الرئيسية / مقالات صحفية / اليوم السابع / العيد بالناس .. والناس للناس

العيد بالناس .. والناس للناس

اليوم السابع

الأربعاء: 16-10-2013

العيد بالناس .. والناس للناس

[أغنية للأطفال – داخلنا وخارجنا]

الناس للناس

والعيد بالناس

والناس بالعيد

وجديدْ فى جديدْ

طب ليه مش عارف أبقى سعيد؟

………….

أصلها مش لعبة: بُوسَهْ وحُضْن

ولا “إنتَ  إزيك”  لتّ وعجنْ

داحْنا علينا نستحمل بعض،

           وناخدْها جد ّ.

ماذا وإلا،

 مش راح يفضل غير ضرب ورفصْ

أو أحضان كدب ورزع وهبْـدْ

……..

زى ما عايزْ إنك تبقى جنبى وطّيبْ

لازم أشعر إنك بتعوزنى قوى قرّيبْ

يا كِدَا يا بلاش نلعب خالص لعبة “عايشين”،

وحاتبقى المسألة كرْ وفرّ.  مش بنى أدمين

أنا محتاج لكْ واقف كدَهُهْ ماسك روحك

ْآه،  وانت كمان عايز إنى اسمع بُوحَكْ

أنا محتاج لكْ تفضل بَرَّايَا  لكنْ شايفْ

آه، وانتَ كمان عايز منى ما ابقاش ناشفْ

***

أنا محتاج لكْ: مش جوايا، حاعْمِلْ بِدَهْ  إيه؟!!

آه وانتَ عايزنى افضَلْ برّاك، وحاموت فيك ليه!!!؟

إيدى على إيدك

يحميها سيَدك

ياللا نقرّب

ياللا نجرّب

حانخاف من إيه

بنخاف كده ليه

طب حانخاف ليه لو ربنا فينا احنا لاِتْنِيْن؟؟!!

ربنا دا خَلَقْنَاَ لْبعضينَا حلوين جامدين

نتلم “عليه”، ننفضَ “عليه”، فوقْ يا أخينا

بالكلمة الحق وفاس العزْق، مش سكينة

يالاّ نجرب تانى وتانى، نبنى سوَا قصر

ما هُو حلوانى: إللى بنى مصر

ندخل خايفين – نخرج آمْنِينْ

ندخل آمْنِينْ – نخرج بانْيِين

******

بتقول صعبة؟!!  طب نعمل إيه؟

نفضل نشحت بالذل دا ليه؟

حايذلونا لو حانطاطى

بفلوس مرابين أصلها واطى

ما هى بلدنا حانسيبها لمين؟

حانأجر ناس يبنوها تانيين؟؟!

وكفايا بقى كده قتل فْ بعض

ندفع ما علينا لِطين الأرض

الأرض العرْض

 العرْض الأرض

الأرض العرْض

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *