يحيى الرخاوى طبيب نفسى
نشرة “الإنسان والتطور”
الأثنين: 19-7-2021
السنة الرابعة عشر
العدد: 5070
من كتاب: تزييف الوعى البشرى، وإنذارات الانقراض (20)
بعض فكر يحيى الرخاوى (1)
… عن الحق فى الخوف، وتسطيح الوجدان! (3 من 3)
17- الخوف (2)
(الجزء الأول)
-1-
قالوا يعنى، بحسن نيةْ: “لا تخف”
دا مافيش خطرْ
طب لماذا؟
هوا يعنى انا مش بشر؟
حِيثْ كده، احنَا نقولَّك:
“خافْ وخوِّف”!
فيها إيه؟
-2-
لو ماخفتش مش حاتعمل أى حاجهَ،
فيها تجديد أو مغامرة
لو ما خفتش مش حاتاخد يعنى بالكْ،
حتى لوْ عاملين مؤامرة
لو ما خفتش مش حاتعرف تتنقل للبر دُكْهَهْ
خايف انْ تْبِلّ شعركْ
لو ما خفتش يبقى بتزيـّف مشاعرك
-3-
بس برضه خللى بالك
إوعى خوفكْ
يلغى شوفكْ
إوعى خوفك يسحبك عنا بعيدْ، جوّا نفسكْ
إوعى خوفك يلغى رِقّةْ نبض حسَّكْ
إوعى خوفك ان بكره شرّ حامِلْ
يمنعك إنـَّـك تحاولْ
18- الخوف
(الجزء الثانى)
-1-
بس فيه خوف شكل تانى
قصدى يعنى الجبن إللى يفضِّـى روحك مالمعانى
هوا دا الخوف اللى يمنعنا نعيش
تلقى نفسك كتلة جامدة دايرهْ حوالين المَافيشْ
– يعنى اخاف ولاّ ما اخافشى؟
= إنت حر
– يبقى اخاف بس ما اخافشى!!!!.
= هوا دا قصدى، وما تقولِّيش يا سيدى: “يعنى إيه”.
– يعنى إيه ؟!!!
-2-
إحنا بنخاف ان بكره يبقى أخطر، 
فيها إيه ؟
ما احنا برضه حانبقى أقدر
طب ما نتصرف كِويسْ إلنهارده
ييجى بكره، يلاقى نفسه: إلنهارده بتاع “غداً”
يا حلاوة، تبقى مليان باللـى جَـىّ مقدماً
-3-
يعنى بكره عمره ما يكون ملكنا
إلا باللَى بيجْرَى حالا، أى “هنا”
يبقى خوفنا يتقلب كدا رعب ليه؟!!!
إحنا خلقة ربنا،
يالله نتوكل عليه..!
يعنى يالله نخاف وهوّأ معانا يهْـدِى سرّنا
مش نخاف منّه وننسى إنه غاية قصدنا
ربنا بحق وحقيق،
إللى بيورّى “الطريق”
[1] – المقتطف من كتاب “تزييف الوعى البشرى، وإنذارات الانقراض” بعض فكر يحيى الرخاوى (الطبعة الأولى 2019) وصورته الأولى كانت مقالات فى (مجلة سطور) (من يوليو 1997 إلى يوليو 2006 + 1) والكتاب متاح فى مكتبة الأنجلو المصرية وفى منفذ مستشفى دار المقطم للصحة النفسية شارع 10، وفى مؤسسة الرخاوى: 24 شارع 18 مدينة المقطم، و يوجد بموقع المؤلف www.rakhawy.net وهذا هو الرابط
[2] – يحيى الرخاوى: ديوان “أغانى مصرية: عن الفطرة البشرية للأطفال ó الكبار وبالعكس” (ص 84) (الطبعة الأولى 2017) منشورات جمعية الطب النفسى التطورى
