نشرة “الإنسان والتطور”
الاثنين: 5-10-2026
السنة العشرون
العدد: 6974
كتاب: من حركية الجنون إلى رحاب الناس
(مروراً بالعلاج الجمعى)
الفصل الثالث
مرور (مقابلة) محمد
بتاريخ 21/8/2008
حضر محمد الاسبوع التالى مباشرة يوم الخميس حسب الموعد الذى اتفق عليه مع د.يحيى الساعة 7 صباحا تماما! فى حين حضر د. يحيى متأخرا عشر دقائق، وبعد صباح الخير فاجأ د.يحيى محمد بسؤال غير متوقع:
د.يحيى: إنت أخر مرة رحت جنينة الحيوانات إمتى؟
محمد: من زمان اوى، ليه السؤال ده؟
د.يحيى: أصل علاقتى بجنينة الحيوانات وبالحيوانات عموما علاقة خاصة شويتين
محمد: ليه؟
د.يحيى: مش برضه همّا الأصل
محمد: مش عارف
د.يحيى: وانت جاى النهارده تعّوض الخميس اللى فات، أنا المرة دى بقى حاسيبك تقول براحتك. (1)
(1) قد يتعجب المتابع أن يبدأ اللقاء من جانب الطبيب بهذا الحوار غير المألوف، وطبعا لم يكن فى ذهنى شىء محدد، لكن يبدو أننى أردت هذه المرة بطريق غير مباشر، أن أكون البادئ بموضوع مختلف لم يخطر على ذهن محمد أصلا، وهذا فى ذاته قد يدل على أن العلاقة تأخذ شكلا آخر غير الشكل التقليدى بين الطبيب والمريض (بتشتكى من إيه؟ إزيك دلوقتى؟…إلخ) وهى بذلك قد تخفف من تركيزه على محتوى معين، كما قد تقطع عليه ما جاء محمّلا به من المرة السابقة فنلاحظ ما فى هذا الحوار من دلالة على نوع العلاقة الجديدة غير التقليدية بين المريض والطبيب.
وحين أشار الدكتور إلى هاجسه الشخصى عن التطور تلميحا لم يرفض المريض، ولم يستجب، وقد اعتدتُ أن أحضر مع هؤلاء المرضى بكل “ما هو أنا”، بما فى ذلك ما يشغلنى، وعادة ما يستجيبون لهذا الحضور بتقبل وطيبة، ولا يتمادون فى الاسئلة عن ما ألمحت، وكنت فى البداية أتعجب لموقفهم هذا مقارنة بجاهزية الناس العاديين للمناقشة والاستفسار اللحوح والاعتراض، مثلا على شرعية فكرة التطور، لكنى رويدا رويدا ومع تزايد قراءاتى فى طبيعة التواصل بالوعى، عرفت بعض معالم مثل هذا الحوار التحتى خاصة مع الذهانيين.
محمد: أنا جيت وخلاص،
د. يحيى: قول أى حاجه النهاردة، المرة دى غير الاسبوع اللى فات خد راحتك زى ما انا خدت راحتى وقلت لك اللى خطر فى باللى من غير ما أفسر ليه وعشان إيه(2)
(2) قد يبدو غريبا – على المريض خاصة – أن يحول الطبيب فى المقابلة السابقة بينه وبين أن يذكر ما بداخله، فى حين تبدأ هذه المقابلة بهذه الدعوة وهذا السماح، وهذا يشير إلى أنه لا يوجد أسلوب واحد للتعامل مع المرضى طول الوقت، وأن تغير الطريقة، وتنّوع التناول قد يغيران الاسلوب التقليدى، كما يشير إلى أن النهى عن “أطلّع اللى جوايا” ليس قاعدة مطلقة ينبغى اتباعها، ونلاحظ أن ما تم الأسبوع الماضى لم يفسد العلاقة بل ربما العكس، فضلا عن أن هذا التنوع يجعل الطبيب ممسكا بقيادة الحوار إلى ما يحقق لهما المهمة من اللقاء.
محمد: يعنى أنا أقول اللى خطر لى ولا تزعلشى
د. يحيى: أزعل إزاى، أنا باعمل اللى علىّ واللى يخطر على بالى للصالح، انت النهاردة جئ محمد مين فيهم؟
محمد: محمد نفسيه
د.يحيى: يا خبر اسود، ايه الاسم الجديد ده؟ نفسيه؟!!
محمد: آه والله
د.يحيى: ياباى!! كنت متوقع حاجه كويسه
محمد: هو اسم وحش؟ مش فيه يافطه متعلقه بره عليها “قسم الأمراض النفسية؟
د.يحيى: آه
محمد: قسم الأمراض النفسية، أنا بقى حاكتب تحتها “مع تحيات محمد نفسية”(3)
(3) أرجو ألا ننسى أن هذا المريض يوصف (أو يسمى) بأنه فصامى، وبالتالى أنه لا يُحسن عمل علاقة مع الآخرين، وأنه متبلد عادة…إلخ، لكننا نلاحظ هنا مبادأة محمد، ورفع الكلفة، واختراعه لاسم جديد لم يُطرح أصلا من قبل لا فى المقابلات المنفردة (الثنائية) ولا فى جلسات العلاج الجمعى، وهذا قد يشير أولا إلى نوع العلاقة التى تنمو بينه وبين الطبيب، كما يشير إلى حركية تشكيله للموقف انطلاقا مما يخطر له دون توقف عند ما وصله من اقتراحات تسميات جديدة أخرى له.
د.يحيى: لأه لأه
محمد: آه والله، آه بجد والله، مع تحيات محمد نفسية
د.يحيى: نفسية إيه يا جدع انت؟ “محمد دلوقتى” أجدع، انت فاكر مين اللى اخترع الاسم الجميل ده “محمد دلوقتى”
محمد: محمد دلوقتى؟ ولا كمان شوية؟!(4)
(4) هذه سخرية مصرية طريفة، وقفشة دالة، فليس معنى ترحيبى بهذا الاسم (محمد دلوقتى) الدال على ما يتخلق فى المجموعة، وفرحتى به، وبرغم قبول سائر أفراد المجموعة له والتعامل معه وتوجيه الكلام إلى المحمدات الثلاثة فى المجموعة كما أشرنا فى النشرات السابقة وأظهرنا أن هذا الترحيب إنما يرجع الفضل فيه إلى تعود إلتزامنا بقاعدة “انا انت – هنا ودلوقتى” ومتابعة جدواها تحريكا للوعى البينشخصى ثم الجمعى، برغم كل ذلك، إلا أنه يظل اسما غريبا بالنسبة للتعامل العادى، وسخرية محمد بقوله “محمد دلوقتى ولاّ كمان شوية” ليست بالضرورة دلالة على رفضه لهذا الاسم ذى الدلالة الخاصة، لكنها قد تحمل إشارة إلى غرابته، وايضا – ربما – إلى أن “دلوقتى” (= هنا والآن) لا تعنى تثبيت الزمان، وإنما انطلاقا من اللحظة الراهنة، وهذا ما وصلنى الآن من سخرية خفيفة الظل: “محمد دلوقتى ولاّ كمان شوية”، وكأننا دخلنا “قافية مصرية”.
د.يحيى: الاّ قول لى: مين اللى إخترع اسم محمد دلوقتى، أنا مش فاكر
د.كريم:[1] إبراهيم
محمد: أبو نظارة لأ؟ مش إبراهيم ، انت متأكد؟
د.كريم: هوّا إبراهيم، أبو نضارة
محمد: أبو نظارة ده ياسر، بيتهألى، بصراحة مش فاكر
د.يحيى: أظن إنه فعلا ابراهيم، طلع ولد جدع تمام، أيوه هوّا أبو نظارة، اللى كان ياعينى نظرة ضعيف، وكنت باحسب إنه مش معانا قوى
محمد: أيوه أيوه أيوه افتكرت
هشام العربى: (تدخل المساعد الذى يقوم بتصوير المقابلة فيديو[2] أيوه إبراهيم
د.يحيى: بصراحة برافو عليه، شكراً، إنما محمد نفسية دى كلمة أزعجتنى يا أبو حميد، مش عارف ليه
محمد: ليه؟
د.يحيى: بصراحة كلمة نفسية أنا بكرهها، عارف لما بييجوا يسألونى فى التلفزيون والكلام ده وإيه رأيك فى الحاله النفسيه بتاعه الشعب المصرى بابقى عاوز أرفض الإجابة وباشخط فيهم
محمد: ليه؟
د.يحيى: باشعر إنه سؤال تافه، أنا باصححه على طول واقول للمذيعة هيا حاتفرق ايه لما تسألينى أيه رأيك فى الحالة بتاعة الشعب المصرى من غير كلمة “نفسية”، إيش دخل النفسية فى الحاله بتاعة الشعب المصرى؟ الحالة بتاعة الشعب المصرى، هى الحاله بتاعة الشعب المصرى، وخلاص.
محمد: ما هو لازم الشعب له حالة نفسية.
د.يحيى: هوا أنا قلت لأ، بس أنا ما باحبش اوصف الشعب كله على بعضه بتصنيفات متخصصة فى النفسية، تمام زى ما باحبش أحط التشخيص قدامى الأول عشان أتعرف على عيانينى، انت اسمك محمد، مش اسمك نفسية الاسم البايخ اللى طلعته على نفسك ده.
محمد: طيب ايه الحالة بتاعة الناس دلوقتى؟
د.يحيى: انت حاتعمل معايا مذيع، الحالة زى ما انت شايف (يشير إلى الأطباء الذين دخلوا واحدا إثر الآخر)
محمد: شايف إيه؟
د.يحيى شايفهم بيحاولوا،
محمد: بيحاولوا فى إيه بقى، فهّمنْى
د.يحيى: بيحاولوا إن الحكايه ماتبقاش “نفسية”، تبقى “دلوقتى”
محمد: لكن هى نفسية
د.يحيى: لأه هيّا، “دلوقتى”، “النفسية” دى كتير بتبقى شماعه نعلق عليها خيبتنا، إنما “محمد دلوقتى” حاجة ثانية، يعنى إنت المرة اللى فاتت حاولت تتكلم باللى جواك وكلام من ده، فى الغالب كنت حاتقلبها نفسيه! ويمكن عشان كده أنا رفضت؟
محمد: كنت كل لما باجى أتكلم الاقيك “واخدنى وش” [3] كده على طول
د.يحيى: أصل أنا حسيت، حتى قبل ما تألف اسم محمد نفسية ده، إنك ناوى تعيد وتزيد فى اللى جرى واللى كان، واللى تاعبك، ومش قادر، وكلام من ده، قلت نواجه مسئوليتنا “دلوقتى” الأول، وبعدين نشوف، وأديك شفت أهه
محمد: أيوه شفت، المرة دى غير المرة اللى فاتت
د.يحيى: الحمد لله
محمد: يستاهل الحمد (5)
(5) هذا يظهر أن ثمة فائدة وتواصل تم فى المقابلات السابقة برغم الحيلولة بينه وبين رواية الحكى الذى جاء من أجل أن يحكبه، كما أنه يظهر أيضا، ما أشرنا إليه فى بداية التعليق اليوم، من أنه لا توجد قاعدة دائمة، وأن تغير طبيعة الحوار تتغير حسب الموقف، وهذا مما يوثق العلاقة، ويحرك مستويات الوعى البينشخصى باستمرار.
د.يحيى: أديك استحملتنى على قد ما قدرت وآدى النتيجه أهه، أديك جيت فى المعاد، وأنا خصصت الوقت اللازم لك، وانتَ جاى منوّر النهارده
محمد: مش قوى، ما خلاص بقى
د.يحيى: ما خلاصشى، لازم يكون واصل لك إن ده خير، أديك شايف النتيجه إنك جاى النهارده وانت ميه ميه بعد ما عرفت إن الزَّن اللى جواك مالوش لازمة.
محمد: تانى؟!!
د.يحيى: النهاردة أنا سبقتك فى الكلام، وانت جاى وعارف إن إحنا مستنيينك فى الميعاد حتى مع إنى إتأخرت النهاردة عشر دقائق، ماينفعش والله، انا خجلان على الدقايق دول، آنا آسف (6)
(6) نلاحظ هنا محاولة استيعاب الرسائل الحوارية على مستويات الوعى المختلفة وربط ما حدث بالمقابلة السابقة بالمقابلة الحالية وبينهما أسبوع، كما يلاحظ اعتذار الطبيب الجاد عن حضوره متأخرا لهذه الدقائق بالمقارنة بالتزام محمد بالحضور فى الموعد بالضبط، وهذا أيضا يعمق الاحترام الواجب للمريض ووقته، وبرغم أنه غير مألوف فى ثقافتنا إلا أن الملاحظ أنه يبلغ المرضى رسالة علاقة متكافئة بشكل ما.
د. يحيى: شوف بقى ياسيدى إنت المرة اللى فاتت إنت قلت لى وانت خارج تلميحه كده وسط الكلام[4] قلت: “ماعنتش قادر أتجنن” و”ياريت أرجع محمد طربقها”.
محمد: آه
د.يحيى: وأنا ولا موافق على ده ولا موافق على ده، زى ما انت عارف
محمد: كله بيقول لى كلام زى كده، حتى صحابى
د.يحيى: يبقوا بيحبوك،
محمد: لأه، بس طربقها بتاع زمان ده كان حكايه
د.يحيى: يا محمد ارحم نفسك، حكايه ايه وزفت إيه!!
محمد: والله باكلمك جد، على الأقل حتى كان فيه ثقه بالنفس، حتى ده أقل حاجه، يعنى باكلمك بجد والله
د.يحيى: كتك خيبة، أنا مش حاكرر اللى قلناه قبل كده، دا كان سُخرة وإنهاك.
محمد: بس لا كان فيه هلوسات ولا تهيوئات، ولا جنان، ولا دروشه، ولا بتاع، ولا كلام من ده (7)
(7) مرة أخرى نشير إلى مما يثبت ضمنا أن الجنون اختيار، هو أنه بعد إضاءة الأنوار عليه هكذا يبدو أنه لم يعد ممكنا، ومع صعوبة استعجال نمو “محمد دلوقتى” تعود فكرة الرجوع إلى محمد طربقها بهذه القوة والإلحاح ولعل هذا يدل على إصراره، أو على الأقل رغبته الشديدة أن يكون الحل، أو الشفاء من وجهه نظره، هو أن يعود “كما كنت!!” ثم إنه ربط ذلك بإيجابية بأنه حين كان محمد طربقها لم يكن مجنونا (لا كان هلوسات ولا تهيوئات ولا جنان”) وفى هذا أيضا عنده حق، إذ أنه لو كان الاختيار بين محمد طربقها بكل ما يعانى من ظلم وإنهاك واستعمال وتهميش وبين هذا الجنون اللى وصفه هكذا، فلابد أن ترجح كفة “محمد طربقها”، ويتأكد رجحان هذه الكفة حين يبدو أن ما يتخلق منهما “محمد دلوقتى” مازال يعيد المنال.
د.يحيى: واحدة واحدة
محمد: “محمد طربقها” كان عادى كان طبيعى
د.يحيى: يامحمد صلى عالنبى!
محمد: كان مفيش أى مشاكل ولا أى حاجه
د.يحيى: لا يا شيخ!!؟ واحدة واحدة علشان نعرف ازاى نشكر ربنا، وعلى إيه دلوقتى لا إنت قادر تبقى محمد طربقها مع إن الود ودك ترجع فورا.
محمد: آه
د.يحيى: ولا انت عارف تتجنن تانى مع إنك نفسك تلاقى سكة للهرب، أنا معاك إن “طربقها” كان جدع جدع، إنما إتذل وإتبهدل وانُهك لحد ما وقع، ما اعْرِفْشِى يستريَّح إلا لما فركشها، وكان حايروح فى ستين داهيه.
محمد: هوّا ما فركشهاش
د.يحيى: أهى اتفركشت منه وهو مسئول عن ده
محمد: هوّا إنكسر
د.يحيى: هوّا جه يستريح، فلتت منه، جاب عاليها واطيها، راح مفركشها وقعد يخرّف، وضحكوا عليه، إنت عاوز نكرر الموال ده زى ما هوّه؟ ينفع برضه؟ إنت ترضى؟
د. يحيى: (بعد أن يبتسم محمد ابتسامة تتسع حتى تبدو ضحكة فيها رضا وألم معا) أنا مش عارف بتضحك ليه؟
محمد: أنا مش باضحك، أنا مزنوق
د. يحيى: أنا معاك، الزنقة أجدع علامة، مادام الحكاية كده يبقى قدامنا إيه غير “ربنا”، و”هنا ودلوقتى” (8)
(8) أحذر عادة من استعمال مثل هذه اللغة التى تبدو دينية ونحن نتكلم عن الله كعامل علاجى إيجابى فاعل، ذلك لأننى أخشى بحذر شديد (طول الوقت تقريبا) من استعمالها: أن يصل للمتدربين غير ما أقصد حسب الإطار المعرفى والدينى لكل منهم وفى عموم ثقافتنا، فتنقلب المسألة إلى التواكل والتسليم للمجهول وأنا أقصد العكس تماما، أما المرضى، وخاصة الذهانيين منهم، فهم يستقبلون ذلك استقبالا أعمق وأطيب، فأُرجِعُ ذلك إلى حضور وعيهم الأعمق برغم التناثر الذى هُمْ فيه، وبقدر الاجتهاد فى الربط بين الوعى العلاجى البينشخصى والجمعى، وبرغم محاولة وصل هذا الوعى إلى الوعى المطلق إلى الوعى الكونى إلى وجه الله أشعر بتقدم مسيرة العلاج، وأنا أعتقد (أو أشعر) أن كل ذلك يحدث بلا تفكير وبلا ألفاظ عند كل الناس، لكن بمجرد أن يوصف بالألفاظ أستشعر الحرج برغم أنى لا أجد سبيلا آخر، وأنه يصل المرضى أبسط وأعمق أيضا: فى نفس الوقت.
محمد: قدامنا إن إحنا نصبر
د.يحيى: لما ربنا سبحانه وتعالى إدالنا الفرصه ديه يا محمد لما بقينا سوا سوا، ينفع نقفل السكة الجديدة اللى فتحها لنا دى؟ ما دام مش عارفين نرجع لزِمَاَن، ولا قادرين نتجنن.
محمد: نعمل إيه؟
د. يحيى: نستحمل سوا سوا، لوحدك مش نافعه، إنما سوا سوا ربنا يسهل، وأنا برضه يامحمد بينى وبينك بس ماتقولش لحد، لوحدى مش نافعه آه والله (9)، بس مش عارف إزاى أنا نسيتك وجيت متأخر النهاردة، وانت مانسيتش، وجيت فى معادك بالثانية.
محمد: أنا مانسيتش إيه
د.يحيى: ما نسيتشى المعاد بالثانية طلعت أجدع، وده شرف كبير جداً عندى(9).
(9) المفروض ألا يتكلم الطبيب عن نفسه هكذا، هنا تكلَّم عن وحدته مثلا، لكن يبدو فى هذا السياق، سياق “سوا سوا” يمكن أن يبلغ من خلال هذه الإشارة إلى أن المحاولة لكسر الوحدة، تجرى من الجانبين فى أمان الوعى البينشخصى ورحاب الوعى الجمعى، لكن لابد من ألا يتمادى الطبيب أكثر من ذلك، فضبط الجرعة هو الذى يسمح بمثل هذه الإشارات الشخصية، وفى نفس الوقت علينا أن نتذكر أن “نقد النص البشرى” يشمل نصّ المريض ونصّ الطبيب معا، وأن سوَا سوَا لا تقتصر على العلاقة الثنائية وإنما يدخل فيها أعضاء الجروب الحاضرين والغائبين وربما الحضور من المتدربين، اعتمادا على إيجابية الوعى الجمعى بلا استئذان.
………..
………..
محمد: (يكمل) أنا جوايا كده مش طبيعى
د.يحيى: وإيه يعنى! هو احنا عارفين يعنى ايه الطبيعى عشان نعرف يعنى إيه المش طبيعى، يا راجل آدى احنا بندوّر أهه سوا سوا (10)
(10) نلاحظ الإشارة إلى صعوبة تحديد الحد الفاصل بين السواء والمرض (هوّ إيه الطبيعى وإيه اللى مش طبيعى) ولعل فى هذا دعوة ضمنية-للمريض وعموما- لقبول الواقع الداخلى، خاصة بعد أن أطلَقَت المقابلات والعلاج الجمعى عليه الأنوار ليصبح جزءًا لا يتجزأ من وجود المريض، وأن المطلوب هو تسهيل التواصل والجدل بين مكوِّناته فيصبح التنبيه الضمنى إلى الحد من مثل هذه التفرقة المباعِدَة الحاسمة بين الطبيعى وغير الطبيعى هو جزء من محاولة التبصير بقبول “كل الموجود”، حتى يعاد التوليف فالتخليق، وكانت “استجابة” محمد توحى بالطمأنيئنة حتى لهذا الموقف المحيِّر للشخص العادى.
محمد: المهم إنك تسيبنى قاعد كده قدامك
د.يحيى: إيه؟ يعنى إيه؟
محمد: يعنى ماتقولّيش إمشي، خلينى قاعد كده، أنا باكلمك بجد، والله أنا عاوز أقعد مش عاوز امشى.(11)
(11) نلاحظ أنه لم يجر حوار من المعتاد أن يسمى علاج نفسى، برغم كل ذلك فقد بدا أنه تم لقاء مفيد، مما يجعلنا نستنتج أنه قد تم من خلاله – دون تحديد- توصيل معنىً ما، وليس بالضرورة رسالة ترييح!، أو نصيحة توجيه ، كما نلاحظ اختلاف هذه المقابلة وتواصل الحوار دون الرجوع إلى إلحاح المقابلة السابقة لذكر أمرِ بذاته، وقد عبر عن ذلك محمد ببساطة برغبته فى إطالة اللقاء دون تحديد سبب لذلك، فنتذكر أنه جالس أمام الأطباء المتدربين والمقيمين دون أن يعمل حسابهم، ولا الطبيب بدا فى حواره مع المريض أنه يضعهم فى اعتباره بشكل معطِّل، اللهم إلا بتعبيره “أهم بيحاولوا”، وقد يعرج الطبيب أثناء الحوار إلى حضورهم ويكلم أحدهم أو يشير إليه، ثم يستطرد كما فى المقطع التالى:
د.يحيى: (لمحمد) ماتخافشى، بس والنبى تتوسط لى عند الدكتور عدلى[5] علشان أخش الجنه علشان انا كل لما باشوفه واشوف بصِّتُه، باقول يا رب استر
محمد: (إلى الدكتور عدلى) والنبى خلى بالك من الدكتور يحيى
د.يحيى: متشكرين
محمد: طيب، وأنا أعمل إيه
د. يحيى: ما انت معانا هنا وهنا
محمد: هنا وهنا فين؟
د. يحيى: مش مهم، قول يا رب …. لسه عاوز تقعد؟
محمد: آه عاوز اقعد
د.يحيى: ….، أدينا قاعدين
محمد: هاجيلك الجمعة الجاية، انت مابتجيش الخميس فى رمضان مش كده، حاجيلك الإثنين
د.يحيى: لا يا عم أنا ماباجيش الاثنين، خلينا الأربع بعد الجروب.
محمد: ماشى، بعد الجروب
د.يحيى: أنا حاقول لك على مواعيد رمضان، أنا فى رمضان مابغيرش مواعيدى ابداً إلا مضطر، أنا رأيى اللى يغير مواعيده فى رمضان صيامه مش ولابد، ربنا مش عامل رمضان علشان ننام طول النهار، دا هروب مش تحمّل
محمد: مواعيدنا فى رمضان يوم الأربع مش كده
د.يحيى: ما هو أنا حاقولك اهوه، أيوه ميعادنا الأربع، بس بنبتدى الجروب الساعه ثمانية ونص مش سبعة ونص، يبقى تخلى معادنا عشرة وربع ولا عشرة ونص.
محمد: ماشى (12)
(12) نلاحظ أنه لم يمض بعد طلبه أن تطول الجلسة سوى دقائق محدود (وربما دقيقة واحدة) ويمكن الانتباه لمعنى وقيمة الوقت فى مثل هذه الحالات وهذه اللقاءات، لأنه ظهر من هذا التصرف أن مجرد إعلان رغبته فى البقاء، والاستجابة لها بالسماح الحقيقى قد أوصلت “رسالة القبول” فتعمقت العلاقة، فاطمأن أكثر قبل انهاء المقابلة مما دعاه أن يعلن أنه ربما يكتفى بهذه الدقائق، ثم يطلب المغادرة فور اطمئنانه لذلك[6]
بصراحة: أنا محتار فى تصنيبف هذه اللقاءات تحديدًا، هل هذا هو ما يسمى العلاج النفسى، أم أنه متابعة تأهيلية، أم أنه كما وصلتُ أخيرا ما يستحق الوصف الجديد عينات كافية “لمشاركة حركية وعى بينشخصى فى تشكيل مستوى وعى جديد عند الطرفين”؟ فهو “نقد النص البشرى”[7]
لعل اشارتى فى هذه المقابلة عن علاقتى بالحيوانات والتطور، ثم إعلان حساسيتى من استعمال صفة “النفسية” للتبرير والتفسير، ثم كلامى عن وحدتى المقابلة لوحدته وكسرها، ثم دعوتى الضمنية لقبول بعضنا بعضا فى رحاب عدل الله، لعل فى كل ذلك ما يشير إلى أن وعى الطبيب مهنيا لا ينفصل عن وعيه ذاتيا طالما يخدم نقد النص البشرى على الناحيتين.
د.يحيى: انت بتقول إيه يا جدع انت، ماشى إزاى وعشرة ونص إزاى، انت شغلك الساعة كام؟
محمد: أنا مش شغال
د.يحيى: يا نهار مهبب، ايه اللى بتقوله ده، امال ايه اللى جابك؟ إمشى يالَهْ روّح
محمد: لأه والله باكلمك بجد، أنا ماليش نفس لأى حاجه، نفسيتى كده مش قابله اى حاجه
د.يحيى: اقسم بالله ما أشوفك تانى
محمد: ولا حتى ليّا نفس آكل ولا أشرب
د.يحيى: حاترجع تقول لى نفسيتى ومش نفسيتى، عرفت أنا رفضت “محمد نفسية” ليه، أقسم بالله العظيم ما أشوفك تانى
محمد: عاوز أشتغل بس فيه حاجه ما نعانى، نفسيتى مش قابله أى حاجة
د.يحيى: باقول لك إيه: شفت إمتى بتطلع كلمة “نفسيتى”!! لما تحب تبرر أنك تنام فى الخط.
محمد: والله العظيم عاوز أشتغل بس فيه حاجه منعانى
د.يحيى: مفيش حاجه إسمها عاوز ومش عاوز، ما احنا اتقفنا، امشى ياله إمشى روّح
محمد: يعنى أنا غلطت لما قلت لك إنى أنا ماباشتغلش
د.يحيى: لأ طبعا، إنت مش حاتكذب عليّا، إنت مابتكذبش علىّ أبداً
محمد: ماشى، أنا بقول لك الحقيقة
د.يحيى: ماهو الحقيقه لما تكون زفت، ماتبقاش فل وياسمين بمجرد أنك تقول إنها زفت، انت بتقول الحقيقة عشان تتحمل مسئوليتها، مش عشان تبررها “بنفسيتى ومش نفسيتى”، تقولها عشان نبدأ نغيّرها سوا سوا، إذا كانت زفت.
محمد: آه والله لما باقعد مع واحد صاحبى بيقول لى كده برضه
د.يحيى: دول باين أصحابك دول عيال جدعان، بيحبوك، باقولك إيه….؟
محمد: (مقاطِعاً) خلاص خلاص: هانزل الشغل يوم السبت
د.يحيى: وهاتشتغل فى عز رمضان، علشان ربنا يبارك لك، الصنايعيه الخِرْعِين بيبطلوا فى رمضان
محمد: لأه بس على قد ما انا تعبان، برضه رايح اشتغل برضه، الحمد لله
د.يحيى: أهو كده الجدعنه، بكره تشتغل لأن ده أساس العلاج زى ما اتفقنا، بس مش ضرورى تطربقها تانى
محمد: بصراحة أنا بابقى عامل دماغ وباشتغل وكل حاجه
د.يحيى: يا خبر اسود، إوعى يا واد يا محمد، تكون بتضرب انت كده حاتبوّظ كل حاجة
محمد: آه، عارف، بس دى حاجه بسيطه علشان تدينى قوة
د.يحيى: أنا عارف، بس قوة مزيفة وخطر وعمرها قصير، دا انت زى ما تكون بتكَرْبَجْ حصان فى مطلع، يشد شويه وبعدين يطب واقع قبل مايكمل المطلع، وتقع العربية الكارو اللى كان جاررها فوق دماغه
محمد: خلاص خلاص عرفت
د.يحيى: إياك يا محمد، ولا نُصّ قُرص، خلينا حبايب
محمد: حاضر حاضر ما انا عارف، حاحاوِل (13)
(13) “العمل” فى خبرتى، فى حدود ظروف مجتمعنا، هو محور جوهرى – كما ذكرنا فى بداية الحالة ودائما – فى خطة العلاج – وبرغم أن عمل محمد بالصورة التى كان يقوم به (طربقها) كان عاملا مهيَئاً لما أصابه من حيث أنه كان يتصف بالإنهاك مع التهميش حتى حل محل وجوده كله، إلا أنه لا مفر من عودته إليه دون انتظار، وكثيرا ما يقول المريض “سوف أعمل حين أشفى” فأصححه بحسم أن العكس هو الصحيح وأنه سوف يُشفى حين يعمل”، وكثيرا ما أوصى كتابة أيضا على الوصفة (الروشتة): “يعمل وهو مريض – يعمل وهو مش قادر – يعمل وهو مش عايز– يعمل وهو بيموت“، وعادة ما يلتقط المريض ما أعنى، ويعمل بهدف الاسهام فى إنجاح خطة العلاج، فى حين يعتبر الكثيرون من الأهالى أن ذلك هو نوع من القسوة بشكل أو بآخر.
أما بالنسبة لهذه الأقراص (الترامادول كما ذكر محمد قبلا) وهى بجرعة صغيرة أو متوسطة تعتبر منشطة فعلا وتساعد هؤلاء العمال المكافحين على مواصلة العمل وأحيانا على تطبيق ورديتين متواصلتين، فإن خطرها يزداد ويتضاعف بعد مثل هذه الكسرة الذهانية، ويصبح التوقف عنها توقفا نهائيا شرطا حاسما لا استثناء فيه لاستكمال العلاج، وتساعد مثل هذه العلاقة المتنامية بين الطبيب والمريض على الاستجابة لضغط الطبيب هكذا.
د.يحيى: مافيش حاجة اسمها حا حاول، المسألة دى بقى ما فيهاش حا حاول، خلينى أقدر أكمل معاك
محمد: لأه فهّمنى علشان أبقى فاهم، فهمنى
د.يحيى: انت عارف أنا مابافهِّمْش، أنا باساعدك إنك تفهم، روح ياواد إشتغل وإياك زى ما قلت لك، يالاّ مع السلامة، أنا متشكر، كل سنة وإنت طيب، وَعْد راجل لراجل، تشتغل وبلاش الهباب ده
محمد: خلاص ماشى
د.يحيى: ياللا مع السلامه كتر ألف خيرك مع السلامه
محمد: السلام عليكم
د. يحيى: وعليكم السلام ورحمة الله (14)
(14) نلاحظ تكرار شكر الطبيب للمريض وهو ما أشرنا إلى دلالته سابقا، لكن الشكر هنا له دور آخر لأنه يتوجه بشكل ما إلى الشكر على ما سوف يحدث، وليس فقط على ما حدث، بمعنى الشكر على أنه سوف يعمل، وسوف يكف عن أخذ هذه الأقراص المنشطة، ثم على بقية ما يجاهد لنواصل “سوا سوا”!!، وهذا دعم لما سيكون، فضلا عن ما فيه من تحقيق فرض أن المستقبل “يحدث الآن”!
بعض مقتطفات من الشرح للحاضرين بعد انصراف محمد
د.يحيى: آه يانا يابا، طيب إنتوا شوفتوا العلاقه مع عيان شيزوفرينا وبارانويد!! هوّا ده اللى بتقروه فى الكتب؟ أديكو شوفتوه وهوّا داخل علىّ عشمان رغم اللى حصل المرة اللى فاتت، وشوفتوه قبل كده خلال الجروب، وشوفتوا إبراهيم اللى كان متشخص تقريباً فصام بسيط وفجآه راح مخترع كلمة “محمد دلوقتى” عشان تصدقوا إننا مابنعرفش معنى كلمة فصام (شيزوفرينيا) اللى بنستعملها على العمال على البطال، طبعا مش كل حالة فصام حاتبقى كده، وما تنسون إن المقابلة دى بعد شهور من إنتهاء الجروب اللى حضور محمد فيه كان منتظم بنسبة كبيرة.
(يدخل محمد الغرفة ثانية فجأة دون استئذان، ولا يرفض د. يحيى ذلك قائلا):
د. يحيى: أيوه يا محمد
محمد: انت جاى الأربع اللى جاى أكيد؟
د. يحيى: أيوه جاى طبعا ……، بس على شرط
محمد: أيوه عارفُه
د. يحيى: إيه؟
محمد: أشتغل
(ينصرف محمد ويعاود د. يحيى للشرح)
أنا عندى أربع خمس كلمات، معلشى أنا حاكررهم، أصل ماعنديش غيرهم، بلاقى فيهم نظريه باكملها، وساعات التكنيك بأكمله.
أولاً: انتو لاحظتو لما قال إنه “مش قادر يتجنن”، هوّا اللى قال، أنا ماغششتهوش.
ثانياً: وإنه مش نافع يرجع محمد طربقها لأنها سكة وفشلت بعد ما كسرها الجنون، وبعدين الجنون راخر ما عدشى نافع بعد ما سلَّطْنا النور على تركيبته كلها، ووصله إنه ما عادش نافع فعلا، يبقى مافيش غير إننا نكمل، بس خلوا بالكم ما حدش يضمن أى نكسة فى أى وقت لأنه ممكن الظروف تكبس عليه، يطفى النور وهات يا لخبطة.
ثالثاً: بعد ما فشل الجنون وهوّه رفضه معانا، رجع يتلكك فى حكاية “النفسية” وما “النفسية”، هو جى النهارده يدوّر على تفسير نفسى للى هوّا فيه، هوا جَىْ مبسوط إنه لقى اسم غير الأسامى اللى كنا بنشتغل فيها (طربقها/ فركشنى/ دلوقتى/ طربقها الجديد. محمد الصغير) هُبْ راح جَىْ وقايل اسم عمرنا ما استعملناه فى الجروب، ليه؟ لأنه عاوز شماعه لحد ما يرجع فى كلامه، شماعة تسمح له إنه يكرر على العمال على البطال: “أنا مريض نفسى”، “أنا مريض نفسى”، وهات يا تبطيل شغل، وهات يا شكاوى وتفسير ولت وعجن، وده بيشاور على قد إيه الإعلام والاستسهال الطبى جعل ما هو “نفسية” له هذه الوظيفة السلبية.
رابعاً: أديكو شفتو إيه علاقة محمد دلوقتى بربنا، دى علاقة بتشاور على إن الحل يبدأ من محمد دلوقتى من غير ما نستعجل، محمد دلوقتى، ومافيش غير كده، وبرضه ما فيش إلا ربنا هنا ودلوقتى، وفى نفس الوقت فى كل حتة نعرفها وما نعرفهاش، هُبْ يبقى لقينا حماية ومظلة دايمة وممتدة، حتى لو العلاقة هوّت أو سرقنا الكلام، فاحنا لو عرفنا نحافظ على وصلة الوعى شغالة ما بينَّا بجد هنا ودلوقتى، وممتدة وِبِنّشْطْهَا كل شوية: حاتفكرنا بالوعى الأشمل، وهات يا رحمة ومشاركة وربنا.
د. ساندرا: مش فاهمة؟
د. يحيى: بصراحة أنا منتمى للحركه، مش للمحتوى، الشغل حركة، ولما المريض بيشتغل باقول له متشكر، كل الفرق هو إنه كان بيشتغل سـُـخرة على حساب كل حقوقه ووجوده، ودلوقتى عايزينه يشتغل ويوجه عائد الطاقة بتاعته لنفسه ولربنا واحنا معاه وهو بينجز، عايزه يا ساندرا تعرفى العلاقة بتعمل إيه لما تقارنى صورته المرة ديه باللى قبل كده، دى علاقة فيها رؤية ومشاركة وربنا، إنتى لما تقولى لواحد ذاكر أو اشتغل لك ولربنا، غير لما تقولى له إشتغل ليّا، زى الأهل ما بيعملوا عمّال على بطّال فى عيالهم اللى بيذاكرو لهم، البنى آدم موجود علشان يشتغل وياخد ويدّى، هايقعد ويقول “نفسية” و”مش نفسية” و”محمد نفسية“: مش حاينفع عشان كده رحت مقاطُعْه من الأول، ورفضت محمد نفسية من أصله عشان خايف من الشماعة والتبرير، ومع ذلك العلاقة بقت أمتن وممتدة زى ما انتو شايفين.
د. ساندرا: طب مش نراجع التشخيص أحسن؟
د. يحيى: نراجعه نعمل بيه إيه؟ هوّا اللى إنتوا شايفينه ده بارانويد وشيزوفرينيا برضه، فيه حد فيكم مصدق نفسه وهوّا بيحط اليـُفَطْ دى، ومع ذلك انا متأكد إن أغلبكم حاينسى احتياجه للتشخيص لو تعمق فى اللى جارى، مش معنى كده إن احنا مانشخصى، لأ طبعا عشان الدوا والأوراق والملفات والكلام ده، أنا باقول الكلام ده وعارف انكم حاتنسوه.
د. عدلى: ربنا يقدرنا
د. يحيى: ولا يهمك خبرتى بتقول إنكم حاتنسوه حاتنسوه، يمكن إلا حته، وأنا أتعلمت إن الحتة دى يمكن تكون كفاية، أنا باتكلم بجد فأنا علشان أنا مصاحب المخ البشرى وباحاول أصاحب مستويات الوعى كلها، بابقى راضى والحمد لله بأى حته تفضل، بس إزاى يعنى، أنا باستغرب إزاى بنى آدم ربنا خلقه، يلغى الكلام ده اللى هو شافه بعينه واتسجل فى مخه عينى عينك، عاوز أعرف حاننسى مين فيهم: “محمد طربقها” ولا “محمد فركشنى“، ولاّ “محمد دلوقتى“، وهُبْ يطلع لنا “محمد نفسيه” ونرفضه، إنتوا شايفين الخطوات والشغل وشوية دوا وعلاقه لافيها “أبوك كان قائد طبيه” ولا “عمنا أدويب” ولا “الست إليكترا”، مش معنى كده نهمل تاريخه وهو ملان باللى خلاه ينكسر، بس التفريغ والفضفضة عمال على بطال لوحدهم مش حايعملوا حاجة، التاريخ بتاعه احنا عرفناه من الأول، عندكم البِتّ اللى كان خاطبها، وبعدين خبرته فى الجيش، وأنا لحد دلوقتى مش عارف هيّا كانت خبرة حقيقية ولا من المرض بس ما وقفناش عندها، ومع ذلك أهوه قدامكوا أهوه، قدرنا نبتدى من جديد وربنا يسهل، أعمل إيه؟ أنسى أنا كمان وأقول ده بيتهيألى وما حصلشى؟ طب إزاى اثبته للناس؟ إزاى أوصّله للخواجات بتوع الدواء علشان يذلونا، إزاى أبلغهم إننا بنستعمل أدويتهم على العين والرأس، كتر خيرهم، بس بنستعملها بشكل تانى، لأغراض تانية، إننا نساعد المخ المناسب إنه يبنى نفسه زى ما ربنا علّمه، وإنه ينظم الباقى؟ إزاى حايصدقوا الكلام ده، أدينى باسجله واللى عايز يمكن حيلاقى كل حاجة متسجلة، بس أنا شاكك بعدى حايحصل إيه عموما، أنا ناوى آخدها معايا فى التربة إن شاء الله، ويمكن أسيب لكم نسخة عشان ربنا يحاسبكم.
شكرا
(ضحك)
*****
ــــــــــــــــــــــــــــــــــــــــــــــ
[1] – طبيب مقيم كان قد دخل مع بعض الأطباء المقيمين الذين استأذنوا فى حضور المقابلة، وكثير منهم كانوا من الذين يتحوطوا المجموعة للمشاهدة وليس للمشاركة فى دائرة أوسع.
[2] – هشام هذا هو الإبن الفنى (وهو الذى يحضر معى) وهو الذى يقوم بالتصوير للمقابلات، وايضا للمجموعة، وهو يتابع باهتمام ما يجرى، وأحيانا يبدى لى ملاحظات دالة ونحن فى العربة أثناء العودة، ملاحظات تلقائية طيبة ذكية، تدل على أنه لا يقوم بعمله بطريقة آلية بحتة، ويساعدنى فى ذلك أحيانا فى معرفة ما يمكن أن يصل للشخص العادى جدا، المتوسط جدا عن ما يدور فى الجلسة على أعماق مختلفة.
[3] – “واخدنى وش” مصطلح يستعمله العامة المصريين يفيد ما يعنى المقاطعة والرفض المسبق أو الصدّ حتى المنع، ولا ننسى أن عمل محمد “نقاش” وهذا التعبير أقرب إلى صنعته.
[4] – هذا التعبير لم يرد فى الجزء المنشور الاسبوع الماضى الذى شمل المقابلة كلها، لأنه قاله بعد أن توقف التسجيل أثناء خروجه.
[5] – د. عدلى الشيخ هو طبيب مقيم، مسيحى، تصادف أن جده واسمه أ. د. عدلى الشيخ أيضا كان استاذى للأمراض الباطنة أثناء دراستى فى كلية الطب، وكان استاذا متميزا وكنت أحبه وخاصة حين يحضر متطوعا الساعة 7 صباحا يعلمنا المزيد من الأمراض الباطنة دون مقابل، ويبدو أنه قد بدأت علاقتى مع حفيده المسمى باسمه من خلال هذه الذكرى، وجاءت مداعبتى له مع محمد مثالا آخر لعروجى إلى مواضيع غير تقليدية بها جرعة شخصية زائدة.
[6] – ويمكن مقارنة طريقة إنهاء اللقاء فى الجلسة السابقة قبل أسبوع نشرة الإنسان والتطور بتاريخ: 24/11/2015 www.rakhawy.net
[7] – أنظر “نقد النص البشرى” بتاريخ (4-4-2016 و 23-4-2016) بموقعى www.rakhawy.net
يحيى الرخاوى طبيب نفسى

