يحيى الرخاوى طبيب نفسى
نشرة “الإنسان والتطور”
الثلاثاء: 22-10-2013
السنة السابعة
العدد: 2244
الثلاثاء الحرّ:
حوار الأخت وأخيها (الحوار الخامس والسادس) (1)
الحوار الخامس
(قالت البنت لأخيها:)
البنت: أنا مش موافقة
الأخ: ولا انا
الأخت: ما سألتنيش مش موافقة على إيه؟
الأخ: ولا انتى سألتينى
الأخت: أنا مش موافقة على أى حاجة
الأخ: ولا انا
الأخت: هوّا كل حاجة أقولها، تقول “ولا انا”؟
الأخ: يعنى عايزانى أوافق بالعافية؟
الأخت: توافق على إيه؟
الأخ: على اللى انت مش موافقة عليه
الأخت: إللى هوّا إيه؟
الأخ: اللى هوّا كل حاجة
الأخت: كده شاطر، …..الله يخيّبك
الأخ: أنا وانت والمسلمين
الأخت: قصدك مين؟ هما مسلمين عندك يعنى إيه؟
الأخ: مش الإخوان المسلمين
الأخت: يا نهار اسود، هما الإخوان مش مسلمين؟
الأخ: إيش عرّفنى
الأخت: إمال مسمّيين نفسهم كده ليه؟
الأخ: أنا ما لى ما تسأليهم
الأخت: أسأل مين
الأخ: الإخوان
الأخت: أسألهم ليه؟
الأخ: مش انتِي اللى “مش موفقة”
الأخت: يعنى انتَ اللى موافق؟
الأخ: قلت لـِك “لأه”
الأخت: طب ما تسألهم انت
الأخ: يعنى هيّا جت على دى ؟؟؟؟ !!
(انتهى الحوار الخامس)
الحوار السادس
(قالت الأخت لأخيها:)
الأخت: أنا مش رايحة
الأخ: أحسن
الأخت: أحسن ليه ؟ عشان تبقى انت “الثوار” لوحدك!!
الأخ: إحسبيها زى ما انتتى عايزة
الأخت: ما سألتنييش مش رايحه ليه؟
الأخ: واسألك ليه؟
الأخت: عادى
الأخ: يعنى انتِ عارفة السبب يعنى ؟
الأخت: لأه
الأخ: عشان كده ما سألتكيش
الأخت: طيب أسألك انا
الأخ: إسألى
الأخت: هوّا انت بتروح ليه؟
الأخ: عشان أشارك
الأخت: تشارك فى إيه؟
الأخ: يا خبر اسود، !! “كل ده” ومش عارفة بنشارك فى إيه؟
الأخت: كل إيه؟
الأخ: كل اللى عملناه ده وغيّرنا بيه الدنيا
الأخت: هيّا اتغيرت؟
الأخ: هوّا انتِي ما عندكيش خبر؟
الأخت: لأه
الأخ: إنتى جرى فى عقلك حاجة
البنت: الظاهر كده
الأخ: هوّا المرض ده معدى؟
الأخت: حسب المناعة اللى عندك
الأخ: الحمد لله أنا عندى مناعة مستوردة
الأخت: دى مفعولها أكيد ، واضح
الأخ: إزاى
الأخت: بتخليك ما تفكرشى من أصله
الأخ: هـــه ؟ !!!!!!!
(انتهى الحوار السادس)
[1] – تم نشر هذا المقال فى موقع “اليوم السابع” بتاريخ 9- 8- 2013