يحيى الرخاوى طبيب نفسى
اليوم السابع
السبت: 11-1-2014
.. لا الدِّمْعَه بْتِنْزِلْ، ولا راضية تْجِفّ
قالت البنت لأخيها: خلاص يا عم مافاضلشى إلا كام يوم
قال أخوها: على إيه؟
قالت: على الاستفتا
قال: ما احنا عمالين نستفتى عمال على بطال
قالت: إنت بتستعبط؟
قال: باستعبط ليه، هوا احنا بطلنا استفتا
قالت: يا سيدى، اعتبرنا كنا بنسخن
قال: يا صلاة النبى!! يعنى احنا على كده بقالنا تلات سنين بنسخن
قالت: حتى لو كنا بنسخن تبقى العربية بقت جاهزة للتشغيل، دوّر بقى
قال: أدوّر إيه؟
قالت: دور الموتور
قال: مش لما نفوّل التنك الأول
قالت: تنك إيه يا جدع انت؟ نفوّله بإيه؟
قال: بالدم
قالت: يا خبرك أسود، هى العربية دى ما بتدورشى إلا بالدم؟
قال: الظاهر كده
قالت: الله ينكد عليك، مش كفاية دم؟ إيه الكلام اللى بتقوله ده؟ بطل غم وتريقة، انت حاتروح ولا مش حاتروح!!؟
قال: حاروح طبعا
قالت: بعد كل كلامك اللى زى السم الهارى ده، حاتروح طبعا؟!! أنا مش فاهماك والنعمة
قال: إمال عايزانى أعمل إيه وأنا موجوع كده؟ أقعد أتشمّس؟
قالت: مش عارفة، انت لخبطتنى، إعمل اللى انت عايزه، اللى تقدر عليه
قال: طب انتى حاتعملى إيه؟
قالت: حاروح طبعا
قال: أديكى قلتى زى ما انا قلت بالظبط، طب حاتقولى إيه؟
قالت: حاقول “نعم” طبعا، طب وانت؟
قال: حاقول زيِّك بالظبط
قالت: لا يا عم، “نعم” بتاعتك غير “نعم” بتاعتى
قال: ماشى، طب حايفرزوا دى من دى ازاى؟
قالت: والله مانى عارفة، حداقة المصريين بقى!! أنت نسيت؟
قال: حانسى ازاى، والله العظيم انا كنت باحب مصر قوى
قالت: يا خبرك اسود!! “كنت”!!؟ طب ودلوقتى؟
قال: باحبها أكتر
………
قالت: إيه مالك؟ فيه إيه؟ عنيك فيها إيه؟
قال: ولا حاجة، إيه؟
قالت: ولا حاجة ازاى؟ عينيك ملانة دموع ما بتنزلش
قال: لا..، مافيش حاجة
قالت: أنا متأسفة، إيه مالك؟ فيه إيه؟
قال: ولا حاجة
قالت: مش انت بتحب مصر زى ما بتقول
قال: قوى، زى ما انتى عارفة
قالت: وبتشتغل ليل نهار؟
قال: زى ما انتى شايفة
قالت: خلاص، يبقى حاتعدّى
قال: ازاى؟
قالت: زى ما عدت قبل كده، دى مصر
قال: بس الغيلان كتروا واتحوّطوها من كل ناحية، أنا خايف
قالت: خايف من إيه؟ ولاّ على إيه؟
قال: خايف على السيسى
قالت: بقى احنا اللى نخاف عليه، ولا هوّا اللى يخاف علينا، خايف عليه من إيه، من الإخوان؟
قال: ياريتً! أنا خايف عليه مننا احنا، ومن نفسه
قالت: ولا يهمك، دا مصرى طيب وشجاع وبيعرف ربنا، وعمل اللى ما حدش يقدر يعمله
قال: أهو ده اللى أنا خايف منه
قالت: مش فاهمة
قال: انتى ما تتصوريش السفلة الوحوش برّه وجوّه بيتآمروا علينا إزاى! وده راجل مصرى عادى دغرى وشجاع وبس
قالت: إمال انت عايزه يبقى إيه
قال: بيتهيألى احنا محتاجين واحد مرقع مغامر فاهم الألاعيب اللى حواليه كلها خصوصا وساخة إسرائيل ولعبة الفلوس والتبعية والتفكيك والكلام ده
قالت: إزاى؟
قال: ما أصلهم مالهوشى إلا اللى يقف لهم، ويكلمهم بلغتهم
قالت: همّا مين؟
قال: المواسخ اللى ما فيش عندهم غير “أمن اسرائيل” “أمن اسرائيل”، هىّ ناقصة أمن؟!! كتنا نيلة فى عَمانَا
قالت: ماهو لازم نعمل حساب الكبار برضه، الكبير كبير
قال: كبير إيه ونيلة إيه، دول حرامية، عايزين عبيد وبس، ونسلفكوا على شرط تاخدوا على قفاكم وما ترفعوش راسكم، وما تنتجوش، تستهلكوا وبس
قالت: طب والسيسى: مش عارف كده؟
قال: يارب يكون عارف! عموما: حا يبان
قالت: حا يبان إزاى
قال: لما نحب مصر أكثر ما نحبه، ونحب أنفسنا أكثر من حكاية “الشعب يريد” “الشعب يريد”
قالت: انت جرى لك إيه؟ انت مش عايز “الشعب يريد” ولاّ إيه؟
قال:هه؟! بتقولى إيه؟
قالت: إيه؟ مالك تانى؟
قال: لأ…. أبدا مافيش حاجة.
قالت: لأه .. انت مش شايف عينيك، يا جدع انت حرام عليك فى نفسك، مش كده
قال: أعمل إيه:؟ سيبينى دلوقتى الله يخليكى.
(لا الدِّمْعَه بْتِنْزِلْ، ولا راضية تْجِفّ).