يحيى الرخاوى طبيب نفسى
نشرة “الإنسان والتطور”
الأحد: 11-1-2026
السنة التاسعة عشر
العدد: 6707
ديوان “اغوار النفس”[1]
الفصل الثالث
غنيوتين
مقدمــة
- 1 -
الحياة هى الحياة.
أغلى حاجة فيها هى : إنى عايش.
باترجِفْ من خطوتى الجايهْ، ولكن:
باترعب أكتر لو انى فضلت ساكن
كل ما أشكّ فْ خطايا،
ألتفت مالقاش ورايا :
إلا إنى،
وسط كل الناس باغَنِّي
يعنى بابنْى،
أنا وابـني.
واللى مش ممكن حايخلص بـِـيهْ وبـيَّا.
يبقى غيرنا يكمله.
-2-
الحياة دى مش كلام مرصوص على صفحات جرايد،
أو حكاوى فى القهاوى والدواوير والمقاعد،
أو شِـلَـلْ مرصوصة تعرف فى الصياعهْ واللكــــاعهْ،
أو برامج فى الإذاعهْ.
الحياة دى مش ثقافة عاليا جدا” فَوْقَ هامات البشر”.
أو جوايِزْ يمنحوها للى فاز لما انتشر.
-3-
الحياة مش حلم ليلة صيف، ولا إحساسْ يِكَرْكَعْ
متـل قــلـه مايله تُدْلق مية المحاياة فى صحرا مولعة،
لا الزرع يطلع فيها ولانارْها فى يوم راح تنطفي.
-4-
الحياة الحلوة… تحلـى بـْـكُــلِّنَــا.
بس مش داخلين فى بعض وهربانين.
زى كتلة قش ضايعه ف بحر طين.
الحياة إنت وانا،
كل واحد هوَّا نفسه،
بس نفسه هى برضه كلنـا،
مالى وعـيـــه بـربنا.
-5-
والحياة الـمُـرَّة حتى، لو تاخد بالـك شويـه،
راح تشوف مرارتها حلوه !
هيه صعبه .. لو لوحدك.
بس تـسـهـل لو معانا الناس يا ناس.
-6-
مش مصدق !! ؟؟
طب تعالى نشوف سوا
ــــــــــــــــــــــــــــــــــــــــــــــ
[1] – يحيى الرخاوى، (2017) ديوان: أغوار النفس، الطبعة الثانية، منشورات جمعية الطب النفسى التطورى، وقد كانت طبعته الأولى،1978 منشورات دار الغد للثقافة والنشر، والكتاب متاح فى مكتبة الأنجلو المصرية وفى منفذ مستشفى د. الرخاوى للصحة النفسية شارع 10، وفى مؤسسة الرخاوى للتدريب والأبحاث العلمية: 24 شارع 18 من شارع 9 مدينة المقطم، كما يوجد أيضا بموقع المؤلف، وهذا هو الرابط www.rakhawy.net.
يظل انين الوجود النازف يقطر دما
يتنفس حقائق لا تنطفئ
لا تتبدل
يلامس اطرافها
نزف العاشقين
في ترهلات اصل الوجود