يحيى الرخاوى طبيب نفسى
نشرة “الإنسان والتطور”
الأحد: 15-9-2024
السنة الثامنة عشر
العدد: 6224
أغانى مصرية: عن الفطرة البشرية
للأطفال ↔ الكبار وبالعكس [1]
24- طب وانت شفت انهُوهْ فيهمْ
-1-
أصل الكبّايَة المِتْنَصّصَهْ دى: فيها وفيها
وصاحبنا المـُتـَرَدِّدْ جدا، مشغول بيها.
طب وانت شفت انهُوهْ فيهمْ؟
شفت النص المليان حاجة ؟
طب حاجةْ إيه؟
أو شفت النص الفاضى وبس،
طب نعمل إيه؟
-2-
لو كنت صحيح عايز تحكمْ، والحكم ميزانْ،
تعرف لما تشوفها ملانهْ:
إنك عطشانْ
واذا شفت النص الفاضى وْبَسْ: تبقى قرفانْ
أو يمكن ملهـِى على عينك، علشان زهقانْ
-3-
طبْ شوفها وانت بعيد عنها
نصّها مليان، نصها فاضى: قرّب منها
تملاكْ تملاها، تقلـّبْها
تلقاها جوّاك،… وانت شاربْها
تقدر تملاها يجوز بَاحْسنْ
مش تقعد تبكى وتتمسكـِن
-4-
لو ملْـيانه بكلام فارغ، قومْ فـضّيها
واملاها باللى ما هوش فيها
ولا تستجرِى فْ يوم ترميها
تشربها ما دام إنت ماليها
ــــــــــــــــــــــــــــــــــــــــــ
[1] – يحيى الرخاوى، (2017) “أغانى مصرية: عن الفطرة البشرية للأطفال والكبار (وبالعكس)”، منشورات جمعية الطب النفسى التطورى، والكتاب متاح فى مكتبة الأنجلو المصرية وفى منفذ مستشفى د. الرخاوى للصحة النفسية شارع 10، وفى مؤسسة الرخاوى للتدريب والأبحاث العلمية: 24 شارع 18 من شارع 9 مدينة المقطم، كما يوجد أيضا بموقع المؤلف، وهذا هو الرابط www.rakhawy.net.
