يحيى الرخاوى طبيب نفسى
نشرة “الإنسان والتطور”
26-6-2012
السنة الخامسة
العدد: 1761
الأساس: الكتاب الأول: الافتراضات الأساسية (87)
الإدراك (48)
“العين الداخلية” (19)
و”عملية اعتمال (معالجة) المعلومات”(18)
Information Processing
المقابلة التتبعية:
بتاريخ 21-5-2009
مقدمة :
فوجئت صباح الخميس 21 /5 / 2009 أن رشاد قد حضر حسب طلب د. “ش” (زميلة د.”م” التى انشغلت بالامتحانات)، ودار حوار للمتابعة فأضاف ما احتاج أن نخصص له اليوم وغدا تكملة للعرض،
وهاكم الجزء الأول من الحوار والتعليق.
آخر لحظة:
…………..
…………..
رشاد: السلام عليكم
د.يحيى: لا مؤاخذه أتأخرنا عليك، أنا آسف جدا، كنت باشوف إبننا ممدوح
رشاد: ممدوح مين
د.يحيى: العيان اللى دخل قبلك للمتابعة، بصراحة يا رشاد أنا منزعج من حالة ممدوح خالص، مش عارف أعمل معاه إيه
(*) نكرر هنا معنى وفائدة مناقشة مريض فى حالة (وحمل هم) مريض آخر، فى سياق مقابلات متتالية، وليس بالذرورة اقتصارا على مثل هذا فى العلاج الجمعى مثلا
رشاد: لأ مايهمكش، عادى
د.يحيى: مايهمنيش ممدوح، ولاّ مايهمنيش إيه؟
رشاد: مايهمكش
د.يحيى: مايهمكش أنشغالى على ممدوح ولاّ إيه؟ يعنى إيه مايهمنيش؟
رشاد: مايهمكشى انتظارى، إنى أنا أنتظرت يعنى
د.يحيى: وممدوح
رشاد: ماله
د.يحيى: باقول لك شاغلنى
رشاد: إنشاء الله يقوم بالسلامة
د.يحيى: مش عايز تشوف د. “م” يا رشاد، ماوحشتكشى
رشاد: آه، طبعا
د.يحيى: بتدعى لها ولا لأ، هى بتمتحن
(*) لعل القارىء يذكر أن الزميلة، مقدمة الحالة هى د.”م” دوس، وأن الحديث الصريح عن اختلاف الدين، قرّب المسافة فيما بيننا، بما فى ذلك طلب أن كلا يدعو للآخر ربه من منظومة دينه.
رشاد: أنا بادعى لكله بصراحة
د.يحيى: هو إيه حكاية كلـُّـه دى، يا أخى حَـدّد، خَلّى الدعوة تقبل
رشاد: ازاى ده؟ أهم حاجة إنك تدعى للخلق كلهم
د.يحيى: يا راجل نشّن، إنت لما تركز تنزل الدعوة متخصصة لصاحبها
رشاد: ياه !! بالذمة؟
د.يحيى: أنا رأيى كده
رشاد: هو صح كده
د.يحيى: طب نشّن وادعى لى بقى
(*) هنا إشارة إلى فكرة غامضة أعتقد شخصيا فى صحتها ولو جزئيا، وهى صدق الاستجابة المحددة مع قوة صدق الدعاء.
رشاد: ربنا يكرمك يارب
د.يحيى: شكلها دعوة عمومى برضه، أنا عايز اهمد يا رشاد، عايز أبطل اعرف شوية، قول ربنا يهدّى سرك،ربنا يرسّيك على بر
رشاد: إزاى يادكتور
د.يحيى: بس بصراحة: أنا لو رسيت على بر حابقى رِخـِم قوى
رشاد: إزاى كده يا دكتور؟ بتقول إيه؟
د.يحيى: تصور يا رشاد لما ابقى عارف كل حاجة، يا ساتر!! ما اقوم اروّح احسن، آجى ليه الساعة سبعة وربع الصبح
(*) مشاركة المريض بعض الهم الشخصى للطبيب، ليست مسموح بها إلا فيما يتعلق بمثل إعلان هذه الحيرة المعرفية، التى قد تكون مشتركة مع خبرة المريض المفترقية مثلما ، وأيضا بعد توثيق العلاقة على المستوى الدال عليه هذا الحوار، وقد التقط رشا بعض معالم هذه الحيرة المعرفية، خاصة وأنها لم يأت ذكرها بشكل مطلق، وإنما فى انشغال الطبيب على مرضاه بوجه خاص، ويبدو أن رشاد التقط البعد الخاص والبعد العام معا:
رشاد: هو الإنسان بيفضل يتعلم طول العمر
د.يحيى: والله مشغول على ممدوح قوى يا شيخ، معلشى، نرجع مرجوعنا لك: شكلك كده محترم، وبتعمل اللى اتفقنا عليه، والدكتورة “ش” بتقول لى أول بأول، ومبسوطة انك بتشتغل، وشغلتين كمان مش شلغة واحدة.
رشاد: كنت شغال شغلتين الأول
د.يحيى: مش انت كنت شغال بتتدرب فى النقل العام وبتشتغل فى نفس الوقت فى محل السباكة
رشاد: هو مش تدريب، أنا لسه ماتدربتش لحد دلوقتى، معادى يوم عشرة يونيو
د.يحيى: أمّال بتعمل إيه دلوقتى؟
رشاد: بانزل المحل
د.يحيى: على شرط كل يوم
رشاد: أيوه كل يوم، وساعات كده أروح أخد العربية من والدى
د.يحيى: ده نقل عام يابنى، هوه تاكسى
رشاد: أيوه ساعات بخدها
د.يحيى: ينفع واحد مطرح واحد فى النقل العام
رشاد: ماينفعش بس يعنى أهى بتمشى
(*) الدخول فى مثل هذه التفاصيل من أساليب استمرار “إذابة الثلج”.
د.يحيى: أفرض واد أمين شرطة غـَتـِّت عليك
رشاد: أبويا بيبقى جانبى
د.يحيى: والدك دا راجل جدع بشاكل، وانت جدع برضه
رشاد: الله يكرمك
د.يحيى: طيب ياللا بقى نتخانق: أنا حاسس إنك عاوز تتكلم على السفر وأنا عايز اتكلم على النصين اللى انشقوا، والأوَض، والحاجات دى
رشاد: أنا عايز أعرف كل اللى أنا فيه ده، إيه السبب يعنى؟
د.يحيى: السبب؟
رشاد: آه المرض يعنى! هوه بيجى لوحده ولا أنا اشتركت فيه وكده؟
د.يحيى: الاتنين، هو بيجى لوحده، وانت اشتركت فيه
رشاد: طب نهايته إمتى
د.يحيى: إحنا وشطارتنا، على قد ما نشتغل سوا سوا، ربنا حايكرمنا
رشاد: يعنى حافضل ماشى كده، وخلاص
د.يحيى: آه
رشاد: من غير ما أعرف حاجة
د.يحيى: آه
رشاد: ماشى بس كده؟
د.يحيى: بس كده، آه، المهم اتجاه البوصلة يكون صح، نوصل صح
رشاد : يعنى إيه؟
د. يحيى: يعنى نتأكد إن العجلة بتاعة الحياة ماشية فى السليم، شغل وناس، وربنا، ونصلّح أول بأول سوا واحدة واحدة اللى نقابله أو نتتعتر فيه نشتغل فيه
رشاد: فاهم، بس مش قوى
د.يحيى: طيب أشوفك الجمعة الجية ولاّ اللى بعدها؟
رشاد: مش فاهم
د.يحيى: خلاص أنا خلصت اللى عندى، مش عايز أطوّل فى الكلام المرة دى.
رشاد: خُلُص الكلام؟!!
د.يحيى: آه
(*) الأرجح أننى كنت أرغب فى تجنب النقاش المعقلن فى هذه المرحلة.
رشاد: طيب أنا عايز بس أقول لحضرتك حاجة قبل ما امشى
د.يحيى: أنا تحت أمرك
رشاد: هى من فترة دورة الكمبيوتر اللى أنا خدتها
د.يحيى: (مقاطعا) تانى؟!!!
رشاد: معلش لازم، من ساعتها والتعب زاد فى الفترة دى، التعب زاد فعلا
د.يحيى: ما انا عارف، واحنا اتكلمنا فى الموضوع ده قبل كده كام مرة
رشاد: ياترى حد من الدورة دى هو اللى عمل كده
د.يحيى: تانى؟!!!
رشاد: معلش آسف
د.يحيى: آه
رشاد: هما عملوا كده؟
د.يحيى: أيوه، بس هما اللى همّا هما، مش ضرورى يكونوا همّا اللى فى مخك، يعنى زى ما اتفقنا
رشاد: يعنى هما قصَدُوا حاجة زى كده
د.يحيى: آه
(*) النقلة من تسكين مصدر التأثير، أو الاضطهاد، أو قراءة الأفكار، من إسقاطات الخارج إلى ذوات الداخل، لا بد أن تتم بشكل تدريجى وبطريق غير مباشر ما أمكن ذلك. إن قبول حقائق المريض على أنها حقائق لأنه هو الذى يخبرها، لا بد أن يصاحبها هذا الشرط التدريجى، الذى يتضمن الاختلاف على مصدر هذه الحقائق وأيضا على تسميتها، وهذا هو الفرق بين هذا المنهج العلاجى، وبين محاولة إقناع المريض أن ما يعايشه ليس إلا خيالات هو ينسجها من الفراغ نتيجة لمرضه، فى المنهج الحالى كل المطلوب هو أن نعترف “بحقيقة خبرة المريض”، ثم نواصل البحث عن مصدرها الداخلى الذى يجعلها فى المتناول ونحن نعاود تشكيل النص.
رشاد: الله يكرمك يادكتور
د.يحيى: مش أنت بتقول كده، وإن ده حصل، يبقى حصل
رشاد: آه
د.يحيى: أكدّبك انا بقى ليه؟ إحساسك حايكدب ليه؟
(*) نتذكر أنه من اللحظة الأولى كان رشاد يسأل عن “الحقيقة” ، وأن الطبيب ، عكس ما قيل له من قبل سواء ممن أطباء أو محيطين ، اقره على أن ما يعايشه هو الحقيقة، حقيقته، وأنه لا يؤلفها أو يخترعها، وبقى أن نفسرها معا واحدة واحدة، ولعل هذا هو ما قرّب المسافة هكذا بينهما.
رشاد: طب ليه عملوا كده من غير ما يقولوا
د.يحيى: إحنا ما خلصنا الحكايات دى من زمان يا رشاد، ومش عايزين دلوقتى نخش فى تفاصيل
رشاد: لأ يعنى ريحنى، ربنا يريحك يعنى
د.يحيى: …. مش انا قلت لك من الأول أنا مش مريحاتى، وادينى باقول لك أهه : ولا انا هدفى استريّح أن شخصيا، أنا باعمل اللى على، والراحة تيجى وقت ما تيجى، لا باطبطب على نفسى، ولا على حد، ولا انت شايف إيه؟
رشاد: أنا شايف العطاء اللى أنت بتديه لنا يعنى
د.يحيى: مفيش راحة عندى غير بالموت يا ابنى، لما تقول ربنا يريحك، يبقى بتدعى علىّ بالموت، ده حتى الموت فيه أسئلة وأجوبة وحاجات صعبة يا عم، وانا مش خايف منها عشان راضى عن ربنا، زى ما هو راضى عنى الحمد لله، خلينا فى اللى احنا فيه الله يخليك.
رشاد: ماحدش يعرف إيه اللى هناك
د.يحيى: ربنا يعرف، هوه عارف كل حاجة، عارف المعلومات اللى فى الخلية بتاعتى، عشان كده أنا متطمن إنه لا يمكن يظلمنى، وعايزك تصدق وتبقى معايا
(*) لا أريد أن أكرر أن هذه اللغة الدينية البسيطة تجرى فى سياق آخر غير سياق الترهيب والترغيب، وأيضا غير سياق أى اغتراب عن “هنا والآن”، وبالتالى فهى لا يمكن أن تفيد إلا إذا كانت صادرة من يقين شخصى حتى يمكن أن تصل إلى يقين الآخر (المريض)، لكن يبدو أنها الجرعة طانت دسمة أكثر من اللازم ، فغيّر رشاد الموضوع بشكل ما :
رشاد: يادكتور أنا عارف إن الأسرة بتاعتى، يعنى حاسس إن هما عارفين كل حاجة ومع ذالك ماحدش جه يصارحنى بأى حاجة
د.يحيى: ما انا صارحتك أهه، بس بلغة تانية، لغرض تانى، هم إيش عرفهم، ومع ذلك انت عمال تعيد وتزيد، أنا عايزك تاخد كلامى ده وتربطه بالكلام الأوّلانى فى أول مقابلة بتاع الحقيقة ومش الحقيقة، اللى انا فهمته غلط فى الأول، وبعدين اتفقنا على إن كل اللى انت عايشه حقيقة، بس محتاج تفسير من الناحية دى، ومن الناحية دى، لحد ما نتفاهم، مش كده ولا إيه؟ إنت من أول لحظة سألتنى ده حقيقة ولا مش حقيقة، وانا قلت لك ما دام عايشه، يبقى حقيقة، ونتفاهم.
(*)استعمال نفس الكلمة “الحقيقة” التى طرحها رشاد من أول لحظة، لها فائدة خاصة لأنها قد تفيد كلا المعنيين المراد التفاهم بهما، قد تفيد أنه يعيش خبرة حقيقية يراها رأى العين (بالعين الداخلية)، كما أنها تفيد أيضا فى تقريب المسافة مع احتمال اختلاف تفاصيل المضمون لنفس اللفظ. “الحقيقة”، ويبدو أن كل ذلك قد وصل إلى رشاد حين أردف:
رشاد: يعنى حقيقة؟
د.يحيى: أستنى بس، ما هو الاختلاف بييجى بعد كده، أنا باقول لك هى حقيقة من جوه، وانت بتفاصل مرة جوة ومرة برة، حا نقعد نتكلم بقى جوا وبره ولا نعمل حاجة سوا سوا
رشاد: لأ نعمل حاجة
د.يحيى: بس خلاص
رشاد: بس فيه معرفة برضه يادكتور لازم الواحد يعرف
د.يحيى: قلت لك ماينفعش بالطريقة بتاعتك دى ، المعرفة بالمناقشات والكلام وبس ماتنفعشى، إحنا إتكلمنا فى النقطة دى عشرة خمستاشر مرة، احنا بنعرف سوا من خلال الخبرة، احنا بنشتغل ونعرف، نشتغل ونعرف، طول العمر
(*)أظن أن المقصود بالمعرفة من خلال الخبرة هنا يمكن إيجازه فى نوع من “المعرفة بالممارسة والوقت والونس” معا، وهى معرفة ضمنية غير محددة بتعريفات لفظية، ولا تحتاج أن تعلن ببصيرة معقلنة، ولكن تتراكم جرعاتها حتى تظهر فى فعل يقاس بمقاييس الصحة والأداء والعلاقات بدءا بالعلاقة العلاجية، وهى أمور كلها تبدو غامضة فى ذاتها فى حين أن آثارها شديد الوضوح، الحيرة التى تصاحب الغموض لا تعنى صعوبة مطلقة، بقدر ما تشير إلى أن اللغة المستعملة غير مألوفة.
رشاد: بس عشان مافضلش حيران
د.يحيى: ليه يعنى؟ إذا كان خففانك فى الحيرة نحتار سوا
(*)تحمل الحيرة يصاحب ما ذهبنا إليه فى البداية فيما يتعلق بـ “تعليق الحكم” ، وكلية التناول ، وهذا أيضا عكس الشائع عن العلاج النفسى، وما يصاحبه من تكرار “دع القلق” دع القلق”، لأن الحيرة هى نوع خاص من القلق، وعلينا أن نقبله حتى لا نسارع إلى اختزال الخبرة إلى ألفاظ الشرح والتعريف، وهذه المرحلة تعتبر من اصعب المراحل لأنها تغيير فى منهج الحوال، وطبيعة التواصل، وهذا ما أدى برشاد إلى القول وكأنه يحتج.
رشاد: يادكتور، صعب
د.يحيى: ما هو كله صعب، والسفر صعب، والـ2500 جنيه اللى انت ضيعتهم فى أسبوع رايح جى صعب، ، ونصين المخ اللى كل واحد راح فى ناحية بعد الشد صعب، والهَبَلْ صعب
رشاد: ما تعرفش حد يادكتور يجيب لنا الـ2500 جنيه دول
د.يحيى: نعم؟ نعم؟ مش انت اللى ضيعتهم ولاّ أنا، حا جيبهم لك منين
رشاد: أيوه، انا بس….
د.يحيى: خلينا نجيب قدهم وأكتر لما تشفى وتشتغل أحسن من زمان ان شاء الله، الأمور حاتاخد شكل تانى أحسن حتى من قبل العيا، بس انت تبطل تلف حوالين نفسك..
رشاد: إمال أنا جاى هنا من الساعة 6.00 ليه؟
د.يحيى: ….، عشان تقول لى نفس الكلام القديم!!!! ده يصح برضه؟
رشاد: لأه، أنا بادوّر على المعرفة مش أكتر
د.يحيى: معرفة؟ معرفة؟ هى هى نفس الكلمة اللى ان باستعملها، بتروح انت مختزلها وهات يا أسئلة ، ولاَ انت عارف يعنى إيه معرفة، أهو كله رص كلام فى كلام، بصراحة المعرفة بالكلام مش حاتوصلنا لأى حاجة فى المرحلة دى ، خلينا نرجع لخبرتك الصعبة نشوف وصلتْ لحد فين: يا ترى إيه أخبارالأُوَضْ، والمِجرى، واللانْصَاص، والحاجات دى
رشاد: انصاص إيه؟
د.يحيى: مخك اللى انشق نصين مرة زى مش عارف إيه، ومرة زى اللبانة المشدودة بين اتنين، والمِجرى اللى بتتملى وتحوّد، والأوض والشنطة اللى مش عايزة تنقفل المحشور فيها الكلام، والباب اللى قـِفْلُه اتكسر ومش عارفين نصلحه، والحاجات دى
رشاد: لأ مفيش
د.يحيى: بتقول إيه؟ !!!
رشاد: مافيش
د.يحيى: راح فين دا كله؟
رشاد: مش عارف، بس مافيش
د.يحيى: راح فين ده كله يعنى؟
رشاد: مش عارف
د.يحيى: الخبرة دى كلها راحت فين
رشاد: مش فاهم
د.يحيى: يا ابنى مش انت اللى قعدت توصف الحاجات دى كلها بالتفصيل
رشاد: مظبوط
د.يحيى: مش برضه يصح نسأل كل الحاجات دى راحت فين
رشاد: اختفت
د.يحيى: اختفت ولا اتصلحت
رشاد: ممكن اتصلحت برضه
د.يحيى: نعم؟ نعم؟ لأ ما تستسهلشى، اختفت ولا اتصلحت
رشاد: ممكن اتصلحت
د.يحيى: هوه ايه الفرق بين اختفت، وبين اتصلحت، يارب خليك؟
رشاد: لو اتصلحت يبقى هى حانستمر على الصحيح
د.يحيى: بصراحة برافوا عليك، أهو ده المختصر المفيد، فيه فرق بين اختفت وبين أتصلحت، لو اختفت يبقى الفركشة زى ما هى بس احنا غطيناها، لكن لو إنها اتصلحت يبقى يعنى اترتبت وبقت ماشية فى السليم.
رشاد: مش فاهم
د.يحيى: مش انت اللى قلت “حانستمر على الصحيح” جرى إيه يا أخى : اختفت يعنى رحنا زقينها جوا زى ما هى والدنيا مفكوكة وطلع بدالها اللماضة بتاع طق الحنك دى، واعرف، ولازم اعرف، ما هو ضرورى أعرف، بدون فايدة
رشاد: ماهى اختفت عشان عدم العلم
د.يحيى: عشان إيه؟
رشاد: عدم العلم
د.يحيى:دلوقتى بتتكلم عن العلم مش إنك “تعرف” وماتعرفشى، وده، أحسن سـِنّه، ما احنا بنحاول يا ابنى أهه نقلب فى العلم الصحيح، العلم اللى بيساعدنا إن الحاجات دى تتصلح مش تختفى، أصلها إذا اختفت حاتنط لنا تانى فى أى وقت متفركشة زى ما هىَّ، خلى بالك إنك ماخفـتش، إحنا كل اللى كسبناه يا ابنى فى المرحلة دى حاجتين: إنك بتيجى هنا فى معادك، يعنى حاسس إن احنا معاك، إننا مع بعض، وإنك بتشتغل، وبعد كده ربنا يعمل اللى فيه الخير
(*) هذا الشرح الطويل نسبيا ليس المقصود منه تفهيم رشاد وحده، لكن ربما دخل فيه عامل تعليمى نظرا لأن الموقف كله ومن البداية هو موقف تعليمى بقدر ما هو علاجى كما ذكرنا، ونلاحظ أيضا أن كلا من “العلاقة” وتوثيقها، ثم الالتزام بالعودة الراتبة للواقع، هما العمودان اللذان ننتحرك فى رحابهما مستندين إليهما، وهذا الفرق بين العلاج بالقمع (الكيميائى أو بتدعيم الميكانزمات)، وبين العلاج بإعادة التشكيل (نقد النص البشرى) هو الذى يميز هذا العلاج الذى يبدأ الاتفاق عليه من أول لحظة فى المقابلة كما لاحظن، ثم نتقل رشاد من التساؤل المعرفى المعقلن، إلى ما أراده الطبيب من التركيز على دفع المسيرة فى ذاتها أكثر من تصنيف الجارى وشرح المراحل، ينتقل رشاد لكنه يظل يسأل
رشاد: طب يادكتور هى لو اتصلحت …؟(يسكت)
د.يحيى: أيوه؟
رشاد: مش لازم بِعِلم برضه
د.يحيى: ياحبيبى يا ابنى، إمال انا باعمل أيه، يعنى انت شايفنى عجلاتى، ما انا باشتغل بالعلم اللى عندى
رشاد: مش هوه علم حضرتك، إنك عندك علم تنفـّذه
د.يحيى: عندى علم آه، بس مش وظيفتى إنى أنفذه يعنى اسمّعه واطبقه واحد اتنين تلاتة، أنفذه يعنى أعيشه واشربه وامارسه، زى أى صنايعى برضه، أنا لسه قايل للدكاترا دلوقتى وقايل لك إن احنا بنحدد الهدف، ونمارس اللى نشوفه صح، نلاقى شوية العلم اللى عارفينه بيساعدنا ويفسر حاجات، ويطنش حادات، ما هو ساعات كتير العلم الجاهز مايقدرش يفسر النتائج، النتائج هى اللى بتأكد العلم اللى عندنا، أو بتخلينا ندور على علم جديد، ونصحح ننفسنا، واحنا بنعيد حساباتنا، العلم مش كتاب بنطبقه ولا محفوظات بنسمّعها، أيه الهبل ده؟ حاتعمل زى شركات الدوا يا شيخ؟
(*) عندى رغبة شديدة أن أترك هذه الفقرة كما هى دون تعليق، برغم من أننى كنت أكلم رشاد طول الوقت، إلا أننى حالا وأنا أقرأ الفقرة وجدت فيها خلاصة المنهج الذى نمارس به العلم إمبريقيا، من واقع فن العلاج، ومزاوجته مع ما يسمى العم، فاسمحوا ألا أعلق، وأن أدعوك عزيزى القارء لقراءتها ثانية، حتى لو انتهيت لما قاله رشاد :
رشاد: مش عارف صراحة
د.يحيى: الله يسامحك ياشيخ، دا انا كنت فرحان إن باوصّل لك اللى مش عارف أوصله للناس، مش عارف؟ إن شالله ما عرفت، لأ آسف، إنت يمكن عارف، بس مش قادر تعبر، (ضحك من الجميع) بصراحة إنت معذور، إذا كان الدكاترة مش عايزن يصدقوا، يبقى انت حاتصدق؟ بس انا باشوف ساعات إن العيانين أجدع، خصوصا لما يتحسنوا، بيصدقوا
رشاد: احنا مش عارفين دلوقتى اختفت ولا راحت
د.يحيى: ما هى أختفت زى راحت، لكن إتصلحت حاجة تانية، واخد بالك، هوّا إيه بقى رأيك: اختفت ولا اتصلحت؟
رشاد: الظاهر إنها اتصلحت
د.يحيى: عارف “الإعداد” اللى انت كنت قلت عليه، أهى إذا كانت إتصلحت يبقى الإعداد كان صح، ولا انت نسيته راخر، ما هو مافيش ضمان للخغغان يا رشاد لواحد زيك جدع إلا إنها تتصلح مش تختفى
رشاد: طب هو يادكتور ينفع يعنى إن أنا أكتب موضوع إنشاء وماعرفش معناه
د.يحيى: آه ينفع طبعا، ساعات حاجات حلوة تطلع من صاحبها وتفضل منوّره التاريخ وصاحبها مابيعرفش معناها قوى ساعة ما تطلع، الناس تقعد تفتش فى معناها مئات السنين، وتطلع منها اللى صاحبها ما خدشى باله منه، يا راجل دا القرآن الكريم بيوصل لوحده زى الفل، ييجى التفسير بقى خد عندك، يا تصيب يا تخيب.
(*) أعتقد أن هذا امتداد أيضا لشرح طبيعة المنهج العلاجى المتبع فى هذه المدرسة، وقد تصورت أنه توجد علاقة ما (نكرر مرة أخرى) بين ما وراء هذا الشرح، وبين اللعبة التى اشرنا إليها سابقا والتى قد ننشرها لاحقا وهى “.. يا خبر دانا لما ما بافهمشى يمكن…….” ، وتظل حيرة رشاد لا تعلن الجهل بقدر ما تعلن الدهشة المعرفية (فى تقديرى) وهو يقول:
رشاد: مش عارف
د.يحيى: باقول لك خبرتى الحقيقية، أعمل لك إيه، أتمنظر بيافطة العلم، ولا بوصاية التفسير؟
رشاد: بس اللى أنا أعرفه غير كده
د.يحيى: هوا احنا حانقيس باللى انت تعرفه، ولا حتى باللى انا اعرفه، مش أنت بتقول علىّ إنت عالم، أهو ده علمى يا أخى، أعمل إيه؟ هو ده علمى، وبنقيس بالنتيجة يا أخى ، الله !!!
رشاد: أنا ماقصُدشى
د.يحيى: يعنى هوه لازم يبقى علمى بطريقتك أو بطريقة بتوع الدوا، هو أنا باشتغل عندك؟ أنا بشتغل عند ربنا
رشاد: لازم معرفة يادكتور
د.يحيى: إنت عامل زى ناظر مدرسة أو مدرس أوّل عمال تفهمنى أذاكر ازاى عشان أنجح، وهو أنا ماباعرفش يا جدع انت؟
رشاد: لازم معرفة، أنا اللى أعرفه إن لازم معرفة..
د.يحيى: أنا عملت اللى علىّ، قلت لك إنك انت معلق على حكاية المعرفة والعلم بالطريقة اللى بتلح بيها دى، اللى كلها ألفاظ مرصوصة أنا خايف انت بالشكل ده تعطلنا عن السكة الصح، أنا مش رافض المعرفة، بس نشوف الأولويات، إنت بتقول لازم المعرفة بطريقتك، وأنا باقول لازم الشغل ونبقى مع بعض ومع ربنا والناس، أما نقعد نلف وندور كلام كلام كلام، ونسميه معرفة، أنا شايف إن دى عَطَلة بالنسبة لحالتك، ثم إن فيه حاجات برضه عملية فى الحياة ما اتكلمناش فيها، إحنا لازم نقيس بكل حاجة، مش بس الشغل اللى ابتدينا بيه الحمد لله، ما انت كنت بتشتغل ميت شغلة قبل كده، وناجح تماما التمام، واتكسرت، يبقى فيه حاجة ناقصة جنب الشغل، إنت مش ملاحظ إن احنا ما اتكلمناش لا عن الحب ولا عن الجنس ولا عن اللى بتعوزك أو اللى انت بتعوزها، زى ما يكون المسألة اتقلبت مكنة باظت وبنصلحها عشان ترجع تشتغل، وخلاص، بصراحة كده ما ينفعشى
رشاد: قصد حضرتك إيه ؟
د.يحيى: مش برضه انت شاب، وراجل، وبقى عندك 33 سنة، مش لازم نشوف مع بعض النيلة اللى أنت فيها دى، زى قلة الحب وقلة الجنس وقلة الونس
رشاد: اللى هى الجواز يعنى؟
د.يحيى: يعنى
…………….
…………….
*****
نتوقف هنا لأن المقابلة تناولت بعد ذلك مسألة العلاقة بالموضوع (الآخر)، والحق فى الاقتراب، ومدى الكبت الذى أحاط بهذه المنطقة.
وهذا ما سوف نتناوله غدا،
بالإضافة إلى التفسير الختامى الذى جاءنى فى آخر بضع صفحات من يومية الغد، فأغنانى عن المناقشة التفصيلية مرحليا.