عدد اكتوبر1998- ومضتان (كتابة)

كتابة‏ ‏

ومضتان

سهير‏ ‏صبرى

الومضة‏ ‏الأولى: ‏أنا‏ ‏باحب‏ ‏الكمسارى

أضع‏ ‏تذكرة‏ ‏المترو‏ ‏فى ‏الماكينة‏..‏تفتح‏ ‏ذراعها‏ ‏وتعدينى، ‏بس‏ ‏أنا‏ ‏باحب‏ ‏الكمسارى، ‏إذا‏ ‏كانت‏ ‏التذكرة‏ ‏تالفة‏..‏تصفر‏ ‏الماكينة‏ ‏ولا‏ ‏تفتح‏ ‏ذراعها‏، ‏ولا‏ ‏تعديني‏..‏بس‏ ‏انا‏ ‏باحب‏ ‏الكمساري

الكمسارى ‏ساعات‏ ‏يكون‏ ‏رايق‏ ‏ويغازل‏ ‏الراكبات‏ ‏غزلا‏ ‏عفيفا‏ ‏جميلا‏، ‏وساعات‏ ‏يكون‏ ‏غلس‏ ‏وينكد‏ ‏على ‏الركاب‏، ‏وساعات‏ ‏ياكل‏ ‏الشلنات‏ ‏الباقية‏  ‏ويخلى ‏الواحد‏ ‏يتغاظ‏ (‏مش‏ ‏عشان‏ ‏الشلن‏..‏عشان‏ ‏المبدأ‏) ‏وساعات‏ ‏ياخذ‏ ‏دور‏ ‏الأخ‏ ‏الغيور‏ ‏ويوقفنى ‏بعيدا‏ ‏عن‏ ‏الركاب‏ ‏الذين‏ ‏هم‏ ‏ذئاب‏، ‏وساعات‏ ‏يحذرنى ‏بنظرة‏ ‏فى ‏عينيه‏ ‏ثم‏ ‏إلى ‏الشنطة‏ ‏بأن‏ ‏ثمة‏ ‏من‏ ‏ينوى ‏أن‏ ‏ينشلنى، ‏وساعات‏ ‏يصعب‏ ‏عليه‏ ‏العيال‏ ‏وما‏ ‏يقطعلهمشى ‏تذاكر‏، ‏وساعات‏ ‏يكون‏ ‏رايق‏ ‏قوى ‏ويحول‏ ‏الأتوبيس‏ ‏لقهوة‏ ‏فيها‏ ‏الكل‏ ‏هايص

كل‏ ‏الثراء‏ ‏ده‏ ‏يروح‏، ‏وتيجى ‏ماكينة‏ ‏أحط‏ ‏فيها‏ ‏التذكرة‏،‏تفتح‏ ‏ذراعها‏ ‏وتعديني‏..‏لأ‏، ‏أنا‏ ‏باحب‏ ‏الكمسارى          

(‏منتصف‏ 1993)‏

الومضة‏ ‏الثانية‏: ‏لا‏ ‏كده‏ ‏عاجب‏ ‏ولا‏ ‏كده‏ ‏عاجب

مات‏ ‏زوجها‏ ..، ‏أو‏ ‏هجرها‏ ‏وراح‏ ‏اتجوز‏..، ‏أو‏ ‏زهقت‏ ‏من‏ ‏قرفه‏ ‏وسابته‏ ‏هى، ‏لا‏ ‏لاصت‏ ، ‏ولا‏ ‏اتحوجت‏ ..، ‏إشتغلت‏ ‏وقعدت‏ ‏بيهم‏ ‏على ‏الناصية‏ ..، ‏إشترت‏ ‏تاكسى ‏وأجرت‏ ‏له‏ ‏سائق‏ ‏أمين‏ ..، ‏فتحت‏ ‏عيادة‏ ..، ‏إنكبت‏ ‏على ‏أعمال‏ ‏البحث‏ ‏والترجمة‏  ‏قالو‏ ‏دى ‏قادرة

فى ‏جميع‏ ‏المستويات‏ ‏والطبقات‏ ‏تثير‏ ‏الست‏ ‏الجدعة‏ ‏حفيظة‏ ‏المجتمع‏ ‏كله‏..، ‏لو‏ ‏مكسورة‏ ‏الجناح‏ ‏تبقى ‏عبء‏ ‏والواحد‏ ‏مش‏ ‏ناقص‏..‏لو‏ ‏جدعه‏ ‏وشالت‏ ‏روحها‏ ‏تبقى ‏قادرة‏، ‏طيب‏ ‏الست‏ ‏تعمل‏ ‏إيه‏ ‏بالضبط‏ ‏فى ‏المجتمع‏ ‏الزفت‏ ‏ده.  

 (‏منتصف‏1993)‏