أكتوبر1985-الغربة

 

عدد أكتوبر 1985

الغربة

كوثر مصطفى

أصعب ما فى الغربة …..الغربة

موش عارفه أزاى

موش قادره أعبر ….

أو أشرح قصدى

أكبر منى الاحساس

أكبر من شعرى ومن لغتى.

صدقنى …..

الغربة الصبح تصبح على كل الناس الا حبايبك

الغربة الليل تتمسى بكتم النفس الطالع منك

وبخنق الرغبة

 وبقتل الاحساس الصارخ انك

أنك مقهور، انك مظلوم .

فيه ايد ممدودة بكرباج بتقطع جسمك .

لازم …..لازم تتحمل

الغربة هانت … مافلضلش كتير … بكره …

وتلف الأيام وتكمل ….

والايد الممدودة جواك على شئ

ما انتش عارفه

الايد اللى بتلعب فيك وبتلعب بيك….

الايد بتكسر وبتحرق وبتطفى كل النور المنقاد .

الايد الجبارة ما زالت

وما زلت المسكين

الغربة …. الغربة شعورك أنك مسكين .

الغربة الليل تتمسى

على صوت حراس الأبواب

بيعروا البنت

وتنام مكمود

وتنام مخمود

وتنام بالعار

الغربة أحيانا برد

الغربة أحيانا نار

الغربة دمى ودمك مسود اللون

الغربة دموع مسودة

الغربة مين اللى هناك

مين اللى ما زال بيخبط على بابنا

مين اللى نسينا ومين اللى فاكرنا .

الغربة ترجع ياخدوك بالحضن دقيقة و يروحوا

الغربة قصيدة شعر مخنوق مدبوح ميت جوا كل الشعرا

الغربة

الغربة برودى الآن

الغربة جفافى الآن

الغربة مجئ الشعر بليد متكسر

الغربة مجئ الشعر بليد متكسر .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *