يحيى الرخاوى طبيب نفسى
اليوم السابع
الأربعاء : 2-10-2013
الأطفال (داخلنا وخارجنا) يعلمونا ماهية “الحرية”
كثر الحديث عن “الحرية” بشكل يجعل أى عاقل يحترم هذه القيمة، يتساءل: هل يعرف هؤلاء الناس الذين يهتفون لها أو يقدسونها، أو يتصورون أنهم يتمتعون بها، المعنى الحقيقى للحرية؟ تتكرر معانى شائعة كثيرة تحفظت عليها مرارا مثل أن حريتى تنتهى عند بداية حرية الآخرين، وقد نبهت إلى ما اسميته وأدعو له من أن حريتى تبدأ حين تتصارع مع حرية الآخرين تحت مظلة عدل مطلق وقيم متكافئة….الخ
المعروض فى السوق – محليا وعلى مستوى العالم – أنواع متعددة من الحرية ليس بين أى منها القدر الكافى من الحرية الحقيقية، فثم: حرية أمريكانى، وحرية صينى، وحرية مجلس أمنى، وحرية الناتو، وحرية إسرائيلى، وحرية تايوانى، وحرية خليجى، أنا آسف والله.
أما الحريات المحلية فخذ عندك: حرية بطعم ماسبيرو، وحرية بطعم 25 يناير، وحرية رابعة الماسونية، وحرية صناعة تحت السلم، وحرية الشرعية الصناديقية.
أثناء كتابتى لأغانى الأطفال (التى اكتشفت أنهم خارجنا وداخلنا) وصلنى على لسانهم رجزا راقصا وجدته أبلغ من كل ما يشاع عن الحرية بما فى ذلك شعار الثورة: عيش “حرية” عدالة اجتماعية.
-1-
بيقولوا كلام مالهوش لازمة
باين أهالينا ما هيش فاهمة
قال “حرية” !؟…. أُسـْـكُت لاغْلط.
بتهرّج واللا بتِسْتَعْبَطْ !
هوا انت يا عمّنا أصلاً حرّ
دى الحنفيّة عمّالة بتـخُـرْ
أفكار جاهزة، فتوى وأحكام،
واللى ينهّــق ركّبــْ له لْـجام !!
-2-
“تتحرك جوّه اللى قلناه وانْ كان عاجبكْ،
وساعتها تبقى حر تمام، كدا على قدّك”
دى حكاية وباين مش نافعة
دانا زى باخطـَى فْ نار والعة
-3-
الحرية ما تجيش أبدا كدا ما الآخر،
ولا كلّ ما اقرّب تـتَّاخر
بصراحة أنا خايف أبقى حر.
أصل انا ما اعْرَفشى “أسيبها تمُرّ”
حا تمرَى ازاى وتروحى على فين،… وانا مش دارى
أصل انا باستعبط، وبَدَارِى
مش عايز أكتفى بشعارها
ولا عُدت ارتوى من أشعارها
ما تقوللى الأول قصدك إيه
وتسيبنى اعمل
راح تستغرب ما اللى عملته وقدرت عليه!!
-4-
الحرية هى “الحركة” جوّاكْ برّاكْ،
هى انك تقدر تتغير من “هنا” “لهناك”،
و”هناك” مفتوح وبيتفجــّـرْ
كل ما توصلـّه يتغيّرْ
إوعى تصدقهم: تستنى “لحد ما تكبر”
دا انت تراجع أوِّل باول: كل كلامهم
راح تلقى حاجات مش على بالهم، غصبنْ عنهم
وتفكر “بالعقل” وبرضه بحاجات “هيّه”،
ما انت عارفها، مش مستنى منى وصية
-5-
الحرية انك تتحرك وتراجعْ
“إنك تحترم اللى وصلـّك!”، دا مافيش مانعْ
…. بس يا خويا يبقى بداية،
بسْ مش أكتر
وتغامر تحمِلْهَا أمانة، مش تتمنظر
-6-
الحريهْ: انك تقدر ترمى طوبتها
لو مش قادر، تدفع “حالا”: حق قيمتها
بس تاخد بالك، مش يمكن: تستحلاها؟
مهما كات غاليه، إوعى تقول “ياللاّ…، بلاها”!
-7-
الحرية : عمرها ما تكون وانت لوحدك
الحر صحيح لازم يبقى كده وسط الناس
مش يقعد يلعب مع نفسه من غير إحساس
-8-
الحر عليه يسأل تفسه: حر مع مين؟ حر على مين؟
حُرّ؟ سارقها ورايح على فين؟
ما انا برضه حر: بقينا اتنين !!!!
لو حر صحيح؟ بقى تستحمل حواليك أحرار
يعنى يختاروا ما دام إنت برضه بتختار
-9-
الحر الحر يلاقى دايما أحرار حواليه
ماذا وإلا:
يبقى فْ زنزانة الحرية وْمقفولة عليه