يحيى الرخاوى طبيب نفسى
نشرة “الإنسان والتطور”
الأربعاء: 7-8-2013
السنة السادسة
العدد: 2168
مقدمة:
تم نشر هذا المقال فى موقع “اليوم السابع” بتاريخ 5-8-2013
حوارات أسرة مصرية جدا: (3) ، (4)
الحوار الثالث
(قال الأب لابنته:)
الأب: كفاية لو سمحتى، كفاية.
البنت: كفاية إيه يا بابا؟
الأب: كفاية عمايلك دى
البنت: أنا عملت إيه يا بابا
الأب: إنتي عارفة كل حاجة
البنت: واللهِ ما انا عارفة حاجة
الأب: لأ عارفة
البنت: باقول لحضرتك: والله مانى عارفة
الأب: تبقى بقى تسألى أمك، هى عارفة
البنت: لا لا، عن إذنك يا بابا، أنا ماشية
الأب: ماشية رايحة فين؟
البنت : مش عارفة، حضرتك عارف
الأب: أعرف منين؟
البنت: حضرتك عارف كل حاجة
الأب: مين اللى قال لك كده؟
البنت: حضرتك
الأب: أنا قلت لك إنى عارف كل حاجة؟!!
البنت: أيوه
الأب: إمتى؟
البنت: من يوم ما اتولدت
الأب: طيب والدكتور حازم؟
البنت: الدكتور حازم ابن خالتى؟ ماله؟
الأب: إبن خالتك مين ؟ الببلاوى
البنت: الببلاوى مين؟
الأب: رئيس الوزرا
البنت: طب واحنا مالنا
الأب: ما لنا ازاى؟ ما هو لا زم
البنت : لازم إيه؟
الأب: إيش عرّفنى!!؟
(انتهى الحوار الثالث)
الحوار الرابع
(قالت البنت لأمها:)
البنت: وبعدين يا أمى؟
الأم: بعدين إيه يا حبيبتى؟
البنت: بعدين فى اللى جارى ده؟
الأم: جارى فين يا حبيبتى؟
البنت: جارى فى مصر
الأم: اللى فى علـْمُه حايـْتـِمـُّه
البنت: علم مين؟
الأم: علم ربنا يا حبيبتى
البنت: واحنا إيه شغلتنا؟ نتفرّج يعنى
الأم: بيهيّأ الأسباب
البنت: أنا باحب ربنا يا أمى، كده مايصحّش
الأم: هوا إيه إللى ما يصحّـش
البنت: إننا نلزق خيبتنا في ربنا على العمال على البطال
الأم: كله بالمشيئة
البنت: مشيئة مين؟
الأم: مشيئة ربنا
البنت إعملى معروف لحسن أكفر
الأم: أستغفر الله العظيم، ربنا يكملك بعقلك
البنت: آمين، ويكمل كل ناقصة عقل ودين
الأم: بتقولى إيه يا بنت؟ بتلقّـّحِى عليّأ؟
البنت: مش قصدى يا أمى، والله ما اقصد
الأم: إمال إيه؟
الأم : كنت باحسبك عارفة؟
الأم: عارفة إيه؟
البنت: أى حاجة، أصل انا خايفة
الأم: يا بنتى استهدى بالله
البنت: السيسى يا ماما،
الأم: ماله؟
البنت: نضارته سودا قوى
الأم: الدنيا شمس، ويمكن عنيه واجعاه
البنت: بعيد الشر
الأم: عنه وعن مصر
البنت : يا رب، يا رب يا أمى، يا رب
(انتهى الحوار الرابع)