يحيى الرخاوى طبيب نفسى
نشرة “الإنسان والتطور”
السبت: 31-12-2022
السنة السادسة عشر
العدد: 5600
مقتطفات من: “فقه العلاقات البشرية” (1) [1]
عبر ديوان “أغوار النفس”
العلاج النفسى (مقدمة)
بين الشائع والإعلام والعلم والناس (2)
الفصل الأول
المتن الشعرى
(مجتمـِعاً: ابتداءً)
إعادة ترتيب:
اعتدت أن أنهى ما عنَّ لى من تداعيات وشروح بالنص الشعرى كاملا، إلا اننى عدلت هنا عن ذلك وفضـَّـلت أن أبدأ بإثبات المتن، لعلى أثير فى القارئ (غير المختصّ خاصة) حب الاستطلاع لمتابعة التداعيات والتوضيح – إن أراد – ثم لعل ذلك يخفف من وصاية الشرح الذى يكاد يشوِّهـُه ويفقده شاعريته، لهذا أفردت للمتن مجتمـِعـًا فصلا مستقلا هو الفصل الأول، لإعطائه أولويته وأهميته مستقلا بعيدا عن التداعيات والشرح.
******
أولاً: المتن:
-1-
كل القلم ما اتقصف يطلعْ لُـه سن جديدْ،
”وايش تعمل الكـلْمـَةْ يَابَـا، والقدَرْ مواعيد”؟
خلق القلم مِالعَدَمْ أو راقْ، وِ.. مَــلاَهَا،
وانْ كان عاجبْنٍى وَجَبْ،
ولاّ أتنّـى بعيدْ.
-2-
بصرَاحَـةْ انا خفْتْ.
خـُفتْ منهمْ، خفتْ ”منى”، …. خفت منّــا.
خفتِ مالطوبِ، والطماطم، والملاَمْ والتريقهْ،
خفت مالبيض الممشِّــشْ، والنكتْ، والبحلقهْ.
-3-
قلت انـَا مِشْ قدّ قـَلـَـمِى.
قلت انا يكفينىِ أَلـَمـِى.
قلت أنا ما لى، أنا اسـْترزَقْ واعيشْ،
والهربْ فى الأسْـَتـذَةْ زيّـُــهْ مافــيشْ،
والمراكزْ، والجوايزْ، والـَّذى ما بـْيـنِـْتـهيشْ
قلت اخبِّى نفسى جُـوَّا كامْ كتابْ.
قلت أشـْغـِـلْ روحى بالقولْ والحسابْ.
والمقابلاتْ، والمجالسْ
والجماعةْ مخلَّصـِينـْلـَكْ كل حاجـَةْ، أَيْـوَهْ خـَالـِصْ.
بس بـَرْضـَك وانت “جالسْ”.
-4-
قلت أرسمْ نفسـِى واتْـدَكْـتَـرْ وارُصّ.
قلت أتـفـرَّجْ وِ أَتـْفلسـِـفْ وابــُـصّ.
بس يا عالمْ دا دمْ ولحم حىْ.
أستخبَّى مــنــُّـه فينْ؟
-5-
المريض ورّانى نفسي
المريض خلاّنى أتـْلـَمـْلمْ وافَـكـَّـرْ.
المريض عـَدِّلـِّى مـُخـِّى،
نضَّفُهْ من كل واغشْ، كانوا فارضينُهْ عليهْ.
من ملاعيب اللى بايعْ ذمته بـْمعَـَرفـِشى إيـِهْ.
من شوية آلاتـِـيـَّة، والعَـشـَا الـْ “أوبـنْ بـُوِفـِيهْ”.
-6-
ييجى صاحْبَك “مَـلْط” إلا مالْـحـقيقهْ،
ييجى يزْقُـلـْها فى وشِّى وتـَنُّـه ماشي.
الأصول إنى أعالجـه، واكفى ماجور عالخــبـر”.
”بكره يعقل! بالدواءِ الـمـُعتبرْ”.
بس والله يا عالَــمْ لـَـمْ قِــدِرْتْ.
لَـمْ قِدِرت اعمَى بْـنَوَاضْرى،
حتى لو كان العمى دا”رَأْسـمـَاَلكْ”،
أو كما سـَمـُّـوهْ حديثا “مَـشـِّـى حـَاَلكْ”،
يعنى “طـَنّشْ، إنتَ مالـَك”.ْ
-7-
قلت: إعْقَل يا ابْن نـَفـْسِي.
قلت: حاسِبْ ما الـْفـَضـَايحْ والجُرَسْ.
قلت إدّيها عمَى حيسِى، وزوّد فى الحَرَسْ.
نطّ غَـصـْبـِن عنـِّى، ورّانى إنّـى هوّه.
بس جـــُوّهْ ! ! !
قلت أَخطف نظره عالماشى واغَمَّضْ مِن جديد،
هّيه نظره - واللىّ خَلَقَكْ- لم تَنِيـتْها
-8-
بصيت لقيت الزفــَّـة بتلف الضريح لمْ بطّلت،
وتقول مـَدَدْ!!…،
بـَسّ الـَعـِـماَمةْ اتـْغـَيـَّرتْ:
والحاجات، هى الحاجات الـمِشْ حاجَاتْ.
-9-
الطبيب أصبح مهندسْ للعـُقـَولِ الـَبايْـظَهْ
(يعنِى .. !!)،
واللى برضه اتْصلـَّـحـِتْ.
(الطبيب دا هوّ انا، مش حد غيرى)
اللَّهْ عليهْ، والسِّتْ بـِتـْمسِّى عليهْ!
والشاشةْ، والواقعْ، خـُلاصـْةِ القـَوْلِ، مخْـتَـصَرِ الـَكـَلامْ:
آخـِرْ تمامْ، فـِى حَـلّ مُعـضـِلـَةِ الأنَــــامْ:
”لّما كنا نـَحـْنُ فى عصر الـَقـَلقْ،
”نستعيذُ بربّنا مما خلقْ”،
يبقى لازْمَـنْ كلنا نعمل حسابنا،
وِنـَـدَعِ القلقْ،
يعنى نخمد من سـُكات وانْ كان عاجبنا،
عـَـلـَـشان نعيش
ماهو كله ماشى فى الـْمــَـافـِشْ
ثم إن الحزن برضه ما لوش لزومْ،..طـَـنـــِّـشْ: تعومْ،
ثم إوعـَى انــَّك تنام من غير لحاف
أحسن تخاف
حيث النصيحة “لا تـَخـَــفْ”
فيها السعاده والبلاده، والحياه سكـَّر زياده
ثـُمَّ إنّ اُلأُم لازِمْ إِنـّها تراعى عـِيـَالـْهـَا
بعد ما انــْـفــُـك العقد إللى ف خيالها
يعنى تعمل زى ما بـِـنـْـقـُـولــِّها
مش كما طبيعتها أو من قلبها
فلقد ثبتْ: إن الـعُـَقدْ “وِحـْشـَةْ قوى”!!.
هـَذَا الذى قد أَظـْهـُرُه الـْبـَحـِثِ الـفُلاَنـِى،
”لمّا عدّ التانى ساب الأوَّلانى”.
ثم أوْصَى: “أنْ يكون الكــلْ عالْ.
إذْ لابـُدْ انّ الـُكوَيـِّسْ:
هـُوَّا أحـْسـَنْ مـِالَّذِى مـُا هـُوشْ كُوَيـِّسْ.
إمـَّاِل ايـِهْ؟”
[هذا برنامج “عفاف هانم”،
بـتسأل حضرة الدكتور فلان ]
-10-
وساعات أشوفنى مـِطـيّباتى مُـعْـتَبـرْ،
آه يا حلاوتـُهْ وهـُوَّا بِيـْلبِّـسْ خـُدُوُدهْ الإبْـتسَامةْ،
أو لمّا بِيْـشَـَخـْبـَطْ ويكتبْلَكْ حـُبـُوبْ “منعْ السآمـة”،
أو لما يِوْصف حقنة المُـحـَاياة تقوم تمسح مشاعرك
“بالسلامة”.
-11-
وساعات أشوفنِى كمَا “الأغا”
بيضحّـك المَـلـِكهْ، ويُستعمَـلْ من الظاهرْ، وبَــسْ.
-12-
وساعات جنابهْ يلف أحكامو فْ زواق،
مش أى “حاجةْ”.
يِـفـْـتى كما قاضى الزمان وكأنه جاب المستخبى:
إنّ لازم تبقى بارد: ذوق وخفــَّه:
أحسن ما تبقى صريح يقولوا جتـْله هفــّة،
”كُـنْ منافقْ”، يعنى “جامِلْ”، “مَشِّى حالَك”.
تبقى ماشى فى السليم، مهما جرالكْ.
والعواطف تـِتـْشـَحـَنْ جوّا العيونْ زى البضاعـَهْ.
(كل ساعةْ نُصّ ساعةْ).
”يعنى إيه ؟!؟”
“.. مشْ مُـهِـمْ”.
-13-
والجنازه زفّهْ تـُرقـُصْ عالسـَّرَايـِرْ –
فى البيوت اللى حوالِـيـهـَـا الستاير.
واللى خايفْ من خيالُهْ،
اللى خايفْ مـاِلـْعـَسـَاكـِرْ.. والرقيب،
واللى بيوزَّعْ تذاكر يا نصيبْ ،
واللى بيفَرَّق دوا “ضـِدَّ الذنوبْ”،
واللى ماشـى يـشـقّ فى بطانةِ الجيوبْ.
والعرايضْ، والجرايدْ،
واللىَّ بيرصُّوا الكلامْ؛
”قفْ مـَكـَاَنكْ، أو تــأخـَّرْ لـْلأِمـَامْ”!
بخَّرُوا سـِيـْدنـَا الإِمـَامْ”
”سرْ، بضـَهـْرَكْ…”
والـَعـَرقْ؟: إلكُـوزْ بـِكـَامْ؟..”
-14-
أَمَّا صورهْ مـُرْعـِبـَهْ يا خـَلـْق هـُوهْ.. إلحـَقـُونـِى.
قـُلـْت غـَلـْطـَانْ والـنـَّبـِى يا نـَاسْ سـِيـُبونـِى.
قلت اغـَمَّض تـَانـِى حـَبـَّهْ صـْغـَيـَّرِينْ،.. لمْ قِدِرت.
طبْ حا فتّح ليه يا عـَالـَمْ؟ هـِيَّا فُرْجـَةْ؟!
بصّ لىِ “صاحـْبـَك” ولعـِّبْـلىِ حواجـْبـُهْ،
قال: وقِعْت.
والقلم كـَمّل كإِنى لمْ وِقفت:
-15 –
بقى دى حياتنا يا ناسْ، وِآخْرِةْ صبرنا؟
الحياهْ؟ نـُقـْعد نـِـحَـكِّـى لبعضـِنـَا؟
الحياهْ؟ نُقْعد نـِحـِسّ، نـْـبـُصْ، يـِتـْهـَيـَّأ لـِنـَا؟
طب واحنا فين ”دلوقتى” حالاً “أو هنا”؟
دى المركب الماشـْيـَهْ بِلاَ دَفّهْ ولا مـِقـْلاعْ حَاتُشْرُدْ مِنـّنَا،
واوْعَى الشـُّقـُوقُ تـِوْسـَعْ يا نايم فى الـَعـَسلْ،
لا المَّيهْ تِعْــلَى، تزيدْ، تزيدْ،
.. مّيةْ عطَنْ، تـِكْسِى الجلودْ بالدَّهْنَنَه،
وتفوح ريحتـْها تِعْمِى كلِّ اللـى يحاولْ يـِتلـِفـِتْ ناحيةْ: ..”لمـِاَذاَ”،
أو “لمعنى” يكون ما جـَاشِى فى”الكـِتـَابْ”،
أو لـِلـِّى “جـُوَّه”،…أو نـَواحـِى “ربنا”!
(الرحمهْ يارب العباد: إغفرْ لنِا).
-16-
واللعب دايرْ ليلْ نهارْ لمْ يـِنـْقطعْ،
والسيركْ صـَاحْــبُه واقفْلِى بْيِلفّ العـَصـَا
ويقول بعزّ مـَا فـِيهْ: أهو دا اللى ممكن، واللِّى عاجبهْ!
-17-
أنا مش عاجبْـنى هِـهْ، ولازْمَـنْ يِتْحَكَى،
كل اللى جارى.. لاجْل ما الناس تنتبه قبل الطوفان،
للناسْ..، لكل الناسْ حا قول:
رد الجميل للطير بـِيـْنزِفْ منِ الأَلـَمْ قـُدَّام عـُيـُونى.
قالوا “مريض” لكنه أستاذ الأساتذة كلهم.
علّمنى أشـُوفْ، علّمنى أَصـْحـَى.
علـّمنى ضـَرب النار، بكلمةْ صدق طالعهْ مولـَّعـَةْ.
تحرق عبيد الضَّلمة والتفويت وشـُغـْل الهـَمـْبـَكـَةْ،
وتْنوَّر السكة لإخوانِ الشـَّقـَا،
للى يـقايسْ، للى يـِحـسْ، يـِبـُصْ، يـِتـْجـَرَّأْ، يـُشـُوفْ:
للناسْ .. لكلِّ الناسْ حاقـُولْ ؛
-18-
دا حق كلِّ النَّاسْ يا نَاسْ.
حق اللِّى ورَّانى حقيقتى،
حتى لوكاتْ مش حقيقتى،
[الحقيقة انك تـِدَوَّرْ عالحقيقة.]
دا دين ولازم يندفع،
دا دين عليَّا للى قالهالى وما اقدرشِى يـكمـِّل،
لكنه علـِّمنى، ووصانى أوفـِّى الدين لأصحابه الغلابهْ،
وازاى أنا يا خلق هوه حاحْكـِى وانا غرقان لشوشتي؟
أهو دالـِّـلى كان،
حتى ولو ما كاشفشـى منى إلا خيبتى.
ما قدرتش اسكت،
دا السكات يبقى خيانة للى كان.
هو انا ناقص رجل، ولا ماليش لسان؟
-19-
أنا رايح اقول كلِّ اللى عارفُهْ حتى لو جانِى الفِقِى مــدِّدْنِى
فى الفَلَكَهْ وقطَّعْ جِتــِّــتِى:
إنْ كنت عايْز تلِعَبِ “العَشَرة” وتْبقَى الطَّيبَةْ؛
نكشف وَرَقنَا قبلِ مَا الوَادْ يِتْحَرَقْ،
واللَّى يِبَصَّر “بالبِنَيَّة” يِبْقَى ذَنبِ التَّانىِ عَلَى جَنْبُهْ،
مَالوشْ يزْعلْ بَقَى، مَا كَانْ يشْوفْ!
ما الِّلعْبِ عالمْكشْوُفْ…، أَهُهْ
-20-
لأَّهْ، مانيِش ساكتْ ودِيِنى وْمذهبى،
حتَّى ولو كان اللِّى “مَاتْ” هواّ اللِّى “عاش”، فى عـُرْفـُكم
لأَّهْ، مانيِشْ مَيِّت حَاعيش:
وســــــَّـــع بقى..!!
-21-
القلم صحصح وِنَطّ الحْرف منُّه لْوَحدُه بِيخزّق عِينَىَّ،
وابْتْدا قَلمِى يِجَرّحنى أنا.
قالِّى بالذمَّةْ:
لو كنت صحيح بنى آدمْ ،.. بـِـتـْحِسْ،
والناس قدّامك فى ألـَمُهمْ، وفْ فَرَحْتِهُمْ،
وفْ كسْرتهم، وفْ ميلة البخْتٌ،
مشْ ترسـِمـْهُم للناسْ؟
الناس التانيهْ ؟
إٍللى مِشْ قادْرَهْ تقولْ: “آه”، عَنْدِ الدَّكْتورْ.
أصل “الآه” المودَهْ غاليهْ،
لازمْ بالحَجْزْ،
لازمْ بالدورْ.
مش يمكن ناسْنا الَغْلبَانَهْ إِللى لِسَّه “ما صَابْـهَاشِ” الدورْ.
ينتبهوا قبل الدُّحْدِيرَةْ – قبل ما يغرقُوا فى الطينْ.
ولاّ السَّبُّوبه حَاتتعْطَّلْ لَو ذِعْت السِّر؟
ولاّ انْتَ جَبَان؟
-22-
بصراحة انا خـُفـْت.
خفت من القلم الطايح فى الكلّ كـِلـِيلـَهْ
حيقولُوا إٍيه الزُّمَلاَ المِسْتَنِّيَهْ الغلْطَهْ؟
حيقولوا إيه العُلَماَ المُكْـــنْ
(بِسْكون عَالْكَافْ .. إِوعَكْ تغْلَطْ)
على عالِم، أو مُتَعَالم: بيقولْ كَماَ راجِل الشَّارع
-23-
القلم اتهز فْ إيدى،
طــلــَّـعْ لى لسانُهْ،
ما يقولوا!!:
حد يقدر يحرم الطير من غُـنَـاه؟!
من وليف العش، من حضن الحياةْ ؟!
تطلع الكلمهْ كما ربِّى خلقْها،
تطلع الكلمةْ بْعَـبلْها،
تِبْقَى هىَّ الِكْلمة أَصْل الكُونْ تِصَحِّى المِيِّتِيْن.
والخايفْ يبقى يوسَّعْ ،
أَحْسن يطَّرْطـَش،
أو تيجى فْ عينه شرارة،
أو لا سـَمـَحَ الـلّه
يِكْتِشِفِ انُّه بِيْحِسْ.
………….
………….
ونواصل الأسبوع القادم
ــــــــــــــــــــــــــــــــــــــــــــــــــــــ
[1] – يحيى الرخاوى: (2018) كتاب “فقه العلاقات البشرية (1) (عبر ديوان: “أغوار النفس”) “العلاج النفسى (مقدمة) بين الشائع والإعلام والعلم والناس”، الناشر: جمعية الطب النفسى التطورى.
طوال القراءة وأنا حاضرني تعبير د.يحيى من ديوان سر اللعبة
يا ويحى من هول الرؤية!!!
فيه قضية جوهرية شاغلاني قوي قوي قوي اليومين دول . او تقدر تقول بقالها كثير قوي مش اليومين دول بس .
القضية هي لغز الحياة بصراحة .
من خلال تجربتي المتواضعة جدا عبر عشرات السنين ( عمري الآن ٦٤ سنة ). في بلاد الله خلق الله . اعيش الآن في الغرب منذ عام ٢٠٠٣ اي قرابة عشرون عاما .
احاول ان اركز في الحياة الحياة واعمل نفسي مش واخذ بالي من اللي جاري بس غصبن عني بالاقيني وآخذ بالي قوي .
قابلت الكثير جدا من البشر علي كل لون . وبصراحة لقيت ناس كثير قوي في كل مكان حلوين قوي . عايشين بجد. بس مشكلتي كانت دايما هي في الناس اللي راكبين في القطر اللي خرج عن القضبان . ودول اكثر بكثير قوي من الناس الكثير قوي الحلوين قوي.
فقلت يا واد اعقل بقي واهمد ما هو الناس الحلوين قوي لسة كثير قوي زي ما انت قلت وشفت.
فالاقي نفسي غصبن عني ثاني بابص من برة علي ارادات الانقراض اللي شغالة علي عينك يا تاجر . من اول القوي الكانيبالية العدمية المتغطرسة . الي الموات الظاهر والكامن من مدعي كل الاديان وقولهم ليس فعلهم . الي انفلات الغرائز الاولية البشعة التي هي اقبح من اي حيوان غير ناطق . الي جبال التشويه البشع لمعظم الناس هنا وهناك .
ثم ارجع الي نفسي واقول . للكون رب خلقه ويعلم وبيده الملك وهو علي كل شيء قدير.
اقول لنفسي “” وانت مالك “”.
بس ارجع اقول ما هو غصبن عني مش قادر ما ابطلش ابص .
واحاول ادور علي الناس الحلوين قوي اللي هما لسة كثير قوي .
ربنا يستر وطوفان العدم يلحق الناس الحلوين قوي يوقفوه . ولو اني مش متأكد ومش مطمن .
بس يقيني ان الحياة ستنتصر حتي ولو هلك او انقرض هذا الانسان .
الحياة قيمة في حد ذاتها تتجدد بمبدعها .
فالاقي الرد . “” هو يحي ويميت وهو علي كل شيء قدير “”.
وارجع اتساءل :- ما هو لغز الحياة ؟؟