يحيى الرخاوى طبيب نفسى
نشرة “الإنسان والتطور”
الأحد: 5-5-2024
السنة السابعة عشر
العدد: 6091
أغانى مصرية: عن الفطرة البشرية
للأطفال ⇔ الكبار وبالعكس [1]
5- الكـَبـَرَانْ
-1-
أنا باكْــبـــَـرْ
أيوه: باكْــبـــَـرْ
بس انا لسَّه صُغـيّــرْ
بس باتغــيّــَرْ واغــيّــَرْ
ماهو ده معناه ياخُويَا إنّى باكْبَرْ
-2-
عايز أكبر بَسْ شرطـِى:
أحتفظ بطفولتى وارسم بيها خطى:
“إنى أكبرْ”:
وقت ماهُو لازِمْ وِوَاجبْ،
بس أصغرْ:
لاجْل ما ألعب، والاَعِـبْ”
واقعدْ أكبر تانى واصغَرْ
طول ما انا باحْلــوّ أكتـــرْ
أنا باكبر مش باشِيـخْ
يعنى باتعلـــِّـم يا شيــخْ
يعنى باحـْمــِلْ مسئوليهْ
-3-
واحترمْ طـفـلِى اللى فـيـّهْ
وان غِـلِطْ، مش لازم انّى أكبـِتــُهْ
مَا الكبِير برضكْ بيعملْ عــمـْلتـُـهْ
-4-
مش ضرورى الصَّحْ يفضل”
هوَّا صحْ: عــّـالـى طول
كل صح نجرَّبُهْ يمكنْ “يقولْ”:
إنه صح نصْ نصْ
يبقى نـِتـْعـَلـِّمْ نبُصْ:
ييجى صَـحْ أصحّ مِنّهْ
غَصْب عَّنهْ
-5-
يبقى معنى إنى باكبرْ
إنى باتغيّـــر وباقْــْـدَرْ !
ــــــــــــــــــــــ
[1] – يحيى الرخاوى، (2017) “أغانى مصرية: عن الفطرة البشرية للأطفال والكبار (وبالعكس)”، منشورات جمعية الطب النفسى التطورى، والكتاب متاح فى مكتبة الأنجلو المصرية وفى منفذ مستشفى دار المقطم للصحة النفسية شارع 10، وفى مركز الرخاوى: 24 شارع 18 من شارع 9 مدينة المقطم، كما يوجد أيضا بموقع المؤلف، وهذا هو الرابط www.rakhawy.net.
تكبر وتحافظ على كونك صغير…الصعب المستحيل النبيل…الخ ربنا يقدر