يحيى الرخاوى طبيب نفسى
اليوم السابع
الجمعة 13-12-2013
أسباب مختلفة لتقول “نعم”: ربنا يستر
قالت البنت لأخيها: طبعا حاقول نعم
قال أخوها: نعم على إيه؟
قالت البنت: على الدستور
قال: كلّه ولاّ حته منّه؟ حتهْ منّه ولاّ كله؟
قالت: إنت حاتتريق؟! الله يصبّحها بالخير سهير البابلى فى “ريا وسكينة”
قال: والنبى اللى جارى ده ألعن من عمايل ريا وسكينة
قالت: عندك حق،
قال: دكهم كانوا بيقتلوا عشان يسرقوا حتتين دهب، دول بيقتلوا عشان يسرقوا مصر والدهب والإسلام بالمرّة
قالت: والله ما انا عارفه إيه لازمة الدستور ده!! دا ما فهيوش سيرة حتى عن البوتاجاز
قال: إنتى قريتيه ؟
قالت: يعنى انت اللى قريته؟
قال: لا طبعا
قالت: تعجبنى صراحتك، إمال بتتفلحس على إيه؟
قال: قال أهو زيى زيى اللى ما بيفكش الخط، إنما حاقول “نعم”
قالت: واللى ما بيفكوش الخط حا يعملوا إيه
قال: حسب اللى حايقول لهم عليه خطيب الجمعة
قالت: يا خبر اسود، ويبقى إيه لازمة ده كله ؟
قال: لا عندك، ما هو دلوقتى فيه حاجة اسمها حزب النور، يمكن يقولّهم قولوا “نعم”
عالبركة
قالت: يا ريت
قال: والله أنا ابتديت أحترم حزب النور ده، على الله ما يكونشى بيناور.
قالت: مش يمكن حزب النور ده عارف الإسلام الحقيقى، وإن الله نور السماوات والأرض والحاجات الحلوة دى
قال: والله انا برضه ساعات باقول كده، أصل انا باحب الإسلام قوى
قالت: وانا كمان، بس باحب ربنا أكتر
قال: ودى فيها كلام؟
(2)
قالت البنت لأمها: وانتى يا أمى؟
قالت الأم: أنا مالى ؟
قالت البنت: حاتروحى ولا مش حاتروحى؟
قالت الأم: حاروح فين؟
قالت البنت: الدستور
قالت الأم: هوا الدستور ده فين؟
قالت البنت: إنت بتهزرى يا أمى، حتقولى “نعم” ولا”لأه”؟
قالت الأم: هوا مين اللى مترشح؟
قالت البنت: مترشح إيه يا امى !! دا الدستور!
قالت الأم: حاقول نعم للى مترشح ضد الإخوان وخلاص، همّا الإخوان بيقولوا إيه؟
قالت البنت: بيقولو “لأه”
قالت الأم: خلاص ، يبقى انا حاقول عكسهم
قالت البنت: طب ليه يا أمى؟
قالت الأم: ما هم طلعوا أى كلام ،وعمالين يخربوا فى البلد، ويموتوا فى الناس
قالت البنت: همّا اللى بيموتوا فى الناس ؟؟؟!!
قالت الأم: إمال انا ؟
(3)
قال الولد لأبيه: وانت بقى حضرتك حاتقول “نعم” ليه؟
قال أبوه: عشان البلد تمشى
قال الولد: وهوه لو قلت “لأه” مش حاتمشى؟
قال أبوه: طبعا مش حاتمشى، خد عندك لجنة خمسين فى خمسين فى خمسميّة، وحِلّنى
قال الولد: صحيح البلد ما عدتشى مستحملة خمسينات
قال أبوه: ربنا يستر
قال الولد: كدا ربنا يستر، وكدا ربنا يستر
(4)
دخلت عليهما البنت وقالت:الله نور، أى والله ! ربنا يستر.