يحيى الرخاوى طبيب نفسى
نشرة “الإنسان والتطور”
الاثنين: 13-4-2026
السنة التاسعة عشر
العدد: 6799
كتاب: من فيض نبض الطب النفسى[1]
أنت معنى الكون كله!!
الفصل الأول
الإنسان العادى والمعرفة (4)
………………..
………………..
ملاحق الفصل الأول:
من كتاب الأطفال “الحق فى الغضب” وهو شعر بالعامية المصرية، على لسان الأطفال (بداخلنا وخارجنا) وهو ما أثاره قول المشدود على سارى المركب “جهلنا أن الغضب استعداد فى كل فرد”
تقول الأرجوزة على لسان الطفل:
-1-
الغضب من حقَّى برضُهْ،
الغضبْ مِشْ كلُّه يعنى زى بعضُهْ.
ما هو لازم إنى أغضبْ،
لما يحصل إِللىِ يِـغْـضِـبْ.
-2-
الغضبْ للحق واجبْ
الغضب مع بعض ضدّ المفترى،
يبقى ثورة ضد ظالمْ، ضد غاصبْ.
-3-
بس يعنى،
لو غَضَبْ كده والسلامْ
زى كورهْ فرقعتْ، لما شاطها الجون قوامْ
بعد ما دخلت شبكـْتُـهْ
راح عاملها يدارى خيبتـُهْ
يبقى مش هوّا اللَّـانا قصدى عليه،
نعمل ايه؟!!!!
-4-
لمَّا نغضب ننتبه: إمتى، وإيه،
ضد مين؟ ولْحدّ فينْ؟ وبكامْ، وليهْ؟
لما تغضبْ وانتَ مش قادر تحس،
باللى جنبك.
يعنى تتفجر وبسْ،
باللّى عندك،
تبقى باظت حسبتكْ، مهما حاولت
يبقى طاش سهمك، ياريتك ما غضبت
-5-
لمّا ازعّق وى خلاص دا مش غضبْ
دا ساعات يمكن يكون قلّـة أدبْ
لما باغضب وانفجرْ،
مش باجمّع يا خسارة،
يفلت المعيار كإنى وحش كاسر
لسه طالع من مغارة
بانسَى نفسى، …. بالـْغِـى حِسّى
يجروا منّى،……….ألقى إنّى:
مرمى منبوذ غَصْب عنى
-6-
إنما غضبى اللى هوَا، .. لسّه جوّهْ،
ده يا خويا حاجه تانيه، بس “هوّه”.
آه دا لو وجّهنا طاقته ناحية اللى يستاهلها
راح تكون ثورة بصحيح،
…بس يورثها الْعـــامِلْها
مش تروح ثمرتها للى كان بيتفرّج علينا
واحنا نتسوح ونرضى مرة تانية باللى فينا
******
ونواصل الأسبوع القادم تقديم الفصل الثانى: “موت الموت” من ذكريات طفل، ووحدة مريض”
ـــــــــــــــــــــــــــــــــــــــــــــــــــــــــــ
[1] – يحيى الرخاوى “من فيض نبض: الطب النفسى (1) “أنت معنى الكون كله!!” (الطبعة الأولى 2020)، والكتاب متاح فى مكتبة الأنجلو المصرية وفى منفذ مستشفى د. الرخاوى للصحة النفسية شارع 10، وفى مؤسسة الرخاوى للتدريب والأبحاث العلمية: 24 شارع 18 من شارع 9 مدينة المقطم.
