حاتنتخبٍى مين؟

 

اليوم السابع

الأثنين 5-5-2014

حاتنتخبٍى مين؟

قالت البنت لأخيها: أنا ابتديت أشك فى نفسى

قال: أحسن

قالت: أحسن إيه الله يخيبك، باقول لك باشك فى نفسى

قال: ما يمكن ده يخليكى تبطلى غرور ولماضة شوية

قالت: أنا اللّى لمضة، ولاّ انت اللى عمال تفتى فى كل حاجة حتى لو ما حدش سألك

قال: بتشكّى فى إيه؟

قالت:  باشك إنى يا متآمرة، يا متخلفة

قال: …. الاتنين

قالت: أهو إنت يا سلبى، يا بتاع “الشعب يريد” “الشعب يريد”، وخلاص

قال: هو إنتى عايزة الشعب ما يُريدشى،

قالت: يريد بس بالصناديق

قال: اسم اسم الله ، ما انتى شفتى الصناديق جابت لنا إيه

قالت: ما هو مش كل الصناديق صناديق، الصناديق اللى جايّة دى عشرة على عشرة

قال: إيش عرفك؟

قالت: ما احنا اتعلمنا بقى

قال: اتعلمنا إيه؟

قالت: إيش عرّفنى، أهم كلهم بيقولوا إن احنا اتعلمنا، والصناديق المرّا دى ما تخرش المية

قال: ما تخرش المية؟ يمكن تخر حاجة تانية، المهم ننتخب عشان يبان لنا صاحب

قالت: صاحب!! هو احنا فى زريبة محتاجين صاحب يعلفنا ويحرسنا؟

قال:  قصدى يعنى حايبان لها شكل

قالت: حايبان “لها”! مين هيّا

قال: مصر

قالت: مصر أم الدنيا برضه؟

قال: لا مصر مرات أمريكا

قالت: إخرس يا قليل الأدب، مصر عمرها ما تبقى مرات حد

قال: طب بلاش، “مصر التى فى خاطرى وفى فمى”

قالت: إنت بتتريق؟! مصر هى مصر، مهما حصل

قال: أنا عارف إنى سخيف وقليل الذوق مع واحدة رقيقة زيك

قالت: طبعا رقيقة غصبن عنك

قال: هو انتو خليتو فيها رقة

قالت: رقة عفية وقادرة على  كل الخونة لما يحتاج الأمر

قال: وحانعرف الخونة ازاى

قالت: كل شىء انكشفن وبان، ويمكن يسجلوهم فى الشهر العقارى

قال: هما دلوقتى بيسجلوا نوع الولاء فى  الرقم القومى

قالت: يا أخى بطّل، بطّل،  ما الجرايد كل يوم بتطلع لنا دَسّتة خونة على ما قُسِمْ.

قال: آه..! قولى كده، آدى عيبك إنك لسه بتقرى جرايد

قالت: مش أحسن منك اللى ما بتقومشى من عالنت

قال: والله الواحد ما عاد عارف يصدق مين ويكدب مين

قالت: وعايز تصدّق وتكدّب ليه

قال: عشان اعرف حانتخب مين

قالت: ودى صعبة قوى يعنى؟!

قال: طبعا صعبة، دا مستقبل بلدنا

قالت: لا يا شيخ!!! وصوتك بقى هو اللى حايحدد مستقبل بلدنا

قال: طبعا صوتى، إمال صوتك؟

قالت: طبعا صوتى ونص، هو انت مش عارف إن ستات مصر دلوقتى أوْعى من رجالتها، وهمّا اللى بيروحوا الصناديق، وهمّا اللى بيرسُّوا المزاد، وهمّا اللى بيرسموا الطريق

قال: بقى كده؟ !!يبقى ده بقى سبب اللى حصل، مش تقولى ما الأول واحنا عمالين محتارين: هيّ خِربت ليه؟ هيّا خربت كده ازاى؟

قالـت: إخرس يا جدع انت ، هى لسّا ما خربتشى

قال: طيب، طيب، عندك  خبر حاتخرب إمتى؟

قالت: مش حاتخرب

قال: من بقك لباب السما، طب قولى لى ازاى

قالت: لما نعرف عدونا من حبيبنا، لمّا نبطل سلف، وما نبطلشى شغل

قال: عايزانا نشتغل من غير ريّس

قالت: هوا الريس حايشتغل نيابة عننا ولا إيه

قال: طيب طيب، ألاّ قولى لى: إنتى بقى حاتنتخبى مين

قالت: مش حاقول لك

 

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>