يحيى الرخاوى طبيب نفسى
السبت: 15-3-2014
كل خير
قالت البنت لأخيها: هوّ إيه اللى جارى بالضبط
قال: كل خير
قالت: كل إيه؟!!
قال: كل خير!! إيه؟ مش عاجبك؟
قالت: عاجبنى ونص
قال: إمال بتسألى ليه
قالت: عايزة أفهم عشان اشتغل
قال: هوّا ما ينفعش تشتغلى من غير ما تفهمى
قالت: آه صحيح!! والله فكرة
قال: أما تخلّصى ابقى قولى لى
قالت: أخلص إيه؟
قال: تخلصى شغل
قالت: هوّا الشغل بيخلص ؟ دا البلد عايزه ناس ماتنامش
قال: أنا شخصيا ما نمتش امبارح إلا بعد الفجر
قالت: يا فلاحتك، كنت بتعمل إيه
قال: مش حاقول لك
قالت: انت شايف فيه فرق بين الوزارة الجديدة والوزارة اللى فاتت؟
قال: آه طبعا
قالت: إيه بالضبط
قال: النشاط والتصريحات والحاجات والمشروعات
قالت: مشروعات إيه؟ والحكاية كلها كام شهر
قال: إيش عرفنا، أنا بيتهألى الراجل المهندس محلب الطيب ده بيحضر نفسه عشان يكمل
قالت: يكمّل إيه
قال: يكمل وخلاص
قالت: إزاى يعنى
قال: مش عارف
قالت: عرفت بقى كان قصدى إيه وأنا بقوله لك “هوّ إيه اللى جارى بالضبط”
قال: وانتى عرفت أنا كان قصدى إيه وانا بقول لك “كل خير”
قالت: والنبى الله يخليك أنا مش عايزه تريقة، أنا باحب البلد دى وعايزه اعمل حاجة.
قال: ما تعملى، حدَّ حايشك
قالت: طبعا
قال: مين ده وأنا أزيحه من طريقك
قالت: أنت
قال: الله يخيبك، أنا حايشِك إزاى؟
قالت: انت، مش عايز تاخد كلامى جد ليه، أنا مسئولة عن البلد دى، انت مش مصدق ولا إيه
قال: انتى بتجرجرينا تانى للساقية اياها
قالت: ساقية إيه وبتاع إيه، بس كل واحد يعمل اللى عليه وبعدين نشوف
قال: نشوف امتى؟ بعد ثلاثين سنة تانيين؟
قالت: ثلاثين؟ ألف! بس نبتدى
قال: نبتدى إيه، ما احنا عمالين بنبتدى عمّال على بطّال، هوّا إيه حكايتك بالضبط؟
قالت: كل خير.