يحيى الرخاوى طبيب نفسى
نشرة “الإنسان والتطور”
الأحد: 27-10-2024
السنة الثامنة عشر
العدد: 6266
أغانى مصرية: عن الفطرة البشرية
للأطفال ↔ الكبار وبالعكس [1]
30- الخجل والحياء
-1-
الخجل برضه كُوّايــِّس
ولا إيه رأيك يا ريـّس
الخجل، قصدى الخجل الحلو يعنى
هو إللِّى باقبْلهْ، مش غَصْب عنى
-2-
الخجل انى أراعى اللى قصادى
يعنى ما هْجمشِى عَلَى تغطيّتُهْ
إنى اسمع همسته لما ينادى
إنى اراعى حـُرمته
-3-
بس لو خجلى منعنى عن قـِـوالـِة الحقّ
لو يحوشني إنى أرفض أو أزُقْ
يبقى دا ماهوش خجلً
يبقى جـُبْنْ، أو شلَلْ
-4-
الخجل لما يزيد
يبقى سجن من حديد
يبقى أنانية وخايف إن صورتى تتخدش
يبقى خيبة وعيب وغش
-5-
الحياء من صلب دينّا
الحياء دا لـِحـْترام إللى ما بيــنــَّا
ـــــــــــــــــــــــــــــــــــ
[1] – يحيى الرخاوى، (2017) “أغانى مصرية: عن الفطرة البشرية للأطفال والكبار (وبالعكس)”، منشورات جمعية الطب النفسى التطورى، والكتاب متاح فى مكتبة الأنجلو المصرية وفى منفذ مستشفى د. الرخاوى للصحة النفسية شارع 10، وفى مؤسسة الرخاوى للتدريب والأبحاث العلمية: 24 شارع 18 من شارع 9 مدينة المقطم، كما يوجد أيضا بموقع المؤلف، وهذا هو الرابط www.rakhawy.net.
