يحيى الرخاوى طبيب نفسى
نشرة “الإنسان والتطور”
الأحد: 20-10-2024
السنة الثامنة عشر
العدد: 6259
أغانى مصرية: عن الفطرة البشرية
للأطفال ↔ الكبار وبالعكس [1]
29- الحق فى الحزن
-1-
همّا مش فاهمين دا ليهْ؟
همّا عايزنِّى ابقى ايه؟
همّا عايزينـِّى ألاعبهم وانـَاغِـى
إضحكْ كـَرْكـَرْ ، يا يلاَّ ولاَغِى
أنا خلقة ربنا
يبقى من حقى يا ناس أبقى أنا
يعنى بنى آدم باحِسّ
يعنى أتعلِّم وأتألم وابصّ
مش أفرّحكم وبس
أنا من حقى انى أحزَنْ
أو ارَفـَّس أو أزرجن
حزنى مش زن وشحاته وصُـعْـبَانِـيَّـهْ
حزنى حقى لمّا تغمرنى الأسيــّـة
حزنى بيفجــّر مشاعري: إللى هيـَّـا
هما شايفين أنى لازم أبقى دائم الابتسام!
يبقى كده أنا فى السليم كله تمام
كل ما أضحك أبقى أشطر
طب وأنا بالشكل ده ازاى راح أكبر
اللى بيَّـكْـبرنِى: حزنى وفَـرْحِـتِى
اللى بيوعـِّينى: ألمى وضحكتى
واللى حابب بسمتى
يبقى يقدر يكتشفها فْ دِمعتى
ما نا برضه يا جماعة نفسى أفرح
واجرى والعب حتى لو قالوا باصَـرْمح
بس مش أراجوز فى مسرح
احنا خلقه ربنا
يبقى نأخد حقنا
مِن دَهْ ودَهْ
ولاَّ شايفينْ غير كِـدَهْ
ـــــــــــــــــــــــــــــــــــــــ
[1] – يحيى الرخاوى، (2017) “أغانى مصرية: عن الفطرة البشرية للأطفال والكبار (وبالعكس)”، منشورات جمعية الطب النفسى التطورى، والكتاب متاح فى مكتبة الأنجلو المصرية وفى منفذ مستشفى د. الرخاوى للصحة النفسية شارع 10، وفى مؤسسة الرخاوى للتدريب والأبحاث العلمية: 24 شارع 18 من شارع 9 مدينة المقطم، كما يوجد أيضا بموقع المؤلف، وهذا هو الرابط www.rakhawy.net.
