس يا خسارة.
باتلفـّـت‏ ‏حوالىّ ‏كتير‏ ‏.
فيه‏ ‏زحمة‏ ‏فى ‏مخى ‏وزى ‏ما‏ ‏يكونوا‏ ‏بيتكلموا‏ ‏فى ‏موضوعي.
باحس‏ ‏إن‏ ‏حاجات‏ ‏كتير‏ ‏من‏ ‏اللى ‏بتتذاع‏ ‏فى ‏التليفزيون‏ ‏متعلقة‏ ‏بشخصي.
أنا‏ ‏أقدر‏ ‏أوقـّع‏ ‏أى ‏حد‏ ‏فى ‏حبي.
حاسس‏ ‏إن‏ ‏ما‏ ‏فيش‏ ‏حواجز‏ ‏بينى ‏وبين‏ ‏الناس، ‏ ‏وكل‏ ‏إللى ‏فى ‏مخى ‏هم‏ ‏عارفينه‏ ‏بالظبط‏.‏
ما‏ ‏احبش‏ ‏التحديد‏ ‏أحسن‏ ‏أتفقس.
باخاف‏ ‏إنى ‏أفاجأ‏ ‏بسؤال‏ ‏ماعرفش‏ إجابته .
لواشتغلت‏ ‏بحار‏ ‏أحب‏ ‏يبقى ‏لى ‏زوجة‏ (‏أو‏ ‏حبيبة‏) ‏فى ‏كل‏ ‏مينا.
أحب‏ ‏البحر‏ ‏من‏ ‏بعيد‏ ‏لبعيد.
باخاف‏ ‏من‏ ‏الجبال‏، ‏لكن‏ ‏باقف قدامها فى خشوع واحترام.
الأكل‏ ‏‏بُقَى ‏طعمه فى بُقِّى زى ‏نشارة‏ ‏الخشب.
ساعات‏ ‏أشم‏ ‏ريحة‏ ‏الحياة‏ ‏فى ‏نسمة‏ ‏هوا‏ ‏حلوة‏ ‏واحس‏ ‏إن‏ ‏ربنا‏ ‏راضى ‏عنى ‏.
أنا‏ ‏مش‏ ‏حاغلـَب‏ ‏مهما‏ ‏حصل.
أنا‏ ‏أقدر‏ ‏على ‏أى ‏حاجة‏ ‏لو‏ ‏فيه‏ ‏بخت.
لما‏ ‏أكون‏ ‏وحدى ‏بابقى ‏متطمن‏ ‏أكتر.
أحس‏ ‏وسط‏ ‏الناس‏ ‏إن‏ ‏حد‏ ‏حايهبشني.
باقول‏ ‏فى ‏نفسى ‏لو‏ ‏كل‏ ‏الناس‏ ‏زيى ‏كده‏ ‏كانت‏ ‏خربت.
أى حاجة تنفع فى أى حاجة.
أخاف‏ ‏أفكر‏ ‏فى ‏الحاجة‏ ‏إللى ‏أنا‏ ‏باعملها‏ ‏أحسن‏ ‏أبطل‏.‏
كل‏ ‏ما‏ ‏اقرّب ‏أحقق اللى كان نفسى فيه ‏ خالص جدا، ‏ ‏أخاف‏ ‏.
أحسن‏ ‏حاجة‏ ‏إن‏ ‏الواحد‏ ‏يستسلم‏ ‏وخلاص.
أنا‏ ‏مش‏ ‏متأكد‏ ‏من‏ ‏أى ‏حاجة.
باقول‏ ‏لنفسى ‏لو‏ ‏كل‏ ‏الناس‏ ‏زيى ‏كده،‏ ‏ما‏ ‏كانش‏ ‏حد‏ ‏تعب.
أى ‏حاجة‏ ‏زى ‏أى ‏حاجة‏ ‏.
أنا‏ ‏عندى ‏كل‏ ‏الإمكانيات‏ ‏بس‏ ‏ما‏‏فيش‏ ‏روقان‏ ‏البال‏ ‏إللى ‏يخلينى ‏أتمتع‏ ‏بيها.
خايف‏ ‏على ‏طول‏ ‏بس‏ ‏مش‏ ‏عارف‏ ‏خايف‏ ‏من‏ ‏إيه.
أقول‏ ‏لنفسى ‏إمتى ‏بأه‏!! ‏بس‏ ‏مش‏ ‏عارف‏ ‏إمتى ‏إيه؟.
أقرب‏ ‏الناس‏ ‏لى ‏هم‏ ‏اللى ‏بيطنشوا‏ ‏على ‏عيوبي.
أقرب‏ ‏الناس‏ ‏لى ‏هم‏ ‏إللى ‏بيصارحوني.
أنا‏ ‏عايز‏ ‏أعرف‏ ‏الحقيقة‏ ‏بس‏ ‏واحدة‏ ‏واحدة.
أنا‏ ‏أقدر‏ ‏أكتب‏ ‏كتاب‏ ‏لو‏ ‏الناس‏ ‏قرته‏ ‏يتغير‏ ‏العالم‏ ‏ده‏ ‏كله‏ ‏ويعيشوا‏ ‏سعدا.
اللى ‏يقول‏ ‏الحق‏ ‏لكل‏ ‏الناس‏ ‏يستاهل‏ ‏إللى ‏يجراله.
باحس‏ ‏كتير‏ ‏إنى ‏حافقد‏ ‏توازني.
مش‏ ‏قادر أحب‏ ‏أو‏ ‏أكره.
كل‏ ‏ما‏ ‏آجى ‏أعمل‏ ‏حاجة‏ ‏أقف‏ ‏واقول‏ ‏طب‏ ‏وآخرتها‏ ‏إيه.
كل‏ ‏ما‏ ‏افكر‏ ‏فى ‏اللى ‏قلته‏ ‏أندم‏ ‏واخاف‏ ‏لحسن‏ ‏الناس‏ ‏تفهمه‏ ‏غلط.
أنا‏ ‏عنيد‏ ‏ومش‏ ‏مستعد‏ ‏أتنازل‏ ‏عن‏ ‏رأيى ‏لأنه‏ ‏فى ‏الأغلب‏ ‏هو الرأى ‏الأصح‏.‏
ما‏ ‏عنديش‏ ‏مانع‏ ‏أوافق‏ ‏على ‏أى ‏حاجة‏ ‏مادام‏ ‏مش‏ ‏أنا‏ ‏إللى ‏حاعملها.
‏ ‏كتير‏ ‏يجيلى ‏غممان‏ ‏نفس‏ ‏من‏ ‏غير‏ ‏سبب.
لما‏ ‏ألاقى ‏الدنيا‏ ‏زحمة‏ ‏أفرح‏ ‏إن‏ ‏ما‏ ‏حدش‏ ‏حايلاحظني.
ساعات‏ ‏أحس‏ ‏إنى ‏حا تفندق‏ ‏ومش‏ ‏حاعرف‏ ‏ألم‏ ‏نفسي.
كتير‏ ‏أفقس‏ ‏نفسى ‏إنى ‏ما‏ ‏باثقشى ‏فى ‏حد‏ ‏خالص.
أحب‏ ‏أمشى ‏مع‏ ‏الناس‏ ‏إللى ‏أكبر‏ ‏منى ‏فى ‏السن‏ ‏قوي.
مش‏ ‏فاكر‏ ‏حاجة‏ ‏يمكن‏ ‏أقولها‏ ‏على ‏إنها‏ ‏أهم‏ ‏حاجة‏ ‏فى ‏حياتي.
كتير‏ ‏أثق‏ ‏فى ‏ناس‏ 100%، ‏وهم‏ ‏ما‏ ‏يستاهلوش‏ ‏أى ‏ثقة‏ ‏من‏ ‏أصله.
ما‏ ‏احبش‏ ‏أفتكر‏ ‏طفولتي‏، ‏وساعات‏ ‏أقول‏ ‏أنا‏ ‏ما‏ ‏عنديش‏ ‏طفولة.
الواحد‏ ‏أحسن‏ ‏ما‏ ‏يفكّرشي.
ساعات‏ ‏أفرح‏ ‏جامد‏ ‏جدا‏ ‏جدا‏ ‏من‏ ‏غير‏ ‏أى ‏سبب.
باحس‏ ‏إن‏ ‏مزاجى ‏بيتغير‏ ‏بنظام‏، ‏ساعات‏ ‏مع‏ ‏الفصول‏ ‏وساعات‏ ‏لوحده‏ ‏كده.
ساعات‏ ‏أحس‏ ‏بنشاط‏ ‏زايد‏ ‏وإنى ‏عايزأعمل‏ ‏كل‏ ‏حاجة‏ ‏فى ‏نفس‏ ‏الوقت.
كتير‏ ‏أحس‏ ‏إن‏ ‏أفكارى ‏بتجرى ‏ورا‏ ‏بعضها‏ ‏مش‏ ‏قادر‏ ‏ألاحقها.
لولا‏ ‏الملامة‏ ‏كنت‏ ‏عملت ‏أى ‏حاجة‏ ‏تخطر‏ ‏فى ‏بالى.
لولا‏ ‏إنه‏ ‏حرام‏ ‏كان‏ ‏كفاية‏ عيشة ‏لحد‏ ‏كده‏.
عندى ‏حاجات‏ ‏صغيرة‏ ‏وقديمة‏ ‏ما‏ ‏اقدرشى ‏أستغنى ‏عنها.
باحس‏ ‏إنى ‏أنا‏ ‏شخصيا‏ ‏حاضيع‏ ‏لو‏ ‏فجأة‏ ‏لقيت‏ ‏حاجة‏ ‏ضاعت‏ ‏أو‏ ‏اتنقلت‏ ‏من‏ ‏مكانها‏ ‏.
عندى ‏قانونى ‏الخاص‏ ‏إللى ‏ما‏ ‏احبش‏ ‏حد‏ ‏يعرفه‏، ‏وهو‏ ‏قانون‏ ‏أخلاقى ‏وإلهى 100%.‏
‏ ‏أعتقد‏ ‏إن‏ ‏الناس‏ ‏دى ‏كلها‏ ‏أى ‏كلام.
لو‏ ‏اشتغل‏ ‏مدير‏ ‏مدرسة‏ ‏حالْغى‏ ‏حصص‏ ‏الألعاب.
كتير أفضل إنى اسمع ‏أغانى ‏لغة‏ ‏لا‏ ‏أعرفها‏ ‏.
الجنس‏ ‏هو‏ ‏المفسر‏ ‏الأول‏ ‏والأخير‏ ‏للسلوك‏ ‏البشري.
أنا‏ ‏رأيى ‏إنه‏ ‏توجد‏ ‏نظرية‏ ‏واحدة‏ ‏صحيحة‏ ‏لتفسير‏ ‏هذا‏ ‏العالم.
أحسن‏ ‏حاجة‏ ‏إن‏ ‏الواحد ‏يبقى ‏مالو‏‏ش‏ ‏دعوة‏ ‏بأى ‏حاجة.
أنا‏ ‏أومن‏ ‏بوجود‏ ‏الجان‏ ‏لكن‏ ‏لا‏ ‏أومن‏ ‏بتأثيرها‏ ‏على ‏البشر.
أنا‏ ‏أومن‏ ‏بوجود‏ ‏الجان‏ ‏وأنه‏ ‏لا‏‏بد‏ ‏من‏ ‏إرضائهم‏ ‏والتفاهم‏ ‏معهم‏ ‏حتى ‏نعيش‏ ‏فى ‏سلام.
أحيانا‏ ‏أحس‏ ‏أن‏ ‏مخى ‏حايطير.
أغلب‏ ‏الناس‏ ‏شر‏، ‏حتى ‏يثبت‏ ‏العكس.
أنا‏ ‏باعامل‏ ‏الناس‏ ‏زى ‏ما‏ ‏أحب‏ ‏إنهم‏ ‏يعاملونى ‏لكن‏ ‏هم‏ ‏مش‏ ‏بيعملوا‏ ‏كده‏ ‏معايا‏.‏
أنا‏ ‏لا‏ ‏أومن‏ ‏بوجود‏ ‏الجان‏ ‏والمسألة‏ ‏كلها‏ ‏مجازية.
أنا‏ ‏رأيى ‏إن‏ ‏الطبيب‏ ‏لازم‏ ‏يحل‏ ‏مشاكل‏ ‏المريض‏ ‏ويغير‏ ‏ظروفه.
المسألة‏ ‏إن‏ ‏العالم‏ ‏ده‏ ‏ما‏لوش‏ ‏ريس.
ليس‏ ‏من‏ ‏مهمتنا‏ ‏أن‏ ‏نبحث‏ ‏عن‏ ‏حلول‏ ‏لمشاكل‏ ‏ليست‏ ‏من‏ ‏صنعنا.
الأمر‏ ‏وما فيه‏ ‏إن‏ ‏الدنيا‏ ‏ماتساويش‏ ‏لكن‏ ‏ما‏ ‏حدش‏ ‏واخد‏ ‏باله.
لو اعترفت إنى مريض نفسى يبقى كل‏ ‏الناس‏ ‏مرضى ‏نفسيين‏ .
أعتقد‏ ‏إن‏ ‏المريض‏ ‏النفسى ‏مسئول‏ ‏عن‏ ‏مرضه‏ ‏مهما‏ ‏كانت‏ ‏الظروف.
إللى ‏يظهر‏ ‏انفعالاته‏ ‏ضعيف.
أنا‏ ‏ما‏ ‏عنديش‏ ‏حاجة‏ ‏أقدر‏ ‏أديها‏ ‏للضعيف إلا‏ ‏الصعبانية.
كل‏ ‏ما‏ ا‏شوف‏ ‏نفسى ‏خلاص‏، ‏أقول‏ ‏لسّه.
الشرف‏ ‏مسألة‏ ‏نسبية.
لو‏ ‏كل‏ ‏اللى ‏فى ‏مخى ‏اتحقق‏ ‏يبقى ‏الدنيا حا يتصلح حالها.
باقوم من النوم كإنى ما نمتش دقيقة واحدة.
كل‏ ‏واحد‏ ‏ما‏ ‏يرضيهوش‏ ‏إلا‏ ‏إللى ‏فى ‏مخه‏، ‏إلا انا .
كل ما احصل على حاجة، ألاقينى عايز حاجة كمان أحسن منها.
يتهيأ لى كدا رضا قوى والحمد لله .
لو الناس نيتهم حسنة بصحيح، ما كانشى حد تعب.
القرار الوحيد اللى لازم كل واحد لازم ياخده هو إنه يعيش أو يموت، (مش يموت نفسه) .
لو الواحد عرف يفرح بحق وحقيق، كل حاجة تتحل.
أنا ممكن أصبر أى مدة على شرط أتأكد إن فيه عدل.
ما دام كل حاجة زى كل حاجة يبقى إيه لزومها بقى.
أنا ما احبش اعرف أفكار جديدة قوى أحسن أتغير.
ما هو ما دام الحكاية كده، يبقى بلاش بقى .
لو قدرت اعرف إيه اللى معطلنى كنت انطلق زى الصاروخ.
أنا خلاص زهقت بصحيح ومش قادر أصبر ولا ثانية.
كل الذمم ممكن تتشرى إلا ذمتى انا، تمنها غالى قوى.
ما أنا ما اسمحشى لنفسى أعوز حاجة أنا مش قدّها.
كتير أقول لنفسى يا واد اعقل، ما هى ماشية وخلاص.
نفسى الناس تفهمنى زى ما انا متصور، مش زى ما انا بحق وحقيق.
نفسى افهم اللى حوالى كويس عشان اقدر اعاملهم على قدهم.
ساعات باحس إنى حا فرقع من غير سبب.
الناس اللى مش حاسة باللى حواليها دول أجدع ناس.
ما هو كده بقى، تبقى مش نافعة بحق وحقيق.
طب انا اعمل إيه، وهما كلهم علىّ.
أنا حظى كويس بس ما خدتش فرصتى كفاية.
أنا اعرف فى حاجات كتير قوى مش اختصاصى.
أنا اقدر افقس اللى قدامى، حتى لو ما نطقشى ولا كلمة.
ما دام وصلتْ لحد كده، يبقى لا زم ابتدى من جديد.
الدنيا بخير، بس تييجى لحدّى وتتقلب غم.
ما انا لو حادقق فى كل حاجة ما فيش حاجة حا تخلص.
اللى يفوت للناس لازم هما يفوتوله برضه.
ما دام انا عملت اللى علىّ، يبقى طز فى أى حاجة، وأى حد.
الدنيا ما تساويش بس انا بقى حاخليها تساوى.
أنا لازم انتقم من اللى كان السبب مهما كانت النتايج.
أحب‏ الأماكن الخلا حتى الصحرا‏.
اللى يعرف ان الدنيا دى فانية لازم ياخد حقه منها قبل ما يمشى.
الدنيا دى مالهاش أمان، يبقى الواحد يحرّس من كل الناس .
لو الأمور ما مشيتشى زى ماانا عايز بالظبط، أنا مش لاعب.
أنا لو أخدت أكتر من حقى لازم ارجّع الحق لأصحابه بأسرع ما يمكن.
االى ما ينتهزشى الفرصة مهما كانت يستاهل اللى يجراله .
أنا أى حاجة بسيطة ممكن تفرحنى حتى لو مش بتفرّح حد غيرى.
ما دام بعيد عن مصلحتى الشخصية، يبقى ان شالله تتحرق.
أنا مستعد أدافع عن حقوق غيرى على شرط أضمن إنه يعترف بجميلى عليه.
الدنيا بخير، مادام انا عايزها كده.
الأطفال أحباب الله، بس انا مش عايز أرجع عيل تانى.
هوّا يعنى لما اشيل هم الناس حا حلّ مشاكلهم.
أنا نفسى كل الناس دىتاخد حقوقها، بس مش على حسابى.
أنا عارف إن ما فيش غير حق واحد، يبقى نسيب الناس تختلف بتاع إيه.
ما هو سواء أنا عملت أو ما عملتش، ما هو كله محصل بعضه.
أنا مش قادر أعمل حاجة لنفسى، يبقى أعمل حاجة للناس بأمارة إيه.
أنا باحب أقعد ساكت كده واسرح فى مفيش حاجة.
أنا باحب اتفرج على الستات على شرط ما حدش يلاحظ.
لو كل الناس عملت اللى عليها برضه ما فيش فايدة.
أنا متأكد – برغم كل شىء – إن بكره أحسن من النهاردة.
لو كانوا خيرونى قبل ما اتولد ما كنتش وافقت.
أنا احب اعيش حتى لو إيه .
ما هو الناس لبعضها غصبن عنهم، إمال يعنى احنا عايشين ازاى.
أنا باخاف من أى ظرف حكومة يجينى فى البوسطة قبل ما افتحه.
أنا باخاف من الكلاب حتى لو مش نجسة.
لما الدنيا بتمطر، أو باسمع صوت الرعد باحس إن القيامة قامت.
مهما الدكاترة طمنونى، أنا حاسس إن صحتى مش تمام.
مجرد ما باسمع سيرة الموت بيحصلى تقلصات فى بطنى وادوخ.
أنا مستعد أتنازل عن أى حاجة قصاد إنى أبطل خوف من مفيش.
ما دام ما فيش حاجة فى إيدى أعمالهم لْهم، يبقى أشيل همهم ليه.
الدنيا دى ما حدش يبكى عليها، ومع ذلك أنا متمسك بيها للآخر.
أنا باظبط نفسى باحقد على اللى كان زيى وبقى أحسن منى قوى من غير مجهود.
لما الأمور بتزنق قوى مخى بيتشل عن التفكير.
أنا باحب اسمع صوت الموج، بس وانا قاعد بعيد شوية.
الخريف عندى أحسن من الربيع حتى لو ورق الشجر وقع.
الناس ما هماش شر قوى كده، الناس للناس خصوصا فى الزنقات.
أنا ما باكلشى حاجة برة البيت، أنا إيش عرفنى مين حاطط لى فيها إيه.
أنا أحسن لى إنى أركز على مصلحتى، ما هو ما فيش حد حاينفعنى لو وقِعْتْ.
أنا لو باكسب مليون جنيه كل سنة، برضه حلاقى نفسى مش مبسوط.
باحس ان كل حاجة حوالىّ متغيرة اليومين دول، مش ضرورى إلى أحسن.
أنا باتخض لما اسمع صوت حيوان ما اعرفشى اميزه ده صوت إيه.
أنا مستعد اتنازل عن نص عمرى قصاد إنى أفرح النص التانى.
لما ما بافرحشى زى الناس، باحاول اتصنع الضحكة، فباتضايق اكتر.
أنا مش حاسس بحد من اللى حوالى، لازم همّا كمان مش حاسين بيّا.
نفسى إن الدنيا تبقى أحسن على شرط ما ابذلشى مجهود عشان تبقى أحسن.
أنا عملت اللى علىّ وزيادة، الدور والباقى على التانيين.
أنا مضطر آخد حقى بأى طريقة، حتى لو مش حقى، واللى يحصل يحصل.
لو حد جرح كرامتى أنا مش حا سيبه مهما طال الزمن.
أنا مش سهل أنسى الأسية، حتى لو اللى عملها فىّ اعتذر لى.
أنا باحب الناس كلها، بس لما باجى احب حد بالذات باتلخبط.
نفسى أصحى ألاقى نفسى مش كده قوى .
أنا ضحيت فى حياتى أكتر من اللازم، كفاية بقى.
ما هو ما دام ماحدشى سائل فى حد، أبقى زيهم واريح نفسى .
أنا باصحى من النوم وكإنى ما نمتش ولا ثانية .

يحيى الرخاوى طبيب نفسى

استبار نفسى “تحت الإعداد” : ليس لزاما أن تقرأه مرة واحدة، ولكن قل لى رأيك؟!!!!! كيف؟؟

اترك تعليقاً إلغاء الرد

نوفمبر 2024
س	د	ن	ث	أرب	خ	ج
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30