شرعية بشرعية، ما يورونا شطارتهم

اليوم السابع

الأحد: 12-1-2014

شرعية  بشرعية، ما يورونا شطارتهم

قالت البنت لأخيها: إزيك النهارده؟

قال: زى الفل

قالت : على مين! دا انت كنت امبارح فى حال

قال: سامحينى أصلها مصر، وانتى عارفه

قالت: بس ما تعملشى فى نفسك كده، ما احنا حانبنيها تانى

قال: إحنا مين؟

قالت: كلنا

قال: ما هم بيهدوا اللى بيتبنى أول بأول

قالت: دى حلاوة الروح

قال: مش باين

قالت: طب اسمع لما أقول لك : مش همّا بتوع الشرعية، والدستور ده، حتى لو عدوّ محتل هو اللى حطُّه وقال يا ناس يا مصريين إيه رأيكم، وهات يا انتخابات على عينك يا تاجر وجاب مراقبين من كل الدنيا، مش ده يبقى عز الشرعية،

قال: عزها ونص

قالت: طب ليه  ما يعملوش دعاية ويجمعوا كل أنصارهم واللى يتشيع لهم ويروحوا، ويقولوا لأه، ويخلصونا، أهى دى الشرعية ولا بلاش.

قال: ما هو لو عندهم الثقة دى ولا الشجاعة دى، كان الدكتور مرسى قِبِل نصيحة السيسى قبل 30 يونيو، ما هو قال له كلام شبه ده، قال له تعمل انتخابات رياسية من أول وجديد، مارضاش

قالـت: عليك نور ، دا انت فاكر أهه زى العفريت

قال: دول لا عايزين يروحوا، ولا عايزين يقولو “لأ”

قالت: بينى وبينك ولا عايزين الناس تروح

قال: يا ريت هى حكاية عوزان، دول ناويين يحوشوا اللى حايروح بالعافية، شرعية إيه دى ونيلة إيه، ربنا يهديهم يا شيخه

قالت: آمين يا رب العالمين

قال: باحسبك حاتعملى زى اصحابى كل ما اقول ربنا يهديهم يفتكرونى إخوان، أقول لهم ربنا يهدى من يشاء، يقولوا لى ” وَأَنَّ اللَّهَ لا يَهْدِي كَيْدَ الْخَائِنِينَ “

قالت: أنا معاك، ما يصحش نعمل زيهم ونحكم على بعض فى الشارع، نستنى لما المحكمة تحكم على حد منهم بالخيانة ، وبعدين نقول ” وَأَنَّ اللَّهَ لا يَهْدِي كَيْدَ الْخَائِنِينَ “

قال: طب احنا نستنى، بس هما ما بيستنوش

قالت: أنا بيتيهيأ لى إن الشرعية عندهم إنهم ينجحوا على طول الخط، ويركبوا على نفسنا طول العمر ، وأى حاجة غير كده يبقى تزوير أو انقلاب.

قال: باين كده!

قالت: طب هما لو راحوا كلهم، وكل اللى وراهم، وعملوا الدعاية اللى هما يقدروا عليها حايقدروا يخلوا النتيجة “لأه”؟

قال: بصراحة، هما  لو اتشجعوا وراحوا يبقوا بتوع الشرعية بصحيح، ولو نجحوا إن النتيجة تطلع “لأه”، يبقى حلال عليهم الرياسة ومجلس الشعب وغزة وأثيوبيا ويمكن “كندا” كمان، ويبقى احنا ما نستاهلشى غيرهم بقى!.

قالت: وهو معقول تطلع النتيجة “لأه”، بعد ده كله؟ دا مستحيل حتى لو خدوا معاهم الأطفال الرضع

قال: ما هو لو قبلوا التحدى، وراحوا بربطة المعلم، وطلعت “نعم” بعد كده ،  ما أسهل عليهم انهم يقولوا إنها اتزورت، إذا كانوا بيقولوا على 30 يونيو اتزورت والصور قديمة ومضروبة، مش حايقولوا على “نعم” للدستور انها اتزورت، مهما كان فيه آلاف المراقبين من كل الدنيا؟

قالت: أنا بيتهيأ لى إنهم ناسيين برضه إن ربنا سبحانه وتعالى هو أعظم  رقيب على الانتخابات وغير الانتخابات، رقابة ربنا أهم من كل لجان المراقبة، وحقوق الإنسان، والحاجات دى كلها

قال: والله مانى عارف هما بيخافوا من ربنا ولاّ لأه؟ ربنا يهديهم

قالت:تانى ، إنت ما بتزهقشى دعا لهم ربنا يهديهم، ربنا يهديهم؟!

قال: وفيها إيه ربنا قادر على كل شىء

قالت: أنا ساعات باوفقك، وساعات يتهيأ لى إن دول اللى قال فيهم ربنا ” ذَلِكَ بِأَنَّهُمْ اسْتَحَبُّوا الْحَيَاةَ الدُّنْيَا عَلَى الآخِرَةِ وَأَنَّ اللَّهَ لا يَهْدِي الْقَوْمَ الْكَافِرِينَ”

قال : لا لا حاسبى إعملى معروف، مش عايزين نعمل زيهم، كافرين إيه وبتاع إيه، حسابهم على الله يا شيخه

قالت : بعد كل اللى بيعملوه ده حسابهم على الله ؟

قال: إمال حسابهم على مين؟ ربنا قبل وبعد القضاء وقبلك وقبلى طبعا

قالت: يعنى انت رأيك يروحوا الاستفتا ويقولوا لأه، واللى يحصل يحصل

قال: أيوه

قالت: طيب : ولما تطلع نعم بعد كده، وهات يا اتهام بالتزوير، وهات ياتخريب وقتل ألعن ماللى جارى

قال: يبقى ربنا ياخدهم

قالت: يارب يا شيخ