يحيى الرخاوى طبيب نفسى
نشرة “الإنسان والتطور”
الثلاثاء: 6-8-2013
السنة السادسة
العدد: 2167
الثلاثاء الحرّ:
مقدمة: تم نشر هذا المقال فى موقع “اليوم السابع” بتاريخ 2-8-2013
أسرة مصرية عادية جدا (1 من 2)
(قالت البنت لأبيها:)
البنت: بابا
الوالد: نعم
البنت: لأ مافيش
الوالد: ما فيش إيه ؟
البنت: ولا حاجة
الوالد: عيب كدا، فيه إيه؟
البنت: الرئيس مرسى ،
الوالد: ماله؟
البنت: غلبان قوى
الوالد: يروح فى ستين داهية
البنت: يروح، بس هوّا غلبان قوى
الوالد: دا جبان مفترى
البنت: مش باين عليه
الوالد: عشان ضعيف
البنت: وحضرتك ؟
الوالد: أنا ؟!! مفترى؟!
البنت: لأ ضعيف
الوالد: طيب وهوّأ انا قلت غير كده
البنت: وهيا دى حاجة تبسط
الوالد: وهوّا انتى يعنى شايفانى مبسوط؟
البنت: لأه
الوالد: لأه إيه؟
البنت: ولا انا
الوالد: ولا انتِ إيه !!؟؟
البنت: ولا حاجة
(انتهى الحوار الأول)
****
أسرة مصرية عادية جدا (2 من ؟)
(قال الإبن لأبيه:)
الإبن: أنا ما باحبش السياسة
الأب: إمال بتنزل معاهم تهبب إيه؟
الإبن: دى مش سياسة، دى وطنية
الأب: نعم؟ نعم؟! وإيه الفرق؟
الإبن: إيش عرّقنى؟
الأب: خلاص، ما تنزلشى لحد ما تعرف
الإبن: ما نزلشى!!؟ إمال أعمل إيه؟
الأب: تعمل زيى
الإبن: هوّا حضرتك بتعمل إيه؟
الأب: ما باعملشى حاجة
الإبن: يعنى عايزمنى أقعد جنبك ما اعملشى حاجة
الأب: لأ مش قصدى
الإبن: إمال قصدك إيه؟
الأب: قصدى يعنى، تقعد يتهيأ لك إنك بتعمل حاجة
الإبن: مش فاهم، …وهوا كدا كفاية؟
الأب: كفاية ونص
الإبن: كفاية لإيه؟
الأب: كفاية للى احنا فيه
الإبن: هوا احنا فْ إيه؟
الأب: إيش عرّفنى
الإبن: هوّا انتَ حاتنتخب يا والدى؟
الأب: طبعا، طبعا
الإبن: حاتنتخب مين
الأب: اللى فيه الخير يقدّمه ربنا
الإبن: طب وتنتخيب ليه، ما تسيب ربنا ينتخب لك
الأب: أستغفر الله العظيم
الإبن: هوّا انا غلطت؟
الأب: من كل ذنب عظيم
الإبن: أنا آسف.
انتهى الحوار الثانى ، (وسوف نكمل فيما بعد)