يحيى الرخاوى طبيب نفسى
نشرة “الإنسان والتطور”
الأربعاء: 13-9-2017
السنة الحادية عشرة
العدد: 3665
الأربعاء الحر
أحوال وأهوال (62)
من كتاب: أغانى مصرية: عن الفطرة البشرية
للأطفال <==> للكبار
وبالعكس
المقدمة:
نفس مقدمة نشرة الأسبوع الماضى، فى انتظار الردّ، لو سمحتم!!
يبدو أن قراءة كل أغنية (أرجوزة) مستقلة يعطى الفرصة لمعايشتها أبسط أى أعمق أى أصدق.
لكن هل هذا الباب “أحوال وأهوال” هو المكان الأنسب لنشر هذه الأغانى الواحدة تلو الأخرى هكذا؟
هل هذه الأغانى بالعامية المصرية هى حالة أم حال؟
يجوز هى كذلك خاصة لو قرأتها منغمة بصوت عالٍ.
جرّب لو سمحت
وقل لنا!
3- العوَزَانْ
-1-
آنا عايزْ،
أيوه عايزْ،
أيوه، من حقى أعوزْ،
دهْ ضرورى، مِشْ يجوزْ.
واللى مِستغنىِ يوسّعْ،
أو ياخُدْ بالهْ، ويسمعْ:
-2-
إوعى يا بْنى تخاف تعوزْ
إوعى تتردِّدْ، تبوظْ !!
آه تبوظ منّك تضيعْ
إيه حايفضل لما تيجى تشترى: تلاقيك تبيعْ
آه، تبيع روحك عشان ما جنابه يعطيك ماللِّى عنده
مع إنهْ مِشْ بتاعه، بس راكب راسوْ وبيفخْر بعِنْده
…
إحنا بنعوز اللى نكبر بيه وناخد حقنا،
إحنا بنعوز اللى بيخلينا خلقة ربنا،
إحنا بنعوز بعضنا.
-3-
عوزْ وغامرْ
قولْ وخاطِـرْ
فى الحقوقْ … ما فيش خواطرْ
إحتفظْ يا بنى بحقَّـكْ،
هوّا حقَّـكْ
واللى خَلَقكْ.
هوّا حقكْ، من زمانْ.
راح تنوله ما دمت متمسّـكْ وناوى،
…. مهما كانْ.
-4-
إوعى تنسى إنهمْ مشْ هُمَّا إِللى إدِّهُولَكْ
إوعى تِسْتـَـنَّى لِحَدْ ما يسمحولكْ
إوعَـى تتنازل ولا تأجّل، وإلا:
مستحيل إنك تطولــُهْ
ما هوربــَّـك لما خلقــَكْ كان عشان إنَّك تنولـــُهْ
وانتَ خَدّتُهْ لمّا عُزْتُهْ قبل ما توصل لِحَــدّهْ
راح يقولوا دا عملها غصب عنّا،… حدّ قدُّهْ!!
