يحيى الرخاوى طبيب نفسى
نشرة “الإنسان والتطور”
الأربعاء: 4-2-2015
السنة الثامنة
العدد: 2714
قصة جديدة:
أصله معايا على طول….!!!
اندفعت البنت نحو أبيها ودفست رأسها فى حجره وهى تنتفض قائلة: أقفل التليفزيون ده والنبى يا بابا
قال الأب:
حاضر، ليه؟
قالت البنت:
مش قادره كفاية كده
قال:
حاضر حاضر عندك حق
أغلق التليفزيون وضمها إليه أكثر حتى هدأت، ثم نامت فى حجره واقفه فقام ووضعها فى السرير، وفى صباح اليوم دخلت إليه وهو يرتدى ملابسه للذهاب للعمل قبل موعد مدرستها بساعة فبادرها
– ازيِّك النهارده؟
قالت
– الحمد لله.
قال
– عايزه حاجه يا حبيبتى.
قالت
– أيوه.
قال
– خير بابنتى انا تحت أمرك.
قالت
– بس ما تزعلش وما تضربنيش.
قال
– حاضر.
قالت
– وعْد؟
قال
– وعْد.
قالت البنت
– إيه حكاية ربنا يا بابا؟
قال الأب منزعجا
– انتى بتخرفى بتقولى إيه؟
قالت
– مش انت قلت مش حاتزعقلى.
قال الأب
– ايوه، بس أنتى كمان شوفى بتقولى ايه.
قالت البنت
– باقول هوّا ربنا سايبهم يعملوا كده ازاى.
قال
– أنا ايش عرفنى، له فى ذلك حكم.
قالت:
حِكَمْ يعنى ايه يا بابا؟
قال:
لأ بقى، كفاية كده.
قالت:
امال اسأل مين؟
قال:
إسألى أبله فى المدرسة.
قالت:
سألتها وكانت حتضربنى.
قالت:
تستاهلى.
قالت:
اصل أنا بيتهيألى إنى عارفاه اكثرمن حضرتك، ومن أبله.
قال:
عارفة مين؟
قالت:
عارفة ربنا
قال:
انتى جرى لك ايه يا بت انت، إيه اللى جاب الكلام ده دلوقتى؟
قالت:
همّا الناس المجرمين دول مش عارفين إن فيه ربنا.
قال:
المجرمين مين؟
قالت:
الناس اللى بيموتوا الناس، اللى بيموتوا عساكرنا.
قال:
روحى اسأليهم.
قالت:
لو رحت لهم هايموتونى.
قال:
انتى عايزانى أنا اللى أروح اسألهم؟
قالت:
دول مستحيل يعرفوا حاجه اسمها ربنا بحق وحقيق.
قال:
والله عندك حق، يعنى هوّا مين اللى عارفه بحق وحقيق.
قالت:
انا.
قال:
انت لسه صغيره، وبكره لما تكبرى….
قالت (مقاطعة):
لما أكبر حتخلونى ما اعرفوش بحق وحقيقى زيكم.
قال:
انتى بتخرفى تقولى إيه با بت انتى؟ هو انا ما اعرفوش وانا ما باسيبش فرض
قالت:
وهو دا كفاية؟
قال:
امال عايزانى اعمل ايه؟
قالت:
مش عارفه.
قال:
ايه دخل ده بده.
قالت:
همّا المجرمين، دول عارفين حاجه اسمها ربنا.
قال:
دول بيقولوا إن همّا اللى عارفين ربنا.
قالت:
عارفينه وبيموتوا الناس كده؟
قال:
دول بيقولوا انه هو اللى قال لهم موتوا الناس.
قالت:
وحضرتك سايبهم ازاى كده.
قال:
انا اللى سايبهم برضه؟
قالت:
إمال مين؟
قال:
ربنا ….
قالت (مقاطعة):
استغفر الله العظيم، انت بتقول ايه يا بابا؟
قال:
انتى ما سبتنيش أكمل، قصدى ربنا حاينتقم منهم.
قالت:
ازاى؟
قال
مش عارف؟
قالت:
أنا عارفه.
قال:
لا ياشيخه!! عارفه إيه بقى؟
قالت:
عارفه وخلاص.
قال:
وحاتعملى إيه؟
قالت:
حاتشوف، أصله معايا على طول.
قال:
أمال أنا مع مين؟
قالت:
مش عارفه.