الرئيسية / مقالات صحفية / اليوم السابع / همّا فْ إيه، ولا فْ إيه ؟؟!!

همّا فْ إيه، ولا فْ إيه ؟؟!!

اليوم السابع

الأربعاء: 27-11-2013

همّا فْ إيه، ولا فْ إيه ؟؟ !!

قالت البنت لأخيها : لا، لا، لا، …، ، أنا مش قادرة أستحمل؟

قال أخوها: بصراحة عندِك حق، هوّا مين اللى قادر؟

قالت: عمالين ندشّ كلام وخلاص، أنا محتاسة

قال: محتاسة فْ إيه ولا فْ إيه ؟

قالت:  أنا ما عنتش عارفة  مين عمل إيه فى إيه ؟ مش فاهمة أيها حاجة

قال:  ما هى كل حاجة باينة زى الشمس أهـُه

قالت: هوّا إيه اللى باينة زى الشمس، باينة لمين، ولحد إمتى؟ هوّأ الوقت ببلاش؟

قال: إنت مستعجلة كده ليه، دول تلات سنين عـُمْى؟

قالت: جك عمى اسود، هما تلات سنين شوية، دى الحملة الفرنسية كلها مدتها كانت تلات سنين، وعملت اللى ما يعمل، كفاية كتاب “وصف مصر”

قال: والله ما انا عارف هو كان وصف مصر ولا فتح مصر ؟

قالت: الظاهر الحملة الجديدة دى حا تعمل كتاب يسموه : “قفل مصر”

قال: الله يغمّك يا شيخه، بشروا ولا تنفروا

قالت: بشروا إيه وزفت إيه ، ما هو لازم حاجة تتعمل بحق وحقيق ودلوقتى حالا

قال: أهم طلّعولك قانون المظاهرات يا ستى، مش كفاية كده؟

قالت: بصراحة “كفاية”، و”مش كفاية”

قال: إنتى حاتعملى زى الحكومة، إيه الرقص على السلم ده

قالت: عموما، أهم أحسن من اللى عايزين يخربوها ويقعدوا على تلها

قال: هما مين دول؟ لا لا لا لا ، مش قوى كده، هم مش زى بعضهم

قالت: أهم ناس حايخربوها بالعمَى، وناس حايخربوها بالخيانة، وناس حايبيعوها بشوية دولارات.

قال:  واحدة واحدة إعملى معروف، ما هى لما حا تخرب حاتخرب عليهم كلهم

قالت : بس الإخوان باين عليهم عارفين لهم سكة خصوصى

قال :سكة خصوصى غير السويتّات اللى فى الجنـّة

قالت: أستغفر الله العظيم ، إنت بتقول إيه؟

قال: أستغفر الله العظيم، أصلهم باين عليهم  مش كافيهم التكويش على المشاريع والفلوس والمناصب فى الدنيا، دول مركزين على الدنيا والآخرة في بيعة على بعضها

قالت: وحانعمل إيه؟

قال: العمايل عمايل ربنا

قالت : وربنا حا يعمل إيه؟

قال: كل خير،

قالت: وإسرائيل؟

قال: تانى ؟ مالها؟

قالت: بتتحزم وترقص كل ما تشوف اللى احنا فيه، واللى احنا رايحين له

قال: يحـُقّ لها

قالت: يحـُقّ لها يعنى إيه

قال: هيّا فى ديك النهار الى يتحطم جيشنا ويتفركش شعبنا منّه فيه

قالت: طب ليه ما حدش من دول ولا من دول واخد باله

قال: همّا فْ إيه ولا فْ إيه

قالت: آه صحيح، همّا فْ إيه ولا فْ إيه

قال: يا عينى عليكى يا مصر

قالت : لأ ، لأه ، مش للدرجة دى، إنت فاهم إيه !!!؟

قال: بقيت زيـِّك، مش فاهم أيها حاجة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *