يحيى الرخاوى طبيب نفسى
نشرة “الإنسان والتطور”
الأثنين: 24-11-2014
السنة الثامنة
العدد: 2642
الأساس فى الطب النفسى
الافتراضات الأساسية: الفصل الخامس:
ملف الوجدان واضطرابات العواطف (44)
اضطرابات الوجدان (العواطف) (10)
الاضطرابات الوجدانية: كمِّـيا (8)
ثانيا: الانفعالات العسرة: (7) (استطراد)
شاركونا فقد يشتعل الحوار
مقدمة:
بعد أن وردنى كل هذا الكم من التعليقات، وإن كانت قد وردت تحت قهر مرفوض منى، ومنهم غالبا، فكرت أن أجذب الاهتمام أكثر بالبدء فى طرح أسئلة تتعلق بالموضوع مع أو قبل مناقشته أو التنظير حوله، لعل فى ذلك ما يثير حماس المشاركين ويقلل من درجة اعتماديتهم، أو اضطرارهم.
اليوم سوف أطرح مجموعة من الأسئلة حول الحزن ثم “لعبة” نفسية مطلوب إكمالها:
أما الأسئلة فهى التى أعددتها لتطرح على الضيوف بعض الشخصيات المهمين إعلاميا أو فنيا فى برنامج “أقلب الصفحة”(1)
أما “اللعبة” فهى التى مارستها مع متطوعين أسوياء فى برنامج “سر اللعبة” (2)
وكل من الأسئلة واللعبة عن “الحزن” موضوعنا الممتد
وبالنسبة للأسئلة على الأصدقاء أن يجيبوا على بعضها (أو كلها) مع ذكر رقم السؤال.
أما بالنسبة للعبة فالمطلوب هو المشاركة فى العشر لعبات لأنها تكمل بعضها البعض.
أولاً: الأسئلة من برنامج “أقلب الصفحة“:
(1) هوا الحزن دا مش جزء لا يتجزأ من حياتنا ؟ واللا انت رأيك ايه؟
(2) هو إمتى الحزن يبقى ميزة، وإمتى يبقى مرض من وجهة نظرك؟
(3) يا ترى فاكر أكتر وقت حزنت فيه على حاجة خاصة؟ كان إمتى وليه؟
(4) طب على حاجة عامة؟
(5) هوا احنا لينا حق نحزن حتى من غير سبب ظاهر أو معروف؟
(6) مش يمكن انت بتخاف تسمح لحزنك الطبيعى لحسن ما تستحملوش؟
(7) لما تشوف حد عزيز عليك حزين ، تحاول قوام إنه ينسى حزنه، ولا تصبر عليه لحد ما يعيشه، ويمكن يقرب هوا؟
(8) إحنا ليه ما بنستحملشى نشوف عيالنا حزانى شوية، هو الطفولة ما فيهاش حزن ولا إيه؟
(9) مش يمكن إحنا إللى ما بنستحملشى نشوفهم حزانى، عايزينهم على طول هايصين نفرح بيهم، والله أيه رأيك؟
(10) إمتى تفتكر إنك حزنت على حاجة عامة أكتر ما حزنت على حاجة خاصة؟
(11) لما بتكون حزين بتحس إنك عايز تقرب من الناس؟ ولا عايز تختفى بعيد عنهم؟
(12) “إللى بيعرف يحزن، هوااللى بيعرف يفرح”، إيه رأيك فى الحكاية دى: صح ولا غلط؟
(13) طيب لو جينا نطبقها عليك شخصيا تقول إيه؟
(14) هوا الحزن أنواع ؟
(15) فيه نوع من الحزن مر بيك، أو شفته عند حد قريب منك، وحسيت إنه قبيح ومرفوض لدرجة إنك ما تعاطفتش معاه؟
(16) فيه ناس بيتكلموا على الحزن الشريف، والحزن الزنان ؟ تفتكر فيه حاجة زى كده؟
(17) هوه إمتى الحزن يبقى مفيد من وجهة نظرك؟
(18) هوه كل ما حد يحزن ، الدكاترة يعلقوا عليه يافطة اكتئاب؟ إيه رأيك؟
(19) طب يا ترى ممكن تجرب كده تسيب نفسك تحزن، من غير ما تلزقه فى أى سبب ظاهر؟
(20) يا ترى عندك حاجة بالنسبة للحزن ما قلناهاش تحب تتكلم فيها ؟
*******
ثانياً: برنامج سر اللعبة (القناة الثقافية)
شرح الفكرة والتعليمات:
“إن استعمال كلمة “لعبة” هو استعمال خاص مفيد، ونعنى به آلية ينطلق من خلالها الخيال وتنشط التلقائية فالكشف، وهى مزيج من المينى دراما، واحتمال تحريك الوعى على أى مستوى، كم أنها تتضمن المشاركة فى تأليف (إكمال) النص.
المطلوب إن كنت ترغب فى المشاركة هو:
- أن تُكْمل العبارة المقترحة (بعد تلاوتها مباشرة بصوت عالٍ):
- بأقل قدر من التفكير (الوصىّ)
- وبأكبر قدر من التمثيل (مشتملا الوجه والعيون والجسد).
- تلعبها وأنت وحدك (جائز)، ويا حبذا مع آخر أو أخرى أو آخرين
- لا تحاول أن تسارع بفهم أو تفسير ما قلتَ.
لعبــة “الحق فى الحزن”
مثال توضيحى
الناس غاوية حزن………………وانـــَـا….
مثال للإجابة :
الناس غاوية حزن….وانــا …برضه زيهم!!!
الألعاب العشرة:
1- أنـ ما باحبّش أحــزن ..، ولكن ……………… …………………………… (أكمِلْ)
2- أنـا احزن على إيه ولاّ على إيه…، ماهو……… …………………………. (أكمِلْ)
3- الـودّ ودى ما احزنشى من أصله..، لكن ………. …………………………. (أكمِلْ)
4- ما فيش مانع انى أبيّن حزنى..، على شرط……… ………………………. (أكمِلْ)
5- إللى يشوف ده وما يحزنشى،.. يبقى………………….. …………………… (أكمِلْ)
6- الحزن الساخط يجوز يكون كفر بنعمة ربنا…، ولكن ……………………. (أكمِلْ)
7- أنا من حقى أحزن …، حتـى لــو ……………. …………………………… (أكمِلْ)
8- الحزن جواىَ قوى….، وانا لازم……………….. ………………………… (أكمِلْ)
9- مش لازم الحزن يبقى له سبب… ، إنما؟……………………………………. (أكمِلْ)
10- أنا لو سمحت للحزن إللى مخبّيه جوّايا يطلع كله..، يتهـيـّأ لى إن………… (أكمِلْ)
وبعد
أرجو الا يكون التنظير السابق فى حلقات الأسابيع الماضية قد أثر على إجاباتك،
وما يطمئننى هو ترجيحى بأن الأكثرية لم يقرأوا النشرات أصلا،
وهذا من أروع مزايا الكسل.
[1] – أذيعت حلقة “الحزن” فى برنامج “أقلب الصفحة” – فى رمضان 2006 – قناة MBC.
[2] – أذيعت حلقة “الحزن” فى برنامج سر اللعبة – بتاريخ 5-3-2004 – قناة النيل الثقافية، وقد نعود لعرض ومناقشة الاستجابات، ويمكن مشاهدتها فيديو فى الموقع.