يحيى الرخاوى طبيب نفسى
“يوميا” الإنسان والتطور
1-7-2008
العدد: 305
ملف الحب والكره
نحن نخاف من الحب،..!! وننكر الكراهية!! إذن ماذا؟
لا أظن أن أحداً من الأصدقاء الذين شاركونا، والذين تابعونا ونحن نفتح هذا الملف يمكنه أن يحتمل بعد الآن مزيدا من نشر الاستجابات المتنوعة دون تعليق أو مناقشة، كما أننى أعتقد أن المادة التى تجمعت حتى الآن بالنسبة للعبة الكراهية -برغم أنها غير مُمَثِلة بدرجة تسمح بالتعميم-، قد أصبحت كافية لمناقشة التجربة فى حدودها المتواضعة
وحتى نقفل مرحلة نشر “النصوص”، سوف نقوم بنَشْر ما تبقى لدينا مرة واحدة بعد الإشارة إلى ما سبق نشره على الوجه التالى:
|
العدد |
التاريخ |
اسم المقالة |
| 264 | 21- 05- 2008 | لعبة الكراهية (النص الأصلى: عشر لعبات من برنامج سر اللعبة) |
| 270 | 27- 05- 2008 | الاستجابات على لعبة الكراهية “كل مشاركٍ على حدة” بدون تعليق |
| 271 | 28- 05- 2008 | قراءة فى قيمة الكراهية من خلال الاستجابات: لعبة بلعبة
(ليس تحليلاً أو تفسيراً) |
| 277 | 03- 06- 2008 | تجارب تحريك الوجدان لإعادة النظرمقدمة للرد على حوارات لعبة الكراهية |
| 284 | 10- 06- 2008 | وتعلّم: كيف تكره (1)البحث عن تفعيل الكراهية فى العلاج الجمعى |
| 285 | 11- 06- 2008 | وتعلم: كيف تكره (2)“يمكن لمّا أعرف أكرهك أقدر..” |
| 291 | 17- 06- 2008 | الفروض الأساسيةالافتراضات الأساسية حول: “جوهر الكراهية” |
| 292 | 18- 06- 2008 | نصوص أخرى جديدة: استجابات أصدقاء الموقع |
| 298 | 24- 06- 2008 | (تابع الملف!!).. عن الحب والكره (5)“.. كرة الثلج” تتنامى، ثم عينّة ذاتية! |
لكن تبقى لدينا مجموعتان من حق الأصدقاء الذين تفضلوا مشكورين بالمشاركة أن ننشر استجاباتهم.
الأولى: ما تبقى من استجابات على اللعبات العشر.
الثانية: استجابات الأصدقاء من الأسوياء على تلك اللعبة الواحدة التى جرت فى جلسة العلاج الجمعى.
وهما موضوعنا اليوم، ولا يتبقى إلا الاستجابات الأصلية كما جرت فى برنامج “سر اللعبة” (قناة النيل الثقافية) (ننشرها أو لا ننشرها) كما تشاؤون، فهى فى الموقع مع ما دار بعدها.
ثم نبدأ النقاش.
آسف فعلا، ولكن يبدو أنها قضية شديدة الأهمية، ذلك أن فتح هذا الملف جعلنى أرجع إلى مكتبتى غير المنظمة فأكتشف جهلى كالعادة، وأن ما نطرقه الآن قد سبق تناوله بالطول وبالعرض،
الجديد فى محاولتنا نحن أنها مرتبطة بهذه الخبرات العملية فى ثقافة مختلفة.
خذ – بعض ما عثرت عليه- على سبيل المثال لا الحصر
كتاب: الحب والكره
Love and Hate
Irenaus Eibl Eibesfeldt, Translated from the German by Geoffrey Strachan, 1971.
وهو كتاب تناول القضية من منظور تطورى مقارن.
كتاب: فن الحب: إريك فروم ، ترجمة مجاهد عبد المنعم مجاهد،1980، مكتبة الأنجلو المصرية، الطبعة الأولى للكتاب عام 1956 .
وهو كتاب قدم نقدا متواضعاً و أفكاراً جديدة تتفق مع موقف كاتبه، وأيضا تاريخ النشر وملابساته.
كتاب : العدوان
Aggression
Anthony Storr, Atheneum Publishers, New York, 1970.
وهو كتاب مثل أغلب كتب Stoor (عن يونج مثلا وعمق العملية الإبداعية)، فيه جرأة وإبداع، أعاد لإيجابية العدوان بعض ما تستحق؟؟
كتاب العواطف:
Emotion A Psychoevolutionary Synthesis,
Robert Plutchlk, Albert Einstein College of Medicince, 1980.
وهو الكتاب الأصل الذى عرضنا من خلاله عددا من التعريفات لماهية الوجدان يومية 14-11-2007 ، 17-11-2007، 18-11-2007
كتاب: إرادة أن تكون إنسانا
The Will to be Human
Silvano Arieti, 1972.
كتاب: الحب والإرادة
Love And Will, Rollo May,
- w. Norton & company. Inc, New Yor, 1969.
وهو كتاب شديد الأهمية لم يقتصر على منظور التحليل الوجودى الذى يعتبر المؤلف من رواده، ولم يتناول الكره بشكل مباشر لكنه فى صلب القضية.
هذا فضلا عن كتب التطور الأخرى التى تناولت نمو الانفعالات والعواطف منذ أن كتب عنها داروين،
وقد فوجئت – إلا قليلا- أن هذه القضية (الكراهية بالذات) مطروحة للنقاش والمراجعة بشكل جاد متكرر عبر التاريخ، وبرغم عدم حداثة ما عثرت عليه –كعينة- فقد وجدته أقرب كثيرا مما يشغلنى الآن، كما وجدتنى قد خططت وهمشت كثيرا من الفقرات، وتعجبت كيف أهملت أو نسيت ذلك كله وأنا أبدأ هذه التجربة.
يبدو أن صعوبة التواصل بين البشر قد جسدت القضية بشقيها بشكل استدعى كل هذه المراجعات (كما أشرنا فى يوميات) [الخوف من الحب (1)] 7-10-2007، الخوف من الحب (2) “مَنْ” يحب “مَنْ”…؟ 8-10-2007،
- نحن نخاف من الحب .. ونخفى الكره.
- نحن نخاف من العدوان ونبتذل الجنس.
- نحن نخاف من الإيمان ونشوه الدين .
- نحن نخاف من القدر ولا نؤمن بالغيب.
قضايا كلها جديرة بالاقتحام من جديد.
ماذا وإلا !!
نصوص نشرة اليوم:
الجزء الأول:
الألعاب العشر
بقية المشاركين :
أ. لبنى الغلايينى:
1) أنا بخاف أضبط نفسي بكره حد بحبه عشان كده بحب بشويش
2) ايه حكاية اللي يحب مايكرهش دي دانا بيتهيألي ان اللي يحب قوي هو اللي بيكره قوي
3) بصراحة مش كل كره كره أنا شخصيا لما أكره بابقى حزينة وعصبية ومتشائمة
4) يمكن اللي بيعرف يكره هو اللي بيعرف يحب دا لو كده أنا ماحبيتش ناس كثير
5) أنا يمكن باكره ناس كثير بس صعب أعترف لنفسي بده، أصل أنا مااعرفش ان كان ده كره ولا حاجة تانية
6) لما باحس ان حد بيكرهني من غير مايعرفني بابقى نفسي أتجاهله بس ماباقدرش أعمل كده عشان ماوريهوش اني ردة فعل وكمان عشان مايفرحش بانه صح فبعرفه بنفسي أكثر بس بافضل حذرة ويمكن ماقربش منه أكثر وأقرر أفضل بعيدة على طول .
7) اللي بيكره عمال على بطال دا بيكره نفسه دا حتى أنا باعتقد انه ماواجهش نفسه بصدق، هو بيعمل كده ليه؟
8) كره الظلم وبس من غير غضب وفعل قلته أحسن أنا لو باكره الظلم بصحيح ماظلمش
9) أنا بيتهيألي ساعات إني مااقدرش أكره حد أعرفه كويس وده يمكن عشان تعلمت ان الكره للأعداء بس، وان الكره عيب وحرام عشان كده باتكسف وباخاف أضبط نفسي متلبسة
10) اللي عايز يكره يتحمل مسئولية الكره عشان كدا أنا بخاف أكره بجد .
د. مجدى السيد
1) أنا باخاف اضبط نفسى باكره حد باحبه، عشان كده…ما بافكرش فى الغلط اللى بيعمله أى حد باحبه
2) إيه حكاية اللى يحب ما يكرهِشى دى، دانا بيتهيأ لى …ان اللى بيحب سهل يكره عشان هو سهل يسامح
3) بصراحة مش كل كره كره، أنا شخصيا لما اكره …باكره بمقدار وباحتفظ بالباقى فى خزان كله مليان بالحب
4) يمكن إللى بيعرف يكره، هوه إللى بيعرف يحب، دا لو كدا أنا: اكره! أحب!.. مش فارقه بقى طول ما فيه سماح
5) أنا يمكن باكره ناس كتير بس صعب اعترف لنفسى بده، أصل انا …عايش بالميكانزمات
6) لما باحس إن حد بيكرهنى من غير ما يعرفنى بابقى نِفسى…أواجهه
7) اللى بيكره عمال على بطال دا بيكره نفسه، دا حتى أنا…حتى لو باكره عمال على بطال أكيد حاكره نفسى
8) كره الظلم وبس من غير غضب وفعْل، قلته أحسن، أنا لو باكره الظلم بصحيح…أروح بقى أحارب فى فلسطين
9) أنا بيتهيأ لى ساعات إنى ما اقدرشى أكره حد اعرفه كويس، وده يمكن عشان…أنا باقنع نفسى ان أنا أعرفه كويس لدرجة إنى مش صح إنى أكرهه
10) اللى عايز يكرهْ يتحمل مسئولية الكره..، مستعد أكره فى أى وقت
أ. محمد غنيمى
1) أنا باخاف لما اضبط نفسى باكره حد باحبه، عشان كده مش بافكر فى الحكاية دى خالص.
2) إيه حكاية اللى يحب ما يكرهِشى دى، دانا بيتهيأ لى اننا علشان ندوق حلاوة الحب لازم نحس اد ايه الكره دا شىء قبيح حتى لو اضطرينا له فى وقت من الاوقات.
3) بصراحة مش كل كره كره، أنا شخصيا لما اكره باحس انى معايا حق فى دا.
4) يمكن إللى بيعرف يكره هوه إللى بيعرف يحب، دا لو كدا أنا ابقى فالنتينو.
5) أنا يمكن باكره ناس كتير، بس صعب اعترف لنفسى بده، أصل انا باحاول اهرب ساعات
6) لما باحس إن حد بيكرهنى من غير ما يعرفنى بابقى نِفسى اقتله.
7) اللى بيكره عمال على بطال دا بيكره نفسه، دا حتى أنا عمرى ما اعمل كدا ابدا.
8) كره الظلم وبس من غير غضب وفعْل ، قلته أحسن، أنا لو باكره الظلم بصحيح يبقى لازم اختار المسؤول اللى ما يظلمش وبيكره الظلم هو كمان، حتى لو مش هاخد كيلو لحمة او علبة حلاوة او 100 جنيه.
9) أنا بيتهيأ لى ساعات إنى ما اقدرشى أكره حد اعرفه كويس، وده يمكن علشان باخدع نفسى كتير.
10) اللى عايز يكرهْ يتحمل مسئولية الكره، عشان كده أنا هاشيل ايدى من الموضوع دا نهائى
أ. إيناس
1) أنا باخاف لما اضبط نفسى باكره حد باحبه، عشان كده…عمرى ما كرهت حد.
2) إيه حكاية اللى يحب ما يكرهِشى دى، دانا بيتهيأ لى…إن الكره موجود (اللى يحب بجد عمره ما يعرف يكره).
3) بصراحة مش كل كره كره، أنا شخصيا لما اكره…مش ممكن أسامح.
4) يمكن إللى بيعرف يكره، هوه إللى بيعرف يحب، دا لو كدا أنا…أحاول أكره حد.
5) أنا يمكن باكره ناس كتير بس صعب اعترف لنفسى بده، أصل انا…لو كرهت حد مش ممكن أتواجد معاه أصلاً.
6) لما باحس إن حد بيكرهنى من غير ما يعرفنى بابقى نِفسى…أقوله حسبى الله ونعم الوكيل فيك، هو أنت تعرفنى أصلاً.
7) اللى بيكره عمال على بطال دا بيكره نفسه، دا حتى أنا…شايفه كده.
8) كره الظلم وبس من غير غضب وفعْل، قلته أحسن، أنا لو باكره الظلم بصحيح… أحاول أغيره.
9) أنا بيتهيأ لى ساعات إنى ما اقدرشى أكره حد اعرفه كويس، وده يمكن عشان…عارفاه كويس.
10) اللى عايز يكرهْ يتحمل مسئولية الكره..، عشان كده أنا…مش قد الكره اللي بجد.. شايفه أن الكره مسئولية زى الحب وصعب الإعلان عنه.
الجزء الثانى:
اللعبة المنفردة من العلاج الجمعى (يلعبها أسوياء متطوعون)
“.. يمكن لمّا اعرف أكرهك أقدر…”
المجموعة الأولى :
مجموعة أصدقاء لعبناها معاً فى مواجهة سريعة، تماما كما تمت فى العلاج الجمعى 10-6-2008، وكنت أحدهم.
(لاحظ أن اللاعب يلاعب نفسه آخر واحد كما حدث فى العلاج الجمعى).
وقد سبق أن نشرت استجابتى شخصيا فى يومية 24-6-2008
أ. حافظ:
يا د. يحيى يمكن لما أعرف أكرهك ؟ أتلخبط واغير رأيى فى قيم كتير
يا قدرى يمكن لما أعرف أكرهك أقدر أدبحك بسكينه تلْمه
يا يوسف يمكن لما أعرف أكرهك أقدر اكسّر دماغك
يا هالة يمكن لما أعرف أكرهك أقدر اعتبرك أختى
يا أمل يمكن لما أعرف أكرهك أقدر اعرف حدودك أكتر
يا مدام فوزية يمكن لما أعرف أكرهك اتوحِدْ أكتر وأنا مش ناقص
يا حافظ يمكن لما أعرف أكرهك أقدر اكتشف نفسى على حقيقتى
أ. أمل:
يا مدام فوزية يمكن لما أعرف أكرهك يبقى مش حاعرف أحب حد
يا حافظ يمكن لما أعرف أكرهك أقدر اتناقش معاك فى حاجات كتير قوى
يا د. يحيى يمكن لما أعرف أكرهك أقدر أبطل آجى الندوات أو أقرا اليوميات
يا قدرى يمكن لما أعرف أكرهك أقدر مانبقاش أصحاب
يا يوسف يمكن لما أعرف أكرهك أقدر أمنعك انك تهزر معايا
يا هالة يمكن لما أعرف أكرهك يبقى مافيش حد يتحب فى الدنيا
يا أمل يمكن لما أعرف أكرهك كنت انتحرت وخلصت
قدرى:
يا يوسف يمكن لما أعرف أكرهك أقدر اعرف أقولك عن رأيى فيك بصراحة
يا مدام هالة يمكن لما أعرف أكرهك أقدر —-
يا أمل يمكن لما أعرف أكرهك أقدر اعرف اوصلِّك حبى
يا مدام فوزية يمكن لما أعرف أكرهك أقدر اقولك عن رأيى فى الدكتور يحيى
يا حافظ يمكن لما أعرف أكرهك أقدر اقولك رأيى فيك بصراحة
يا د.يحيى يمكن لما أعرف أكرهك أقدر أقولك اللى بيوصلنى من كتاباتك
يا قدرى يمكن لما أعرف أكرهك أقدر اعرفك أكتر
فوزية:
يا د. يحيى (زوجها) يمكن لما أعرف أكرهك أقدر أضربك
يا قدرى يمكن لما أعرف أكرهك أقدر احتويك
يا هالة يمكن لما أعرف أكرهك أقدر اطّمن ليكى أكتر
يا أمل يمكن لما أعرف أكرهك أقدر أقرب ليكى اكتر
يا يوسف يمكن لما أعرف أكرهك أقدر أحبك أكتر
يا حافظ يمكن لما أعرف أكرهك أقدر أتونّس بيك
يا فوزية يمكن لما أعرف أكرهك أقدر أقتلك
أ. هالة:
يا د. يحيى يمكن لما أعرف أكرهك أقدر أحب أبويا أكتر
يا قدرى يمكن لما أعرف أكرهك أقدر أكون عملية أكتر
يا يوسف (زوجها) يمكن لما أعرف أكرهك أقدر أخلَصْ من القهر اللى باعيشه معاك
يا أمَْل يمكن لما أعرف أكرهك أقدر اكون صادقة اكثر فى مشاعرى
يا طنط فوزية يمكن لما أعرف أكرهك أقدر ما احسش بالافتقاد اللى باحس بيه دلوقتى
يا حافظ يمكن لما أعرف أكرهك أقدر ارد على الشقاء اللى باعيشه دلوقت
يا هالة يمكن لما أعرف أكرهك اقدر أتربى أكتر شوية
أ. يوسف عزب:
يا هالة (زوجته) يمكن لما أعرف أكرهك أبقى حنين عليِك
يا قدرى يمكن لما أعرف أكرهك أقدر أبطل أكرهك
يا د. يحيى يمكن لما أعرف أكرهك أقدر أعرف أصاحبك
يا أمل يمكن لما أعرف أكرهك أقدر أعرف اشوفك كويس
يا مدام فوزية يمكن لما أعرف أكرهك أقدر أتعرف عليك
يا حافظ يمكن لما أعرف أكرهك أقدر أعرف اصاحبك
يا يوسف يمكن لما أعرف أكرهك أقدر أعرف أحبك
د. يحيى:
يا حافظ يمكن لمّا أعرف أكرهك أقدر مارْهِقَكْشِ قوى كده
يا فوزية (زوجته) يمكن لمّا أعرف أكرهك أقدر أخفى ألمى ليكى شوية
يا أمل يمكن لمّا أعرف أكرهك أقدر ما احسسش عليكى قوى
يا يوسف يمكن لمّا أعرف أكرهك أقدر أبطل أمل فيك للدرجة اللى بترهقك دى
يا قدرى يمكن لمّا أعرف أكرهك أقدر أكمل ضغط عليك قوى
يا هالة يمكن لمّا أعرف أكرهك أقدر أحب ناس كتير أكتر
يا يحيى يمكن لمّا أعرف أكرهك أقدر نعرف ربنا احنا الاثنين أحسن
ثانيا: استجابات وصلت إلى الموقع
2- وصلنا فى الموقع :
الأستاذة/ أنيسة (بعد احترام التحفظات):
يا مجدى يمكن لما أعرف أكرهك أقدر اقوْلها وأواجهك برأيى الحقيقى بدون خوف ومن غير تأنيب فى نفسي
ياأحمد يمكن لما أعرف أكرهك أقدر ما اخافش اقرب منك وأحبك بجد
يا محمد يمكن لما أعرف أكرهك اقدر اقبلك بعيوبك و من غير ما ارسملك صورة مش حقيقية
ياشيماء يمكن لما أعرف أكرهك أقدر اقرب منك
يا عمر يمكن لما أعرف أكرهك أقدر احبك اكتر من نفسي
د. مدحت منصور:
يا محمد يمكن لما أعرف أكرهك أقدر أتحمل قذارتك.
يا منى يمكن لما أعرف أكرهك أقدر أعرفك على حقيقتك.
يا دكتورأحمد يمكن لما أعرف أكرهك أقدر أفشل جدا في أني أكرهك و كمان أقدرك.
يا زينب يمكن لما أعرف أكرهك أقدر أبطل أكرهك رغم الشعور في اللحظة دي بأني باكرهك زائد النار اللي حسيتها لأني حاشوف قد إيه إنتِ تافهة.
يا دكتور يحيى يمكن لما أعرف أكرهك أقدر أبطل اترعب منك كل ما شوفك وحاتكون النتيجة إني حاحبك أكتر.
يا مدحت يمكن لما أعرف أكرهك يمكن أقدر حعرف سر قوتك وعظمتك.
أ. هالة:
يا محمد (زوجها) يمكن لما أعرف أكرهك أقدر أتونس بيك أكتر
يا عم يحيى يمكن لما أعرف أكرهك أقدر أفك من كلبشتى فيك
يا ميسون يمكن لما أعرف أكرهك أقدر أشيل عنك شوية
يا كارولين يمكن لما أعرف أكرهك أقدر أقولك اللى فى نفسى
يا حافظ (صديقى) يمكن لما أعرف أكرهك أقدر أصاحبك بصحيح
يا هالة يمكن لما أعرف أكرهك أقدر أبقى أطيب
وبعد:
أثناء إعدادى هذه اليومية، وبمراجعة كل النصوص، أحسست أننى اكتشفت كنزا،
لكننى فى نفس الوقت أحسست بحجم الورطة،
فإذا كان تعميم نتائج هذه التجربة غير جائز ففيم المناقشة؟
وإذا كانت العينّة غير ممثِّلة، فلماذا كانت المحاولة؟
ومع ذلك هو كنز معرفىٌّ بشكلٍ ما.
ننتظر لنرى.
من يدرى؟!